Ania a Talaga ti Isursuro ti Biblia?

AGBASAKA iti diario. Agbuyaka iti telebision, wenno dumngegka iti radio. Nakaad-adu dagiti damag maipapan iti krimen, gubat, ken terorismo! Panunotem dagiti bukodmo a parikut. Nalabit agpaspasanaangka gapu iti sakit wenno ipapatay ti patpatgem iti biag. Mabalin a mariknam ti kas iti narikna ti naimbag a tao a ni Job, a nagkuna nga isu ket “nalapunos iti rigat.”—Job 10:15, The Holy Bible in the Language of Today.

Isaludsodmo iti bagim:

• Kastoy kadi ti pagayatan ti Dios kaniak ken iti amin a tao?
• Pakasarakak iti tulong tapno maparmek dagiti parikutko?
• Adda kadi namnama a makitatayonto ti talna ditoy daga?

Naglaon ti Biblia kadagiti makapnek a sungbat dagitoy a saludsod.

ISURSURO TI BIBLIA A TI DIOS IYEGNANTO DAGITOY A PANAGBALBALIW DITOY DAGA.

“Punasennanto ti amin a lua kadagiti matada, ket awanton ni patay, awanto metten ti panagleddaang wenno panagsangit wenno ut-ot.”—Apocalipsis 21:4

“Kumalay-atto daydiay pilay a kas iti panagkalay-at ti kalakian nga ugsa.”—Isaias 35:6

“Maluktanto ti matmata dagidiay bulsek.”— Isaias 35:5

“Amin dagidiay adda kadagiti pakalaglagipan a tanem . . . rummuarda.”—Juan 5:28, 29

“Awanto ti agtataeng nga agkuna: ‘Masakitak.’”—Isaias 33:24

“Maaddanto ti naruay a bukbukel iti daga.”— Salmo 72:16

MAKAGUNGGONA KENKA TI ISURSURO TI BIBLIA

Dimo koma pagarupen a dagiti naipakita a ladawan ket arapaap laeng. Inkari ti Dios nga aramidennanto dagita, ket ilawlawag ti Biblia no kasano.

Ngem saan la a dayta ti maitulong ti Biblia. Ipaayna ti tulbek tapno matagiragsakmo ti pudpudno a makapnek a biag uray ita. Panunotem iti apagbiit dagiti pakaringgoram ken parikutmo, kas iti kuarta, problema iti pamilia, sakit, wenno ipapatay ti patpatgem. Matulongannaka ti Biblia a mangsaranget kadagiti parikut iti agdama, ken mangted dayta iti liwliwa babaen ti panangsungbatna kadagiti saludsod a kas kadagitoy:

• Apay nga agsagsagabatayo?
• Kasanotayo a marisut dagiti parikut iti biag?
• Kasanotayo a mapagbalin a naragragsak ti biag ti pamiliatayo?
• Ania ti mapasamak kadatayo no mataytayo?
• Makitatayonto kadi manen dagiti pimmusay nga ipatpategtayo iti biag?
• Kasanotayo a masigurado a tungpalento ti Dios dagiti karina iti masanguanan?

Ti panangbasam iti daytoy a libro ipakitana a kayatmo a maammuan no ania ti isursuro ti Biblia. Matulongannaka daytoy a libro. Kas makitam, addaan dagiti parapo kadagiti kaibatoganda a saludsod iti baba ti panid. Magusgustuan dagiti minilion a tattao ti makipagadal iti Biblia kadagiti Saksi ni Jehova babaen ti saludsod-ken-sungbat a pamay-an. Namnamaenmi a magustuam met. Sapay koma ta bendisionannaka ti Dios bayat a tagiragsakem ti makapagagar ken makagunggona a panagadal iti pudno nga isursuro ti Biblia!

KABESADUEM TI BIBLIAM

ADDA 66 a libro ken surat a mangbukel iti Biblia. Nabingaybingay dagitoy kadagiti kapitulo ken bersikulo a panglakaan iti panangbirok kadagiti teksto. No madakamat dagiti teksto iti daytoy a publikasion, ti kapitulo ti libro ti Biblia wenno surat ti tuktukoyen ti umuna a numero kalpasan ti nagan, ket ti bersikulo ti tuktukoyen ti sumaruno a numero. Kas pagarigan, ti “2 Timoteo 3:16” kaipapananna ti maikadua a surat ken ni Timoteo, kapitulo 3, bersikulo 16.

Nalaka a makabesadom ti Biblia no kitaem dagiti teksto a nadakamat iti daytoy a publikasion. Kasta met, apay a dimo irugi a basaen ti Biblia iti inaldaw? No agbasaka iti tallo agingga iti lima a kapitulo iti tunggal aldaw, mabasam ti intero a Biblia iti makatawen.