Ingai Bo Ekejodijodon?

1. Akirot “ekejodijodon” apolouke nges itunganan yen inera akiro nueroko nuaisab amoritor ice. “Satani” apolouke loasurup arai eketepegan. Kwayen enyaritere lokasurup k’Edeke loingarenit. Kageunet arai nges emalaika lokadolit kokoju kede Edeke. Asokonyet; kokau abu kiturokin kosodi akotokin aima nabeit Edeke bon.—Matayo 4:8-10.

2. Emalaika lo, Satani, abu kiner nejai Keba itosamai emun. Kanu alimokin nges nuka aisab, abu koinak nges aipalikin Edeke. Abu do Satani kosurok “Akabakanut” Edeke arai adoketaitke kwape loejai Kuju Kakuju. Abu do Satani ingit arai caat ipugai Edeke oipone loejok kede kisiyalamikinite lu ipugat Ngesi. Abu bobo Satani koyau abuonokin arai caat epedori idio tunganan asalakin enonokikinit Edeke. Kanu aswam nu, abu Satani oraun lokasurup Edeke. Nges do araunor ngesi loenyaritai Satani Ekejodijodon.—Ageun 3:1-5; Yob 1:8-11; Apukokinio 12:9.

3. Etamit Satani aingalaikin itunga toma aima nges. (2 Ikorinton 11:3, 14) Erot ediopet loingalaa ngesi itunga nges idiinin lukaisab. Araai isisianakini edini aisab nukamunit Edeke, ijaanakin ediini ngon alosikineta ka Satani. (Yokana 8:44) Itunga luejaas odiinin lukaisab, aticepak iyunitos cut ebe ijanakinete Edeke lokabeit. Konye ijanakinete cut Satani. Erai ngesi “edeke lokakwap kana.”—2 Ikorinton 4:4.

Idiinin lukasab, Ecudet, kede aitopolorit akwap etapaa itunga

4. Ecudet nges erot ecie loeyaununa Satani itunga kwapke. Acepak enyaraununete itunga imoyon aidar kesi, asurokin icie, aidwar nuepote arai aswam aumokineta. Satani nges ijaikini agongong na nakaronon aswamisio nu kere. Kanu aisialamikin Edeke, ibusakinit oni ainac aiswamanar ka ajokin.—Ikisila 18:10-12; Aswamisio 19:18, 19.

5. Itapanari Satani itunga kotoma opoget lokatekerin ka aima igurupun nuka apugan. Ice eomitos ebe akecekwap arai atekerkec ikeikina adepar nuce. Konye nu mam eraasi abeit. (Aswamisio 10:34, 35) Icetunga emunokina nejaasi atukono nuka apugan. Kanu aswam nu’ egiritos kesi Ajakanut k’Edeke. Naa bon erai abongokinet naka atiokisio wok.—Daniel 2:44.

Kogirok Satani kotoma anyikokin aisisia nuikamunito Yawe

6. Erot eice loitapanara Satani itunga nges acodunun kes kede aomisio nueroko. Elimokinit oni Yawe ainac aswamisio nueroko naarai ejeni ngesi ebe emunarete oni. (Igalatian 6:7, 8) Icie tunga ekotosi ijo aimorikin kakes kotoma aswamisio ngun. Kiitu ebe erai Satani nges ekoto ijo aswam iboro ngun lueroko.—1 Ikorinton 6:9, 10; 15:33.

7. Epedori Satani aitosom areyio arai aitepegio kainakina ijo ajalakin aijaanakin Yawe. Ice kaluminankon epedorete anyunyurikin ijo noi kanu isisia ijo Ebaibuli. Ice epedorete akwenar ijo. Konye akan kangai bo esipori aijaarkon? Ekoto Satani aitukurian ijo tetere ijo ijalakin aisisia nuikamunito Yawe. Siri icamak Satani aitelekar! (Matayo 10:34-39; 1 Petero 5:8, 9) Kigirok ijo Ekejodijodon, isiyalamikini ijo Yawe ido itoduni ijo ebe igangit ijo Akepugan.—Awaragasia 27:11.

Copyright © 2010 Watch Tower Bible and Tract Society of Pennsylvania. All rights reserved.