Denbaya ka ɲɛnamaya min ka di Ala ye

1. Bibulu b’a fɔ ko furucɛ lo ye a ka denbaya kuntigi ye (1 Kɔrɛntekaw 11:3). Furucɛ ka kan ka muso kelenpe dɔrɔn lo ta. U ka kan ka furu siri sariya ɲɛ na.—1 Timote 3:2; Tite 3:1.

2. Furucɛ ka kan k’a muso kanu i ko a b’a yɛrɛ kanu cogo min na. A ka kan k’a minɛ i ko Yesu b’a ka kalandenw minɛ cogo min na (Efesekaw 5:25, 28, 29). A man kan k’a muso bugɔ abada wala k’a tɔɔrɔ cogo si la. Nka a ka kan k’a bonya ani k’a jati.—Kolosekaw 3:19; 1 Piɛre 3:7.

Kanuya be Fa min na, a b’a denbaya ladon magoɲɛfɛnw ni Alako ta fan fɛ

3. Facɛman ka kan ka baara kɛ ni jijali ye walisa k’a ka denbaya ladon. A ka kan ka domuni, fani ni soo di a muso n’a deenw ma. Facɛman ka kan k’a ka denbaya ladon Alako ta fan fɛ (1 Timote 5:8). A be ɲɛmɔgɔya ta k’a ka denbaya dɛmɛ ka Ala n’a sagonata lɔn.—Dutɛrɔnɔmɛ 6:4-9; Efesekaw 6:4.

4. Furumuso ka kan ka kɛ dɛmɛbaga ɲuman ye a furucɛ bolo (Jenɛse 2:18). A ka kan k’a cɛɛ dɛmɛ k’u ka deenw kalan ani k’u kolo (Ntalenw 1:8). Jehova b’a ɲini furumuso fɛ a k’a denbaya ladon ni kanuya ye (Ntalenw 31:10, 15, 26, 27; Tite 2:4, 5). A ka kan ka bonya dunba la a furucɛ kan.—Efesekaw 5:22, 23, 33.

5. Ala b’a ɲini deenw fɛ u k’u bangebagaw kanminɛ (Efesekaw 6:1-3). A bolo lalen be bangebagaw kan k’u deenw kalan ani k’u kolo. Bangebagaw ka kan ka wagati dɔ kɛ n’u deenw ye, ani ka Bibulu kalan n’u ye, k’u wasa Alako ni dusukunnata fan fɛ (Dutɛrɔnɔmɛ 11:18, 19; Ntalenw 22:6, 15). Bangebagaw kɛtɔ k’u deenw kolo, u man kan abada k’u dusu kasi wala ka fariya u ma.—Kolosekaw 3:21.

Ala bolo lalen be bangebagaw kan k’u deenw kalan ani k’u kolo

6. Ni bɛɛn ka gwɛlɛ furuɲɔgɔnmaw cɛ, u ka kan k’a ɲini ka Bibulu ladilikanw sira tagama. Bibulu be sinsi a kan ko an ka kanuya yira, ani ka yafali kɛ (Kolosekaw 3:12-14). Ala ka Kuma tɛ farali dusu don an na walisa k’an ka kunko misɛnw ɲɛnabɔ o cogo la. Nka furumuso be se k’a latigɛ k’a furucɛ bila ni (1) a be tugu ka ban k’a ka denbaya ladon, (2) a ka fariya kosɔn a muso ka kɛnɛya n’a niin be farati la, wala (3) n’a cɛɛ ka kɔrɔbɔli damatɛmɛ b’a bali ka Jehova bato.—1 Kɔrɛntekaw 7:12, 13.

7. Furuɲɔgɔnmaw ka kan ka kantigiya kɛ ɲɔgɔn ye. Jatɔya ye jurumu ye min be Ala kɛlɛ ani ka furuɲɔgɔnma tɔ kelen kɛlɛ (Heburuw 13:4). Sɛbɛninw ɲɛ na, ka cɛnimusoya kɛ furu kɔ kan, o dɔrɔn lo be na ni furusa ye ani ka furu kura daga (Matiyu 19:6-9; Romɛkaw 7:2, 3). K’i ka furu sa ani ka furu wɛrɛ siri k’a sɔrɔ a dagalen tɛ Sɛbɛninw sira kan, Jehova b’o kɔniya.—Malaki 2:14-16.

Copyright © 2006 Watch Tower Bible and Tract Society of Pennsylvania. All rights reserved.