Naafigi ye jɔn lo ye?

1. “Naafigi” daɲɛ kɔrɔ ko mɔgɔ min be nkalon juguman tigɛ ka la mɔgɔ wɛrɛ kan. “Sitanɛ” kɔrɔ ko i jugu wala i kɛlɛbaga. O daɲɛw lara Ala ka juguw kuntigi kan. Fɔlɔ, a tun ye mɛlɛkɛ dafalen ye Ala kɛrɛfɛ sankolo la. Nka o kɔfɛ, a yadara ani a ɲɛbɔra batoli fɛ k’a masɔrɔ Ala lo ka kan ni batoli ye.—Matiyu 4:8-10.

2. O mɛlɛkɛ, Sitanɛ, kumana Hawa fɛ saa dɔ sababu fɛ. A ka nkalon kumaw fɛ, a ye Hawa sɔrɔ a ka Ala kan bila. O cogo la, Sitanɛ ye min kɛlɛ, o be weele Ala ka “masabaya” wala a Kɔrɔtalenba lɔyɔrɔ. Sitanɛ ye sɔsɔli lawuli ko Ala tɛ mara kɛ koɲuman ani ko a b’a danfɛnw jɛn fɛɛn ɲuman dɔ la. Sitanɛ ye sigasigaliw fana lawuli ko Hadamaden si tɛna to kantigiya la Ala ta fan fɛ. O koo kɛtɔ, Sitanɛ y’a yɛrɛ kɛ Ala ka jugu ye. O kama, a sɔrɔla ka weele ko Sitanɛ Naafigi.—Jenɛse 3:1-5; Job 1:8-11; Jirali 12:9.

3. Sitanɛ b’a ɲini ka mɔgɔw nɛgɛn u k’ale bato (2 Kɔrɛntekaw 11:3, 14). A ka fɛɛrɛ dɔ ye ngalon diinan ye. Ni diinan dɔ be nkalon kalan kɛ Ala koo la, tiɲɛn na a be Sitanɛ lo sagonata kɛ (Yuhana 8:44). Nkalon diinandenw b’a miiri ni kɔnɔnagwɛ ye k’u be tiɲɛn Ala lo batora. Nka tiɲɛn na, u be baara kɛla Sitanɛ lo ye. Ale lo ye ‘duniɲa nin ka ala’ ye.—2 Kɔrɛntekaw 4:4, NW.

Ngalon diinan, hakilimaaweeleli, ani faso wasoya be mɔgɔw lafili

4. Hakilimaaweeleli ye fɛɛrɛ wɛrɛ ye Sitanɛ be tɛmɛ min fɛ ka mɔgɔ bila a yɛrɛ fanga jukɔrɔ. Mɔgɔ dɔw be hakilimaaw weele k’u yɛrɛ tanga koo ma, ka kojugu kɛ mɔgɔ wɛrɛ la, ka sini koow fɔ, wala ka kabakow kɛ. Sitanɛ lo ye fanga juguman ye min be nin kɛcogoyaw bɛɛ kɔ fɛ. N’an b’a fɛ k’an koo diya Ala ye, an seen man kan ka sɔrɔ hakilimaaweeleli koo si la.—Dutɛrɔnɔmɛ 18:10-12; Kɛwalew 19:18, 19.

5. Sitanɛ be mɔgɔw lafili fana a kɛtɔ k’u lasu u ka waso u ka siya la wala u ka politiki jɛkuluw bato. Dɔw b’a miiri k’u faso wala u siya ka fisa ni tɔw ye. Nka o tɛ tiɲɛn ye (Kɛwalew 10:34, 35). Dɔ wɛrɛw bolo lalen be politiki jɛkuluw kan ka hadamadenw ka kunkow ɲɛnabɔ. O kɛtɔ, u be Ala ka Masaya fili. O kelenpe lo ye an ka kunkow ɲɛnabɔla ye.—Daniɛl 2:44.

I k’i lafasa Sitanɛ ma i kɛtɔ k’i ka kalan lataga ɲɛ Jehova koo la

6. Sitanɛ be mɔgɔw lafili fana a kɛtɔ k’u kɔrɔbɔ jurumutɔya negew fɛ. Jehova ko an ka ban jurumutɔya kɛcogoyaw la sabu a y’a lɔn k’u bena bɔnɛ lase an ma (Galasikaw 6:7, 8). Mɔgɔ dɔw be se k’a ɲini i fɛ i ka fara u kan o kɛcogoyaw la. Nka i hakili to a la ko tiɲɛn na, Sitanɛ lo b’a fɛ i k’o koow kɛ.—1 Kɔrɛntekaw 6:9, 10; 15:33.

7. Sitanɛ be se ka tɛmɛ kɔrɔbɔli wala bali fɛ walisa i ka Jehova bila. I ka mɔgɔ kanulen dɔw be se ka dimi kɔsɔbɛ i kɔrɔ katuguni i be Bibulu kalanna. Wala dɔ wɛrɛw bena i yɛlɛ. Nka jɔn lo ye ɲɛnamaya di i ma? Sitanɛ b’a fɛ k’i bagabaga janko i k’a lalɔ ka lɔnniya sɔrɔ Jehova koo la. I kan’a to Sitanɛ ka see sɔrɔ i kan (Matiyu 10:34-39; 1 Piɛre 5:8, 9)! I kɛtɔ k’i yɛrɛ lafasa Naafigi ma, i bena Jehova nisɔndiya ani i bena a yira k’i b’a ka masabaya kɔ.—Ntalenw 27:11.

Copyright © 2006 Watch Tower Bible and Tract Society of Pennsylvania. All rights reserved.