Ala be kɛcogoya minw kɔniya

1. Ala ka baarakɛlaw be ɲuman kanu. Nka u fana ka kan k’u dege ka juguman kɔniya (Zaburuw 97:10). O kɔrɔ ko u ka kan ka ban kɛcogoya dɔw la, Ala be minw kɔniya. O kɛcogoya dɔw ye jumanw ye?

2. Jatɔya: Cɛnimusoya sanni furu ka kɛ, jɛnɛya, ka jɛn ni bɛgɛn ye, ka jɛn ni sinjilamɔgɔ ye ani cɛɲɔgɔnɲini walima musoɲɔgɔnɲini ye jurumubaw ye minw be Ala kɛlɛ (Levitike 18:6; Romɛkaw 1:26, 27; 1 Kɔrɛntekaw 6:9, 10). Ni cɛɛ ni muso sigilen be ɲɔgɔn kun k’a sɔrɔ furusiri ma kɛ, u ka kan ka fara wala ka furusiri kɛ ka kɛɲɛ ni sariyasira ye.—Heburuw 13:4.

Ala be dɔlɔtɔya, sonyali, sobon, ani fariyakow sifa bɛɛ kɔniya

3. Nkalon, sobon, sonyali: Jehova Ala tɛ se ka nkalon tigɛ (Tite 1:2). Mɔgɔ minw b’a fɛ a ka sɔn u la, u ka kan ka ban nkalontigɛ la (Zaburuw 6:16-19; Kolosekaw 3:9, 10). Sobon sifa bɛɛ nɔgɔra wasabaliya fɛ. O kama kerecɛnw t’u seen don sobon sifa si la i n’a fɔ lotori, soboli, ani bingo (Efesekaw 5:3-5). Kerecɛnw tɛ sonyali kɛ fana. U tɛ fɛɛn san n’u lɔnni b’a la ko fɛɛn sonyalen lo. U fana tɛ fɛɛnw ta n’a sira ma di u ma.—Ekisode 20:15; Efesekaw 4:28.

4. Dusubaya, fariya: Ni dusubaya ma kɔrɔsi, a be se ka mɔgɔ bila ka fariyakow kɛ (Jenɛse 4:5-8). Mɔgɔ fariman tɛ se ka kɛ Ala teri ye (Zaburuw 11:5; Ntalenw 22:24, 25). A man ɲi ka mɔnɛ bɔ wala ka kojugu sara ni kojugu ye.—Ntalenw 24:29; Romɛkaw 12:17-21.

5. Hakilimaaweeleli ani jinamoriya koow: Mɔgɔ dɔw be fanga deli jinanw fɛ ka se ka banabagatɔw kɛnɛya. Dɔ wɛrɛw b’u juguw bon ni kɔrɔti ye ka bana bila u la wala k’u faga yɛrɛ. Fanga min be o kɛcogoyaw bɛɛ kɔfɛ, o ye Sitanɛ ye. O la, kerecɛn man kan k’a seen don o si la (Dutɛrɔnɔmɛ 18:9-13). Ka nɔrɔ Jehova la, o ye tangali fisaman ye kɔrɔti kama.—Ntalenw 18:10.

6. Dɔlɔtɔya: O tɛ kojugu ye ka diwɛn, biyɛri, wala dɔlɔmafɛn dɔɔni min (Zaburuw 104:15; 1 Timote 5:23). Nka ka minni kɛ k’a dama tɛmɛ, ani dɔlɔtɔya ye kojugu ye Ala ɲɛ kɔrɔ (1 Kɔrɛntekaw 5:11-13; 1 Timote 3:8). Ka minni kɛ kojugu, o be se k’i ka kɛnɛya nagasi ani k’i ka gwa ci. O fana be se k’i bila ka ben joona kɔrɔbɔli wɛrɛw la.—Ntalenw 23:20, 21, 29-35.

7. Koo minw ka jugu Ala ɲɛ kɔrɔ, mɔgɔ minw be to k’u kɛ, “olu tɛna Ala ka masaya sɔrɔ tiɲɛn na.” (Galasikaw 5:19-21). N’i be Ala kanu tiɲɛn na, ani n’i b’a fɛ k’i koo diya a ye, i be se k’i hɔɔrɔnya ka bɔ o kɛcogoyaw la (1 Yuhana 5:3). Fɛɛn minw man ɲi Ala ɲɛ kɔrɔ, i dege k’u kɔniya (Romɛkaw 12:9). Jɛnɲɔgɔnya kɛ ni mɔgɔw ye, minw delinankow ka di Ala ye (Ntalenw 13:20). Kerecɛn kɔgɔlenw ka tagamaɲɔgɔnya bena i dɛmɛ (Yakuba 5:14). Ka fara o bɛɛ kan, dɛmɛ ɲini Ala fɛ delili kɔnɔ.—Filipekaw 4:6, 7, 13.

Copyright © 2006 Watch Tower Bible and Tract Society of Pennsylvania. All rights reserved.