Pengarap enggau Adat ti Ngeransi Petara

Petara ukai Triniti

1. Ukai semua pengarap enggau adat nya jai. Tang Petara enda ngemendar ka sida enti sida datai ari pengarap ti bula tauka ngelaban ajar Bup Kudus.—Matthew 15:6.

2. Triniti: Kati Jehovah nya Triniti—tiga iko orang dalam Petara siko? Enda! Jehovah, ti Apai, nya “Petara ti bendar siko aja.” (John 17:3; Mark 12:29) Jesus nya Anak tuai Iya, lalu iya di baroh Petara. (1 Korint 11:3) Apai besai agi ari Anak. (John 14:28) Roh kudus nya ukai orang; iya nya kuasa aktif Petara.—Pemungkal 1:2; Kereja Rasul 2:18.

Krismas enggau Easter datai ari pengarap ti bula jeman kelia

Nadai kebuah nyembah orang ti mati tauka takut ka sida

3. Krismas enggau Easter: Jesus ukai ada maia Disember 25. Iya ada kira ba Oktober 1, maia taun leboh pengibun bedus nganjong kaban jelu keluar leboh malam hari. (Luke 2:8-12) Jesus nadai kala ngasoh orang Kristian ngintu pengada iya. Tang, iya madah ngagai murid iya mela kena ngingat, tauka ngingat ka, pemati iya. (Luke 22:19, 20) Krismas enggau adat nya datai ari pengarap ti bula jeman kelia. Baka nya mega adat Easter, baka ti ngena telu enggau rabbit. Orang Kristian ti dulu agi enda ngintu Krismas tauka Easter, pia mega orang Kristian ti bendar kamaia hari tu.

4. Hari Pengada: Semina dua kali ngintu hari pengada disebut dalam Bup Kudus nya diintu orang ti enda nyembah Jehovah. (Pemungkal 40:20-22; Mark 6:21, 22, 24-27) Orang Kristian ti dulu agi enda ngintu hari pengada. Adat ngintu hari pengada datai ari pengarap ti bula jeman kelia. Orang Kristian ti bendar meri pemeri lalu sama ngelantang maia bukai sepemanjai taun nya.

5. Takut ka Orang ti Mati: Orang ti mati nadai nemu ngereja utai agi tauka ngasai utai. Kitai enda ulih nulong sida, lalu sida enda ulih nganu kitai. (Masmor 146:4; Pengajar 9:5, 10) Semengat mati; iya nadai agi idup lepas pemati. (Esekiel 18:4) Tang kadang-kadang melikat ti jai, dikumbai antu, ngaga diri nyadi roh orang ti mati. Sebarang adat ti bisi kaul enggau penakut ka tauka sembah ba orang ti udah mati nya salah.—Isaiah 8:19.

6. Regang: Jesus nadai mati atas regang. Iya mati ba tiang, tauka turus kayu. Leka jako bansa Gerika disalin “regang” dalam Bup Kudus reti nya sebatang ramu. Tanda regang datai ari pengarap ti bula jeman kelia. Regang nadai dikena tauka disembah orang Kristian ti dulu agi. Nya alai, kati pikir nuan nya betul ngena regang dalam sembah?—Ulang Adat 7:26; 1 Korint 10:14.

7. Nyangka nya pedis deka muai sekeda pengarap enggau adat tu. Kaban belayan enggau pangan deka nguji mai nuan enda nukar pengarap nuan. Tang ngenyamai ka ati Petara lebih berat ari ngenyamai ka ati mensia.—Jako Dalam 29:25; Matthew 10:36, 37.

Copyright © 2006 Watch Tower Bible and Tract Society of Pennsylvania. All rights reserved.