I k’i magwɛrɛ Ala la delili fɛ

1. Ka delili kɛ, o ye k’i majigi ka kuma Ala fɛ. I ka kan ka Ala deli tuma bɛɛ. O la, i bena magwɛrɛ a la i ko teri sɔbɛ dɔ. Jehova ka bon kɔsɔbɛ, a sebagaya fana ka bon haali. O bɛɛ n’a ta, a be an ka deliliw lamɛn! Yala i be Ala deli tuma bɛɛ wa?—Zaburuw 65:2; 1 Tesalonikekaw 5:17.

2. Delili ye an ka bato faan dɔ ye. O kama, an ka kan ka Ala, Jehova, kelenpe deli. Tuma min na Yesu tun be dugukolo kan, a tun tɛ dɔ wɛrɛ deli n’a Fa kelenpe tɛ. An ka kan k’o ɲɔgɔn lo kɛ (Matiyu 4:10; 6:9). O bɛɛ n’a ta, an ka deliliw bɛɛ ka kan ka kɛ Yesu tɔgɔ la. O b’a yira ko an be Yesu lɔyɔrɔ bonya ani ko an be lanaya la a ka kumabɔ saraka kan.—Yuhana 14:6; 1 Yuhana 2:1, 2.

3. N’an be delili kɛ, an ka kan ka kuma Ala fɛ n’an dusukun ye. An man kan ka an ka deliliw fɔ an kunfɛ, wala k’u kalan delili kitabu dɔ kɔnɔ (Matiyu 6:7, 8). An be se ka delili kɛ wagati bɛɛ la, yɔrɔ bɛɛ la, ani lɔcogo bɛɛ la, ni bonya b’o lɔcogo la. Ala be se hali ka an dusukunna deliliw mɛn n’an makunnenw lo (1 Samuɛl 1:12, 13). A ka ɲi an ka yɔrɔ lafiyalen dɔ sɔrɔ min mabɔlen be mɔgɔw la k’an tɔgɔla deliliw fɔ.—Marka 1:35.

4. I be se ka delili kɛ fɛɛn jumanw lo kama? A be se ka kɛ fɛɛn o fɛɛn ye min ɲɛsinna e ni Ala cɛ teriya ma (Filipekaw 4:6, 7). Ɲɛyirali delilikan b’a yira ko an ka kan ka delili kɛ Jehova tɔgɔ n’a sagonata koo la. An be se ka delili kɛ fana k’an magoɲɛfɛnw sɔrɔ, walisa an ka jurumuw ka yafa, ani ka dɛmɛ sɔrɔ janko kɔrɔbɔli kana see sɔrɔ an kan (Matiyu 6:9-13). An ka deliliw man kan ka kɛ ni hasiriya ye. Fɛɛn minw bɛnnen be Ala sago ma, an ka kan ka delili kɛ olu dɔrɔn koo la.—1 Yuhana 5:14.

5. I be se ka delili kɛ tuma o tuma n’i dusukun b’i bila ka barika la Ala ye wala k’a tando (1 Tilew Kibaro 29:10-13). I ka kan ka delili kɛ tuma min na kunkow b’i kan ani n’i ka lanaya be kɔrɔbɔli la (Zaburuw 55:23; 120:1). A ka ɲi i ka delili kɛ sanni ka domuni kɛ (Matiyu 14:19). Jehova b’an weele ka delili kɛ “tuma bɛɛ” la.—Efesekaw 6:18.

6. An mago gwɛlɛn b’a la ka delili kɛ n’an ye jurumuba dɔ kɛ. O tuma ɲɔgɔnw na, an ka kan ka Jehova ka hinɛ n’a ka yafa ɲini deliliba kɔnɔ. N’an sɔnna an ka jurumuw ma k’u fɔ Ala ye, ani n’an be an seko kɛ janko an kana segi k’u kɛ, Ala “be sɔn ka yafali kɛ”.—Zaburuw 86:5; Ntalenw 28:13.

7. Jehova be mɔgɔ tilennenw dɔrɔn ka deliliw lamɛn. Walisa Ala k’i ka deliliw lamɛn, fɔɔ i k’i seko bɛɛ kɛ k’i ka ɲɛnamaya kɛcogo bɛn n’ale ka sariyaw ye (Ntalenw 15:29; 28:9). I ka kan k’i majigi n’i be Ala deli (Luka 18:9-14). I ka kan ka koow kɛ ka kɛɲɛ n’i ka deliliw ye. O cogo la, i bena a yira ko lanaya b’i la ani ko i be min fɔ, a ŋaniya b’i la. O tuma la dɔrɔn, Jehova bena i ka deliliw jaabi.—Heburuw 11:6.

Copyright © 2006 Watch Tower Bible and Tract Society of Pennsylvania. All rights reserved.