Ala ka Masaya ye mun ye?

1. Tuma min na a tun be dugukolo kan, Yesu y’a ka kalandenw kalan u ka delili kɛ Ala ka Masaya koo la. Masaya ye gɔfɛrɛnaman dɔ ye, min kuntigiya be masacɛ dɔ bolo. Ala ka Masaya ye gɔfɛrɛnaman dɔ ye min be dan na. A sigilen be sankolo la, ani a bena dugukolo nin mara. A bena Ala tɔgɔ saniya, wala k’a senuya. A bena kɛ sababu ye Ala sago ka kɛ dugukolo kan i ko a be kɛ sankolo la cogo min na.—Matiyu 6:9, 10.

2. Ala tun ye lahidu ta ko Yesu bena kɛ a ka Masaya Masacɛ ye (Luka 1: 30-33). Tuma min na Yesu tun be dugukolo kan, a y’a yira ko a bena kɛ Kuntigi ɲuman, tilennen ani dafalen ye. Tuma min na a kɔsegira sankolo la, a ma sigi Ala ka Masaya masasigilan kan kelen (Heburuw 10:12, 13). Saan 1914 la, Jehova tun ye fanga min lahidu ta Yesu ye, A y’o d’a ma. Kabini o tuma, Yesu ye kuntigiya kɛ sankolo la: Jehova y’a sigi masaya la.—Daniɛl 7:13, 14.

3. Jehova ye cɛɛ ni muso kantigima dɔw sugandi fana dugukolo kan walisa u ka taga sankolo la. U bena kuntigiya kɛ hadamadenw kun na ni Yesu ye i ko masaw, kititigɛlaw, ani sarakalasebagaw (Luka 22:28-30; Jirali 5:9, 10). Olu minw bena kuntigiya kɛ ni Yesu ye a ka Masaya kɔnɔ, Yesu y’u weele ko “saga kuluni”. U ye mɔgɔ 144 000 ye.—Luka 12:32; Jirali 14:1-3.

4. Yesu kɛra Masa ye yɔrɔ min na dɔrɔn, a ye Sitanɛ n’a ka mɛlɛkɛ juguw gwɛn ka bɔ sankolo la k’u fili dugukolo lamini na. O lo kosɔn koow juguyara ten dugukolo kan kabini saan 1914 (Jirali 12:9, 12). Kɛlɛw, kɔngɔbaw, fɔɲɔbanaw, sariya sira bilali be cayara ka taga: Nin bɛɛ ye “tagamasiyɛn” daliluw ye min b’a yira ko Yesu be kuntigiya la ani ko kowsigicogoya nin b’a laban loonw na.—Matiyu 24:3, 7, 8, 12; Luka 21:10, 11; 2 Timote 3:1-5.

5. Yanni dɔɔni cɛ, Yesu bena kiti tigɛ mɔgɔw kan. A bena u fara ka bɔ ɲɔgɔn na i ko sagagwɛnna be sagaw ni baaw fara ka bɔ ɲɔgɔn na cogo min na. “Sagaw” ye mɔgɔw ye minw bena to kantigiya la Yesu ta fan fɛ. U bena ɲɛnamaya banbali sɔrɔ dugukolo kan. “Baaw” ye mɔgɔw ye minw bena ban Ala ka Masaya la (Matiyu 25:31-34, 46). Yanni dɔɔni cɛ, minw bɛɛ bɔlen be baaw fɛ, Yesu bena olu halaki (2 Tesalonikekaw 1:6-9). N’i b’a fɛ ka kɛ Yesu ka “saga” dɔ ye, i ka kan ka Ala ka Masaya cikan lamɛn. Fana, i ye min kalan, i ka kan k’o sira tagama.—Matiyu 24:14.

Yesu ka mara kɔnɔ, kɔniya ni sigaɲɔgɔnnakow tɛna kɛ yen tugun

6. Bi, dugukolo tilannen be ka kɛ jamana caaman ye. U kelen kelen bɛɛ n’a ka gɔfɛrɛnaman lo. Tuma caaman na o jamanaw be ɲɔgɔn kɛlɛ. Nka Ala ka Masaya bena sigi hadamadenw ka gɔfɛrɛnamanw bɛɛ nɔɔ na. Ale kelenpe lo bena dugukolo kuru bɛɛ kuntigiya kɛ (Daniɛl 2:44). O tuma, kɛlɛ, kojugukɛ, ni fariya si tɛna kɛ yen tugun. Mɔgɔ bɛɛ bena sigi ɲɔgɔn fɛ hɛɛrɛ ni kelenya na.—Mise 4:3, 4.

7. Yesu ka saan Waa Kelen mara kɔnɔ, hadamaden kantigimaw bena kɛ mɔgɔ dafalenw ye ani dugukolo bɛɛ bena kɛ alijana ye. O saan Waa Kelen ban tuma na, a bena sɔrɔ Yesu ye Ala ka ci bɛɛ dafa, min tun ɲinina a fɛ. O tuma, a bena Masaya lasegi a Fa ma (1 Kɔrɛntekaw 15:24). Ala ka Masaya bena min kɛ, mun na i t’o baro bɔ i teriw n’i diyanyemɔgɔw ye?

Copyright © 2006 Watch Tower Bible and Tract Society of Pennsylvania. All rights reserved.