Opisial a Web Site Dagiti Saksi ni Jehova

Dagiti Saksi ni Jehova—Siasinoda? Ania ti Patpatienda?

Ania ti Patpatienda?

MAMATI dagiti Saksi ni Jehova iti Mannakabalin-amin a Dios, a ni Jehova, ti Namarsua iti langlangit ken iti daga. Ti mismo a kaadda dagiti narikut ti pannakadiseniona a pagsidsiddaawan iti uniberso iti aglikmuttayo ipasimudaagda a pinataud amin ida ti maysa nga intelihente unay ken mannakabalin a Namarsua. No kasano a dagiti gapuanan dagiti tattao ti mangyanninaw kadagiti kualidadda, kasta met laeng no maipapan ken Jehova a Dios. Ibaga kadatayo ti Biblia a “dagiti di makita a kualidadna ket silalawag a makita manipud pannakaparsua ti lubong ken agpatpatuloy, agsipud ta matarusan ida babaen iti bambanag a naaramid.” Kasta met, awanan timek wenno sasao, “ti langlangit idekdeklarada ti dayag ti Dios.”—Roma 1:20; Salmo 19:1-4.

DAGA . . . pinarsua ni Jehova . . . aywanan ti tao . . . pagnaedan iti agnanayon

Dagiti tattao saanda nga agdamili iti burnay wenno agaramid iti telebision ken kompiuter nga awanan panggep. Adayo nga amang a nakaskasdaaw ti daga ken dagiti parsua a mula ken animal nga adda iti dayta. Narigattay a matarusan ti pannakasangal ti natauan a bagi agraman ti trinilion a selulana—uray ti utek nga us-usarentayo nga agpanunot ket di matukod ti kinanakaskasdaawna! No adda panggep dagiti tattao a nangpataud kadagiti nanumnumo a partuatda, sigurado nga adda panggep ni Jehova a Dios kadagiti nakaskasdaaw a parsuana! Kasta ti kunaen ti Proverbio 16:4: “Amin a banag inaramid ni Jehova maipaay iti panggepna.”

Inaramid ni Jehova ti daga agpaay iti maysa a pangep, kas dinakamatna iti immuna a pagassawaan: “Agbungakayo ken agadukayo ket punnuenyo ti daga . . . , pagpasakupenyo dagiti ikan iti baybay ken dagiti agtaytayab a parsua iti langlangit ken tunggal sibibiag a parsua nga aggargaraw iti rabaw ti daga.” (Genesis 1:28) Gapu ta simmukirda, napaay dagitoy nga agassawa a mangpunno iti daga kadagiti nalinteg a pamilia a siaayat koma a mangaywan iti daga ken kadagiti mula ken animal nga adda iti dayta. Ngem ti pannakapaayda saanna a tungdayen ti panggep ni Jehova. Kalpasan ti rinibu a tawen, naisurat ti kastoy: “[Ti] Dios, ti Nangporma iti daga . . . , saanna a pinarsua a maipaay laeng iti awan kapapay-anna.” ‘Binukelna dayta tapno mapagnaedan a mismo.’ Saan a madadael, no di ket “ti daga agtalinaed iti agnanayon.” (Isaias 45:18; Eclesiastes 1:4, The New English Bible) Matungpalto ti panggep ni Jehova iti daga: “Ti pammatigmaanko agtalinaedto, ket isuamin a pakaragsakak aramidekto.”—Isaias 46:10.

Gapuna, mamati dagiti Saksi ni Jehova a ti daga agtalinaed iti agnanayon ket amin a tattao, sibibiag ken natayen, a maikari iti panggep ni Jehova agpaay iti napapintas, mapagnaedan a daga mabalinda ti agbiag nga agnanayon iti dayta. Natawid ti amin a tattao ti kinaimperpekto manipud kada Adan ken Eva ket, ngarud, managbasolda. (Roma 5:12) Ibaga kadatayo ti Biblia: “Dagiti isupapak ti basol isu ti ipapatay.” “Dagiti sibibiag sipapanunotda a mataydanto; ngem no maipapan kadagiti natay, saanda a pulos sipapanunot iti aniaman.” “Ti kararua nga agbasbasol—dayta a mismo matayto.” (Roma 6:23; Eclesiastes 9:5; Ezequiel 18:4, 20) Kasano ngarud nga agbiagda manen tapno mairamanda kadagiti naindagaan a bendision? Babaen laeng iti daton a subbot ni Kristo Jesus, ta kinunana: “Siak ti panagungar ken ti biag. Ti mangwatwat iti pammati kaniak, uray no matay, agbiagto.” “Amin dagidiay adda kadagiti pakalaglagipan a tanem mangngegdanto ti timekna ket rummuarda.”—Juan 5:28, 29; 11:25; Mateo 20:28.

Kasanonto a mapasamak daytoy? Nailawlawag dayta iti “naimbag a damag ti pagarian,” a rinugian ni Jesus nga inwaragawag idi adda ditoy daga. (Mateo 4:17-23) Ngem, ita, naisangsangayan unay a pamay-an ti panangikasaba dagiti Saksi ni Jehova iti naimbag a damag.

NO ANIAT’ PATPATIEN DAGITI SAKSI NI JEHOVA

Patpatienda	Nainkasuratan a Rason
Ti Biblia ket Sao ti Dios ken kinapudno	2 Tim. 3:16, 17; 2 Ped. 1:20, 21; Juan 17:17
Ad-adda a mapagtalkan ti Biblia ngem ti tradision	Mat. 15:3; Col. 2:8
Jehova ti nagan ti Dios	Sal. 83:18; Isa. 26:4; 42:8, AS; Ex. 6:3
Ni Kristo ket Anak ti Dios ken nababbaba ngem Isu	Mat. 3:17; Juan 8:42; 14:28; 20:17; 1 Cor. 11:3; 15:28
Ni Kristo ti inauna kadagiti pinarsua ti Dios	Col. 1:15; Apoc. 3:14
Natay ni Kristo iti kayo, saan nga iti krus	Gal. 3:13; Ara. 5:30
Ti natauan a biag ni Kristo ket naibayad kas subbot agpaay iti natulnog a tattao	Mat. 20:28; 1 Tim. 2:5, 6; 1 Ped. 2:24
Umdasen ti naminsan a pannakaidaton ni Kristo	Roma 6:10; Heb. 9:25-28
Napagungar ni Kristo manipud kadagiti natay kas imortal nga espiritu a persona	1 Ped. 3:18; Roma 6:9; Apoc. 1:17, 18
Iti espiritu ti kaadda ni Kristo	Juan 14:19; Mat. 24:3; 2 Cor. 5:16; Sal. 110:1, 2
Addatayon iti ‘tiempo ti panungpalan’	Mat. 24:3-14; 2 Tim. 3:1-5; Luc. 17:26-30
Ti Pagarian iti sidong ni Kristo iturayannanto ti daga iti kinalinteg ken kinatalna	Isa. 9:6, 7; 11:1-5; Dan. 7:13, 14; Mat. 6:10
Itdento ti Pagarian ti nasayaat a panagbiag ditoy daga	Sal. 72:1-4; Apoc. 7:9, 10, 13-17; 21:3, 4
Ti daga dinto pulos madadael wenno agongaong	Ecl. 1:4; Isa. 45:18; Sal. 78:69
Ti Dios pukawenna ti agdama a sistema ti bambanag inton gubat ti Har–Magedon	Apoc. 16:14, 16; Sof. 3:8; Dan. 2:44; Isa. 34:2; 55:10, 11
Dagiti nadangkes ti agnanayonton a madadael	Mat. 25:41-46; 2 Tes. 1:6-9
Dagiti tattao nga anamongan ti Dios umawatdanto iti biag nga agnanayon	Juan 3:16; 10:27, 28; 17:3; Mar. 10:29, 30
Maymaysa laeng ti dalan nga agturong iti biag	Mat. 7:13, 14; Efe. 4:4, 5
Ti ipapatay ti tao ket bunga ti basol ni Adan	Roma 5:12; 6:23
Saan nga agtultuloy nga agbiag ti natauan a kararua iti ipapatay	Ezeq. 18:4; Ecl. 9:10; Sal. 6:5; 146:4; Juan 11:11-14
Ti impierno ket kadawyan a tanem ti sangatauan	Job 14:13, Dy; Apoc. 20: 13, 14, AV (margin)
Ti namnama dagiti natay ket panagungar	1 Cor. 15:20-22; Juan 5:28, 29; 11:25, 26
Mapukawto ti Adamiko nga ipapatay	1 Cor. 15:26, 54; Apoc. 21:4; Isa. 25:8
Bassit nga ipastoran laeng a 144,000 ti mapan idiay langit ken makipagturay ken Kristo	Luc. 12:32; Apoc. 14:1, 3; 1 Cor. 15:40-53; Apoc. 5:9, 10
Ti 144,000 ket nayanak manen kas naespirituan nga annak ti Dios	1 Ped. 1:23; Juan 3:3; Apoc. 7:3, 4
Naaramid ti baro a tulag iti naespirituan nga Israel	Jer. 31:31; Heb. 8:10-13
Ti kongregasion ni Kristo ket naibangon kenkuana a mismo	Efe. 2:20; Isa. 28:16; Mat. 21:42
Ni Jehova laeng ti masapul a pakaiturongan dagiti kararag baeten ken Kristo	Juan 14:6, 13, 14; 1 Tim. 2:5
Saan a rumbeng ti panagusar kadagiti ladawan iti panagdaydayaw	Ex. 20:4, 5; Lev. 26:1; 1 Cor. 10:14; Sal. 115:4-8
Masapul a liklikan ti espiritismo	Deut. 18:10-12; Gal. 5:19-21; Lev. 19:31
Ni Satanas ti di makita nga agturay iti lubong	1 Juan 5:19; 2 Cor. 4:4; Juan 12:31
Rumbeng a di makipaset dagiti Kristiano kadagiti mobimiento a panaglalaok iti pammati	2 Cor. 6:14-17; 11:13-15; Gal. 5:9; Deut. 7:1-5
Ti maysa a Kristiano masapul nga agtalinaed a naisina iti lubong	Sant. 4:4; 1 Juan 2:15; Juan 15:19; 17:16
Agtulnog kadagiti linteg ti tao a di maikontra kadagiti linteg ti Dios	Mat. 22:20, 21; 1 Ped. 2:12; 4:15
Ti panangipastrek iti dara iti bagi babaen iti ngiwat wenno ur-urat ket maisalungasing kadagiti linteg ti Dios	Gen. 9:3, 4; Lev. 17:14; Ara. 15:28, 29
Dagiti moral a pagalagadan ti Biblia ket masapul a tungpalen	1 Cor. 6:9, 10; Heb. 13:4; 1 Tim. 3:2; Prov. 5:1-23
Israel laeng ti nabilin a mangngilin iti Sabbath ken naikanunong iti Linteg Mosaiko a nagpatingga	Deut. 5:15; Ex. 31:13; Roma 10:4; Gal. 4:9, 10; Col. 2:16, 17
Ti klase klero ken dagiti naisangsangayan a titulo ket di umiso	Mat. 23:8-12; 20:25-27; Job 32:21, 22
Ti tao saan a bunga ti ebolusion no di ket naparsua	Isa. 45:12; Gen. 1:27; Mat. 19:4
Nangipaay ni Kristo iti ulidan a masapul a suroten iti panagserbi iti Dios	1 Ped. 2:21; Heb. 10:7; Juan 4:34; 6:38
Ti bautismo babaen ti naan-anay a pannakaitaneb isimbolona ti dedikasion	Mar. 1:9, 10; Juan 3:23; Ara. 19:4, 5
Siraragsak dagiti Kristiano a mamaneknek iti publiko maipapan iti Nainkasuratan a kinapudno	Roma 10:10; Heb. 13:15; Isa. 43:10-12

Naipablaak iti 2001