Semak Ngagai Petara dalam Sembiang

1. Sembiang nya ngemaroh ka diri bejako ngagai Petara. Nuan patut bejarit sembiang ngagai Petara. Nya baru nuan ulih ngasai semak iya baka enggau pangan. Jehovah besai bendar sereta bekuasa, tang iya ninga ka sembiang kitai! Kati nuan bejarit sembiang ngagai Petara?—Masmor 65:2; 1 Tesalonika 5:17.

2. Sembiang nya siti ari sembah kitai. Nya alai, kitai patut sembiang semina ngagai Petara, Jehovah. Leboh Jesus agi di dunya, iya selalu sembiang ngagai Apai iya, ukai ngagai orang bukai. Kitai patut ngereja baka nya. (Matthew 4:10; 6:9) Taja pia, semua sembiang kitai patut disebut dalam nama Jesus. Tu nunjok ka kitai masa penudok Jesus lalu bisi pengarap dalam genselan tebus iya.—John 14:6; 1 John 2:1, 2.

3. Leboh kitai sembiang kitai patut bejako ngagai Petara ari ati kitai. Kitai enda patut nyebut sembiang kitai ari pengingat tauka macha nya ari surat sembiang. (Matthew 6:7, 8) Kitai tau sembiang dalam gaya ti bebasa, sebarang maia, enggau sebarang endor. Petara ulih ninga indah ka sembiang ti enda inggar sebut dalam ati kitai. (1 Samuel 1:12, 13) Iya nya manah ngiga tempat ti sunyi jaoh ari orang nyebut sembiang kitai empu.—Mark 1:35.

4. Nama pekara tau di sembiang ka nuan? Sebarang utai ti tau ngaul nuan enggau iya. (Pilipi 4:6, 7) Chunto sembiang nunjok ka kitai patut sembiang pasal nama Jehovah enggau tuju iya. Kitai mega tau minta ka guna kitai diberi, ka dosa kitai diampun, enggau ka tulong kena ngelaban penguji. (Matthew 6:9-13) Sembiang kitai enda patut amu. Kitai patut semina sembiang ka utai ti sejalai enggau peneka Petara.—1 John 5:14.

5. Nuan tau sembiang ni maia ati nuan mai nuan meri terima kasih tauka muji Petara. (1 Jerita Bansa Israel 29:10-13) Nuan patut sembiang leboh nuan bisi penusah enggau pengarap nuan kena uji. (Masmor 55:22; 120:1) Iya nya patut bendar sembiang apin nuan makai. (Matthew 14:19) Jehovah minta kitai sembiang “sebarang maia.”—Epesus 6:18.

6. Kitai patut beguna sembiang enti kitai bisi ngereja besai dosa. Leboh maia nya kitai patut minta pengasih enggau pengampun ari Jehovah. Enti kitai ngaku dosa kitai ngagai iya lalu enggau naka ulih enda ngulang nya, Petara “deka ngampun.”—Masmor 86:5; Jako Dalam 28:13.

7. Jehovah ninga ka semina sembiang orang ti lurus. Awak ka sembiang kitai didinga Petara, nuan mesti nguji naka ulih idup nitih ka undang undang iya. (Jako Dalam 15:29; 28:9) Nuan mesti baroh ati leboh nuan sembiang. (Luke 18:9-14) Nuan mesti ngereja nya nama utai ti disembiang ka nuan. Nya baru nuan ngamat ka nuan bisi pengarap lalu nuan endang amat ka nama utai disebut nuan. Nya baru Jehovah deka nyaut sembiang nuan.—Hebrew 11:6.

Copyright © 2006 Watch Tower Bible and Tract Society of Pennsylvania. All rights reserved.