Lannako ni landa minw ka gwo Ala ye

Ala tɛ Sabaya ye

1. Lannakow ni landaw bɛɛ tɛ kojugu ye. Nka Ala tɛ sɔn u la n’u be bɔ nkalon diinan la wala n’u be Bibulu ka kalan kɛlɛ.—Matiyu 15:6.

2. Sabaya: Yala Jehova ye Sabaya ye wa: O kɔrɔ, mɔgɔ saba ka kɛ Ala kelen ye? Ayi! Fa, Jehova ye “Ala sɔbɛ kelenpe ye.” (Yuhana 17:3; Marka 12:29). Yesu y’a dencɛ fɔlɔ bangelen ye, ani a kololen be Ala ye (1 Kɔrɛntekaw 11:3). Fa ka bon ni Dencɛ ye (Yuhana 14:28). Hakili senu tɛ mɔgɔ ye, Ala ka barika lo, min fɛ a be kɛwalew kɛ.—Jenɛse 1:2; Kɛwalew 2:18.

Nɔwɛli ani Paki be bɔ fɔlɔfɔlɔ nkalon diinanw kɔnɔ

Kuun si t’a la ka mɔgɔ salenw bato wala ka siran u ɲɛ

3. Nɔwɛli ani Paki: Yesu ma wolo desanburukalo tile 25. A wolola ɔkutɔburukalo tile fɔlɔ ɲɔgɔn fan fɛ: Saan wagati min na sagagwɛnnaw b’u ka sagakuluw to kɛnɛma suu fɛ (Luka 2:8-12). Yesu ma kerecɛnw ci abada u k’ale wololon seli kɛ. Nka a y’a fɔ a ka kalandenw ye u k’ale saya hakilijigi seli kɛ, o kɔrɔ, k’u hakili to a la (Luka 22:19, 20). Nɔwɛli seli n’a landakow be bɔ fɔlɔfɔlɔ nkalon diinan lo la. O kelen lo ni Paki landakow ye, i n’a fɔ ka baara kɛ ni faanw ni sonsanninw ye. Kerecɛn fɔlɔw tun tɛ Nɔwɛli wala Paki seli kɛ, bi kerecɛn lakikaw fana t’a kɛ.

4. Wololon sanyɛlɛma seliw: Wololon sanyɛlɛma seli fila dama minw koo fɔra Bibulu kɔnɔ, o kɛra mɔgɔw fɛ minw tun tɛ Jehova batobagaw ye (Jenɛse 40:20-22; Marka 6:21, 22, 24-27). Kerecɛn fɔlɔw tun tɛ wololon sanyɛlɛma seliw kɛ. Wololon sanyɛlɛma seli bɔra fɔlɔfɔlɔ nkalon diinanw na. Kerecɛn lakikaw be nilifɛnw di ani u be wagati dumanw kɛ ɲɔgɔn fɛ wagati wɛrɛw la saan kɔnɔ.

5. Mɔgɔ salenw ɲɛsiranya: Mɔgɔ salenw tɛ se ka foyi kɛ wala ka kɛ koo dɔ kalama. An tɛ se ka dɛmɛ lase u ma, ani u fana tɛ se ka kojugu kɛ an na (Zaburuw 146:4; Eklesiaste 9:5, 10). Niin be sa, a ɲɛnaman tɛ to saya kɔfɛ (Ezekiɛl 18:4). Nka tuma dɔw la, mɛlɛkɛ jugu minw be weele jinɛw, u b’u yɛrɛw kɛ i n’a fɔ mɔgɔ salenw hakiliw. Landa minw basigilen be mɔgɔ salenw ɲɛsiran wala u batoli kan, u man ɲi.—Esayi 8:19.

6. Kuruwa: Yesu ma sa kuruwa kan. A sara potoju, wala yiri dɔ lo kan. Gɛrɛki daɲɛ min yɛlɛmana ka kɛ “kuruwa” ye Bibulu caaman kɔnɔ, o kɔrɔ ye yiri bolo kelen dama. Kuruwa tagamasiyɛn bɔra fɔlɔfɔlɔ nkalon diinanw lo kɔnɔ. U ka bato kɔnɔ, kerecɛn fɔlɔw tun tɛ baara kɛ ni kuruwa ye wala k’a bato. O kama, e ka miiri la, yala a dagalen lo ka baara kɛ ni kuruwa ye Alabato kɔnɔ wa?—Dutɛrɔnɔme 7:26; 1 Kɔrɛntekaw 10:14.

7. A be se ka gwɛlɛya k’o lannako n’o landako dɔw dabila. I somɔgɔw n’i teriw be se k’a don i kuun na k’i kana i lannakow yɛlɛma. Nka ka diya Ala ye, o kɔrɔtalen lo ka tɛmɛ ka diya hadamadenw ye.—Ntalenw 29:25; Matiyu 10:36, 37.

Copyright © 2006 Watch Tower Bible and Tract Society of Pennsylvania. All rights reserved.