Yesu Kirista ye jɔn lo ye?

1. Sanni Yesu ka na dugukolo kan, a hakililama tun be ɲɛnamaya la sankolo la. A tun ye Ala ka danfɛn fɔlɔ ye, o kama a be weele Ala dencɛ “fɔlɔ bangelen” (Kolesekaw 1:15; Jirali 3:14). Yesu ye dencɛ kelenpe ye Ala yɛrɛ ye min dan. Sanni Yesu ka kɛ hadamaden ye, Jehova y’a ta i ko a ka “baarakɛla kuntigi” tuma min na a be fɛɛn bɛɛ danna sankolo la ani dugukolo kan (Ntalenw 8:22-31, NW; Kolosekaw 1:16, 17). Ala y’a ta fana i ko A ka kuma lasebaga kuntigi. O lo y’a to Yesu be weele “Kuma”.—Yuhana 1:1-3; Jirali 19:13.

2. Ala y’a dencɛ ci ka na dugukolo kan, a kɛtɔ k’a niin ta sankolo la k’a don Mariyama wolonugu la. O cogo la, Yesu facɛ ma kɛ hadamaden ye. O lo y’a to a ma jurumu wala dafabaliya si cɛn ta. Ala y’a dencɛ ci ka na dugukolo kan kuun saba lo la: (1) Ka tiɲɛn kalan an ye Ala koo la (Yuhana 18:37), (2) ka kantigiya dafalen mara, o min be kɛ ɲɛyirali ye an fɛ (1 Piɛre 2:21), ani (3) k’a niin di saraka ye walisa k’an hɔɔrɔnya ka bɔ jurumu ni saya bolo. Mun na o tun ye waajibi ye?—Matiyu 20:28.

3. Cɛɛ fɔlɔ Hadama ye Ala ka cikan bila. A ye min kɛ, Bibulu b’o weele “jurumu”. O kama, Ala ye saya kiti tigɛ a kan (Jenɛse 3:17-19). Min waajibiyara a ma, komi a tun tɛ suma k’o bɔ tugun, a dafalen tun tɛ tugun. Dɔɔni dɔɔni a kɔrɔla ka sa. Hadama ye jurumu di a deenw bɛɛ ma. O lo y’a to an fana be kɔrɔ, an be bana, an be sa. Cogo juman na hadamadenw tun be se ka kisi?—Romɛkaw 3:23; 5:12.

4. Yesu tun ye mɔgɔ dafalen ye tigitigi i ko Hadama. Nka min b’u cɛ, Yesu ye Ala kanminɛ ka dafa hali kɔrɔbɔli juguman bɛɛ la. O kosɔn a tun be se k’a hadamaden niin dafalen saraka ka Hadama ka jurumu sara. Bibulu b’o lo weele ko “kumabɔsara”. O tuma, hadamadenw tun be se ka hɔɔrɔnya ka bɔ saya jalaki la. Minw bɛɛ be lanaya la Yesu kan, u ka jurumuw be se ka yafa u ye, ani u be se ka ɲɛnamaya banbali sɔrɔ.—1 Timote 2:5, 6; Yuhana 3:16; Romɛkaw 5:18, 19.

A ka cidenyabaara wagati kɔnɔ, Yesu ye mɔgɔw kalan, ka kabakow kɛ, ani a y’a niin di yɛrɛ an kosɔn

5. Tuma min na a tun be dugukolo kan, Yesu ye banabagatɔw kɛnɛya, ka kɔngɔtɔw ladomuni, ka fɔɲɔbaw mala. A ye suuw yɛrɛ lakunun. Mun na a ye kabakow kɛ? (1) A tun be hinɛ mɔgɔ tɔɔrɔlenw na ani a tun b’a fɛ k’u dɛmɛ. (2) A ka kabakow kɛra seereya ye ko ale tun ye Ala dencɛ ye. (3) A ka kabakow y’a yira a bena min kɛ hadamaden kanminɛbagaw ye tuma min na a bena kɛ Masa ye dugukolo bɛɛ kuun na.—Matiyu 14:14; Marka 2:10-12; Yuhana 5:28, 29.

6. Yesu sara nka Ala y’a lakunun i ko danfɛn hakililama, ani a kɔsegina sankolo la (1 Piɛre 3:18). Kabini o tuma, Ala y’a kɛ Masa ye. Yanni dɔɔni cɛ, Yesu bena kojugu ni tɔɔrɔ bɛɛ bɔ yen dugukolo kan.—Zaburuw 37:9-11; Ntalenw 2:21, 22.

Copyright © 2006 Watch Tower Bible and Tract Society of Pennsylvania. All rights reserved.