Ingai Bo Yesu Kristo?

1. Kiboit Yesu kokuju kwape etunganan lomoyo eroko ebuno akwap. Arai ngesi kesubat losodit loka Edeke, kanukangun nesi enyaritere nges “ekiyai” Okokuke Edeke. (Ikolosain 1:15; Apukokinio 3:14) Yesu nges bon Ikoku esubit Edeke elopet. Itosomat Yawe Yesu keroko erauna atunaanan kwape “ekeswaman loejok” aisub Iboro kere lukokuju kalu kokwap. (Awaragasia 8:22-31; Ikolosain 1:16, 17) Itosomat Edeke nges bobo kwape Ekeraban. Ngun nges enyaritere Yesu “Akirot.”—Yokana 1:1-3; Apukokinio 19:13.

2. Ijukunit Edeke Okoku Ke akwap koipone kalo aisujuluun aijarake akoik naka Mariam. Kanu kangun Yesu amamei papake lotunganan. Nges amamiatatar ka aronus nakirumuna. Ijukunit Edeke Yesu kwap kanuka akiro auni: (1) Aisisianakin oni abeit na ikamunit Edeke (Yokana 18:37), (2) kanu aidar iponesio luka adolit cut ka aiyinakin oni awanyunet tetere itupi (1 Petero 2:21), keda (3) ainakin akeijar kanu alakun oni kotoma adiakar ka atwanare. Kanukinyo akotore nu?—Matayo 20:28.

3. Kanu aipalikin aicorakinet k’Edeke, abu etunganan losodit Adamu kiswama ibore enyarit Ebaibuli “adiakar.” Abu Edeke kotubok nges atwanare. (Ageun 3:17-19) Mam bobo nges adolokini aitemesia k’Edeke, mam bobo nges arai ekadoliton, motimoti komojong, kotwana. Abu Adamu koinak idweke kere adiakar. Ngupengun kimojongia, kidekanakinor, katwakete. Biai do tii elakunere itunga?—Iromayon 3:23; 5:12.

4. Araai Yesu etunganan loadolit kwape Adamu. Mere kwa Adamu, arimarit Yesu Edeke kotoma acodunio naetiono noi noi. Kwangin abu kopedo aijal aijarake nadolit kanu atacia adiakar k’Adamu. Na nges enyarit Ebaibuli kwape “alucet.” Apedorio do alacakin idwe ka Adamu kotoma atubokinio naka atwanare. Ngun kere luibwaikinete aiyuun kec nejai Yesu epedorete adumun aisionio aibucanareta kec kosodete adumun aijar, naman edaun.—1 Timoteo 2:5, 6; Yokana 3:16; Iromayon 5:18, 19.

Akijanakin na ka Yesu emoriarit aisisianakin, Aswam aumonokineta kede aijal akejar kanuwok

5. Kokwap abu Yesu kitangaleunenei luadekasi, isimonik luetege Isinapik ekwam kangolol, itajaru ikatwak da. Kanukinyo eswamaa ngesi aumonokineta? (1) Ajaasi kaitim kotunga luetaritos, ido epuda aingarakin kes. (2) Aumonokineta Ke etodunitos ebe erai ngesi Okoku loka Edeke. (3) Etodunitos nuebuni ngesi aiswamaikin itunga luerimaritos nges kegeya aipugaa kwape Ekabaka lokakwap.—Matayo 14:14; Marako 2:10-12; Yokana 5:28, 29.

6. Abu Yesu kotwana ido kitijaru Edeke nges kwape esubuna ke lomoyo, ido kobongo toma akuj. (1 Petero 3:18) Ageun kangin, kitarau Edeke nges Ekabaka. Edodor Yesu abunere alemar aronis ka aitaritoi kotoma akwap kana.—Isabulin 37:9-11; Awaragasia 2:21, 22.

Copyright © 2006 Watch Tower Bible and Tract Society of Pennsylvania. All rights reserved.