Pengawa ti Dipegedi ka Petara

1. Anembiak Petara rindu ka utai ti manah. Tang sida mega mesti belajar begedi ka utai ti jai. (Masmor 97:10) Reti nya nyeliah ka sekeda pengawa ti dipegedi ka Petara. Nama sekeda pengawa tu?

2. Kereja ti Kamah: Setuboh apin jadi melaki bini, butang, begulai baka jelu, jadi mali, enggau setuboh sama lelaki nya semua dosa besai ngelaban Petara. (Adat Lewi 18:6; Rome 1:26, 27: 1 Korint 6:9, 10) Enti saduai enda jadi melaki bini tang sama diau, sida patut besara tauka nikah dalam undang-undang.—Hebrew 13:4.

Petara begedi ka pemabok, ngenchuri, bejudi, enggau kereja kasar

3. Bula, Bejudi, Ngenchuri: Petara Jehovah enda tau bula. (Titus 1:2) Orang ti deka dikemendar ka iya mesti nyeliah ka bula. (Jako Dalam 6:16-19; Kolosi 3:9, 10) Sebarang gaya bejudi nya dipetik pengerangka. Nya alai orang Kristian enda enggau dalam macham judi, baka loteri, lumba kuda, enggau bingo. (Epesus 5:3-5) Lalu orang Kristian enda ngenchuri. Sida enda meli barang ti endang ditemu kena churi tauka ngambi enda ari kemendar.—Pemansut 20:15; Epesus 4:28.

4. Marah, Kereja Kasar: Marah enda ditagang tau ngujong ka kereja kasar. (Pemungkal 4:5-8) Orang ti kasar enda tau nyadi pangan Petara. (Masmor 11:5; Jako Dalam 22:24, 25) Iya nya salah malas tauka malas penyai enggau utai jai ti deka dikereja orang ngagai kitai.—Jako Dalam 24:29; Rome 12:17-21.

5. Puchau enggau Pengawa Bemanang: Sekeda orang manggil kuasa roh kena nguji ngerai ka penyakit. Sekeda muchau ka munsoh sida ngasoh sida sakit tauka indah deka munoh sida. Kuasa di belakang semua pengawa tu nya Sitan. Nya alai orang Kristian mesti anang enggau dalam sebarang tu. (Ulang Adat 18:9-13) Besemak ngagai Jehovah nya jaga ti pemadu manah ari puchau ti tau dituju orang bukai ba kitai.—Jako Dalam 18:10.

6. Pemabok: Enda salah ngirup ai anggor mimit, beer, tauka arak. (Masmor 104:15; 1 Timoti 5:23) Tang kelalu maioh ngirup enggau pemabok nya salah ba mata Petara. (1 Korint 5:11-13; 1 Timoti 3:8) Ngirup kelalu maioh tau ngerusak pengerai nuan lalu ngachau kita sabilik. Iya tau mega ngasoh nuan nundok jampat bendar ba penguji ti bukai.—Jako Dalam 23:20, 21, 29-35.

7. Orang ti ngereja utai ti dipadah Petara jai deka “enda bempu Perintah Petara.” (Galatia 5:19-21, NW) Enti nuan endang rindu ka Petara enggau deka ngeyamai ka ati iya, nuan ulih ngelepas ka diri ari semua pengawa tu. (1 John 5:3) Belajar begedi ka utai ti dipadah Petara jai. (Rome 12:9) Begulai enggau orang ti lurus pendiau. (Jako Dalam 13:20) Sulu orang Kristian ti tuai agi bulu nyadi penatai tulong. (James 5:14) Lebih agi, bepanggai atas tulong Petara ngena sembiang.—Pilipi 4:6, 7, 13.

Copyright © 2006 Watch Tower Bible and Tract Society of Pennsylvania. All rights reserved.