Ala ka baarakɛlaw ka kan ka saniya

1. Jehova Ala saniyalen lo, a ka senu. A b’a ɲini a batobagaw fɛ u saniyalen ka to: Alako ta fan fɛ, tagamacogo, miiriya, ani farikolo ta fan fɛ (1 Piɛre 1:16). Ka to saniya la Ala ɲɛ kɔrɔ, o ye jijalikoba ye. An be ɲɛnamaya kɛra duniɲa nɔgɔlen lo kɔnɔ. Ka fara o kan, an ka kan ka jijaliba kɛ janko an kɔnɔnamiiri juguw kana an bila ka kojugu kɛ. Nka an man kan k’o jijali dabila.

2. Ka saniya Alako ta fan fɛ: N’an b’a fɛ ka baara kɛ Jehova ye, an tɛ se ka sɔn nkalon diinan ka kalanw n’a ka landaw la. An ka kan ka bɔ nkalon diinan la ani an man kan k’a dɛmɛ cogo si la (2 Kɔrɛntekaw 6:14-18; Jirali 18:4). N’an ye tiɲɛn kalan Alako la, an k’an janto mɔgɔ si kana an lafili nkalonkalan fɛ.—2 Yuhana 10, 11.

3. Ka saniya tagamacogo ta fan fɛ: Jehova b’a fɛ a batobagaw ka tagama kerecɛn lakikaw cogo la tuma bɛɛ la (1 Piɛre 2:12). An be koo o koo kɛ, a b’a ye, hali an be min kɛ dogo la (Heburuw 4:13). An ka kan ka kakalaya ani duniɲa nin ka kɛcogo nɔgɔlen wɛrɛw kɔniya.—1 Kɔrɛntekaw 6:9-11.

4. Ka saniya miiriya ta fan fɛ: N’an b’an hakili fa ni miiriya saniyalenw ye, an tagamacogo fana bena saniya (Filipekaw 4:8). Nka n’an b’an hakili lɔ koo nɔgɔlenw kan, an bena laban ka wale jugumanw kɛ (Matiyu 15:18-20). Ni ɲɛnagwɛko dɔ be se k’an hakili nɔgɔ, an ka kan k’o kɔniya. An be se k’an hakili fa ni miiriya saniyalenw ye n’an be Ala ka Kuma kalan.

5. Ka saniya farikolo ta fan fɛ: Komi u ye Ala ka lasigidenw ye, kerecɛnw ka kan k’u fari n’u faniw saniyalen to. N’an bɔra ɲɛgɛn na, an ka kan k’an tɛgɛw ko. An ka kan k’u ko fana sanni ka domuni kɛ, wala ka maga domuni na. Ni ɲɛgɛn bɔcogo ɲuman t’i bolo, banakɔtaga nɔgɔw ka kan ka datugu digan kɔnɔ (Dutɛrɔnɔmɛ 23:12, 13). K’i farikolo saniyalen to, o be kɛ sababu dɔ ye ka kɛnaya ɲuman sɔrɔ. Kerecɛn ka soo kɔnɔna n’a kɛnɛmala labɛnnen n’a saniyalen ka kan ka to. A danfara ka kan ka kɛ ɲɛyirali ɲuman ye kiin kɔnɔ.

6. Ka saniya kumakan ta fan fɛ: Ala ka sagokɛlaw ka kan ka tiɲɛn fɔ tuma bɛɛ. nkalontigɛlaw tɛna don Ala ka Masaya la (Efesekaw 4:25; Jirali 21:8). Kerecɛnw tɛ kuma gwomanw fɔ. U tɛ malobali tulonkumaw wala maana nɔgɔlenw lamɛn wala k’u fɔ. U ka kumakan saniyalen kosɔn, u be dan na ni mɔgɔ tɔw ye baarakɛyɔrɔ la, kalanso la wala kiin kɔnɔ.—Efesekaw 4:29, 31; 5:3.

Ala ka sagokɛlaw ka kan ka saniya ɲɛɛ bɛɛ la

Copyright © 2006 Watch Tower Bible and Tract Society of Pennsylvania. All rights reserved.