Baka Ni Nuan Ulih Nemu Pengarap ti Bendar?

1. Jesus ngemun siti pengarap Kristian ti bendar. Nya alai kamaia hari tu mesti siti aja tuboh, tauka raban, penyembah ti bendar ba Petara Jehovah. (John 4:23, 24; Epesus 4:4, 5) Bup Kudus ngajar madah ka semina mimit orang ba jalai ti sempit nuju ngagai pengidup.—Matthew 7:13, 14.

2. Bup Kudus udah madah ka lepas pemati rasul, ajar ti salah enggau pengawa ti ukai kristian deka belubah tama eklisia Kristian. Mensia deka narit orang ti arap nitih ka sida ukai nitih ka Kristus. (Matthew 7:15, 21-23; Kereja Rasul 20:29, 30) Nya kebuah kitai meda maioh bengkah pengarap ti ngaku diri Kristian. Baka ni kitai ulih ngelala orang Kristian ti bendar?

3. Tanda ti nyulut bendar ka orang Kristian nya sida bisi bendar pengerindu antara sida empu. (John 13:34, 35) Sida enda diajar bepikir ka sida nya manah agi ari orang bansa bukai tauka chura kulit. Enda mega sida diajar begedi ka orang ari menoa bukai. (Kereja Rasul 10:34, 35) Nya alai sida nadai enggau dalam perang. Orang Kristian ti bendar ngira orang bukai baka diri menyadi.—1 John 4:20, 21.

Orang Kristian ti bendar rindu ka orang bukai, masa Bup Kudus, lalu ngajar pasal Perintah Petara

4. Siti agi tanda pengarap ti bendar nya kaban iya balat bendar bebasa ka Bup Kudus. Sida ngaku iya Jako Petara lalu arap ka utai dipadah iya. (John 17:17; 2 Timoti 3:16, 17) Sida ngira Jako Petara lebih berat ari runding tauka adat mensia. (Matthew 15:1-3, 7-9) Sida nguji idup nitih ka Bup Kudus dalam pengidup genap hari. Nya alai sida enda ngajar siti utai lalu ngereja ti bukai.—Titus 1:15, 16.

5. Pengarap ti bendar mesti mega masa nama Petara. (Matthew 6:9) Jesus ngasoh nama Petara, Jehovah, ditemu semua. Orang Kristian ti bendar mesti ngereja nunda nya. (John 17:6, 26; Rome 10:13, 14) Sapa orang dalam raban bansa nuan madah ka orang bukai pasal nama Petara?

6. Orang Kristian ti bendar mesti ngajar pasal Perintah Petara. Jesus ngereja baka nya. Iya selalu bejako ka pasal Perintah. (Luke 8:1) Iya ngasoh murid iya ngajar pesan ti sama tu dalam serata dunya. (Matthew 24:14, 28:19, 20) Orang Kristian ti bendar arap ka semina Perintah Petara deka mai pemaik enggau pengelikun ti bendar ka dunya tu.—Masmor 146:3-5.

7. Murid Jesus mesti nadai kaul ba dunya ti jai tu. (John 17:16) Sida enda masok champor dalam politik dunya enggau laya. Sida nyeliah ka ulah pengawa ti ngemedis, enggau perangai ti sampal dalam dunya. (James 1:27; 4:4) Ulih nuan ngelala siti raban pengarap ba raban bansa nuan ti bisi tanda jalai Kristian ti bendar?

Copyright © 2006 Watch Tower Bible and Tract Society of Pennsylvania. All rights reserved.