Ala sagonata ye mun ye dugukolo koo la?

1. Nin dugukolo nin danna Jehova fɛ walisa hadamadenw ka ɲɛnamaya diya bɔ a kan fɔɔ abada. A tun b’a fɛ dugukolo ka kɛ mɔgɔ tilennenw ka sigiyɔrɔ ye, u ka kɛ hɛɛrɛ la kudayi kama (Zaburuw 115:16; Esayi 45:18). Dugukolo tɛna halaki abada, a bena to yen kudayi.—Zaburuw 104:5; Eklesiaste 1:4.

2. Sanni a ka mɔgɔ dan, Ala ye yɔrɔ fitinin dɔ sugandi dugukolo kan ani A y’o kɛ alijana cɛɲumanba dɔ ye. A y’o yɔrɔ weele Eden nankɔ. A ye cɛɛ ni muso fɔlɔw, Hadama ni Hawa, bila yen. Ala sagonata tun ye u ka deenw sɔrɔ ani ka dugukolo bɛɛ fa. Dɔɔni dɔɔni, u tun bena dugukolo bɛɛ kɛ alijana ye.—Jenɛse 1:28; 2:8, 15.

Alijana tununa

3. Hadama ni Hawa tugura ka Ala ka sariya bila. O la, u ye jurumu kɛ. O kama, Jehova y’u gwɛn ka bɔ Eden nankɔ la. Alijana tununa (Jenɛse 3:1-6, 23). Nka Jehova ma ɲinɛ a sagonata kɔ dugukolo nin ta fan fɛ. A ye lahidu ta k’a yɛlɛma ka kɛ alijana ye, yɔrɔ min na hadamadenw bena ɲɛnamaya kɛ fɔɔ abada. A bena o kɛ cogo juman na?—Zaburuw 37:29.

4. Sanni dugukolo nin ka se ka kɛ alijana ye, mɔgɔ juguw ka kan ka bɔ yen (Zaburuw 37:38). O bena kɛ Harmagedɔn tuma: O ye Ala ka kɛlɛ ye, min bena kojugu ban. O kɔ, Sitanɛ bena bila kaso kɔnɔ saan 1 000. O kɔrɔ ko mɔgɔ jugu si tɛna to yen ka dugukolo tiɲɛ. Ala ka sagokɛlaw dɔrɔn lo bena kisi.—Jirali 16:14, 16; 20:1-3.

5. O tuma, Yesu Kirista bena kɛ dugukolo Masa ye saan 1 000 kɔnɔ (Jirali 20:6). Dɔɔni dɔɔni, a bena jurumu bɔ an hakiliw n’an fariw la. An bena kɛ mɔgɔ dafalenw ye i n’a fɔ Hadama ni Hawa cogo sanni u ka jurumu kɛ. O tuma, bana, kɔrɔya ani saya tɛna kɛ yen tugun. Banabagatɔw bena kɛnɛya ani mɔgɔ kɔrɔw bena segi ka kɛ denmisɛnw ye tugun.—Job 33:25; Esayi 33:24; Jirali 21: 3, 4.

6. Yesu ka saan Waa Kelen mara kɔnɔ, hadamaden kantigimaw bena dugukolo baara k’a kɛ alijana ye (Luka 23:43). Ka fara o kan, mɔgɔ salen miliyɔn caaman bena kunun ka ɲɛnamaya kɛ dugukolo kan (Kɛwalew 24:15). Ala be min ɲini u fɛ, n’u y’o kɛ, u bena to ɲɛnamaya la dugukolo kan fɔɔ abada. N’o tɛ, u bena halaki ka bɔ yen kudayi.—Yuhana 5:28, 29; Jirali 20:11-15.

7. O cogo la, dugukolo ta fan fɛ, Ala sagonata fɔlɔ bena dafa. Yala i b’a fɛ ka dɔ sɔrɔ o duga nataw la wa? N’i ko ɔnhɔn, i ka kan ka timinandiya ka lɔnniya sɔrɔ Ala koo la, ani ka koow kɛ Ala be minw ɲini i fɛ. Min bena i dɛmɛ k’o kɛ, o ye n’i be taga lajɛn kɛ ni Jehova Seerew ye u ka Masaya Boon kɔnɔ min be i sigida la.—Esayi 11:9; Heburuw 10:24, 25.

Harmagedɔn kɔfɛ, dugukolo bena kɛ alijana ye

Copyright © 2006 Watch Tower Bible and Tract Society of Pennsylvania. All rights reserved.