I be se ka tiɲɛn diinan sɔrɔ cogo juman na?

1. Yesu ye tiɲɛn kerecɛnya diinan kelenpe lo jusigi. O la, bi, Jehova Ala batobagaw ka kan ka kɛ farikolo wala jɛkulu kelen dɔrɔn lo ye (Yuhana 4:23, 24; Efesekaw 4:4, 5). Bibulu b’a ɲɛfɔ ko mɔgɔ damanin dɔrɔn lo be ɲɛnamaya sira dɔgɔmanin kan.—Matiyu 7:13, 14.

2. Bibulu tun kɔnna k’a fɔ ko cidenw salen kɔ, nkalon kalansiraw ni kɛcogoya dɔw minw tɛ kerecɛnya ye, o tun bena don dɔɔni dɔɔni kerecɛnya kɔngeregasiyɔn kɔnɔ. Cɛɛ dɔw tun bena lanabagaw lasu u ka tugu olu kɔ sanni ka tugu Kirista kɔ (Matiyu 7:15, 21-23; Kɛwalew 20:29, 30). O lo y’a to an ɲɛ be diinan sifa caaman na minw b’a fɔ k’u ye kerecɛn diinanw ye. Cogo juman na an be se ka kerecɛn lakikaw faranfasi k’u lɔn?

3. Kerecɛn lakikaw ka tagamasiyɛnw bɛɛ la, belebeleba ye ko kanuya sigilen be u ni ɲɔgɔn cɛ sɔbɛ la (Yuhana 13:34, 35). U kalannen tɛ ka miiri k’u ka fisa ni siya wɛrɛ wala fara ɲɛ wɛrɛ mɔgɔw ye. U fana kalannen tɛ ka jamana wɛrɛw mɔgɔw kɔniya (Kɛwalew 10:34, 35). O la, u t’u seen don kɛlɛkow la. Kerecɛn lakikaw be ɲɔgɔn minɛ i ko balimaw.—1 Yuhana 4:20, 21.

Kerecɛn lakikaw be ɲɔgɔn kanu, u be Bibulu bonya, ani u be waajuli kɛ Ala ka Masaya koo la

4. Tiɲɛn diinan ka tagamasiyɛn wɛrɛ ye ko a deenw be bonya dunba la Bibulu kan. U be sɔn a la ko Ala ka Kuma lo, ani u be la a fɔta la (Yuhana 17:17; 2 Timote 3:16, 17). Olu fɛ, Ala ka Kuma nafa ka bon ka tɛmɛ hadamadenw ka hakilinataw n’u ka landaw kan (Matiyu 15:1-3, 7-9). U b’a ɲini k’u ka loon o loon ɲɛnamaya kɛ ka kɛɲɛ ni Bibulu ka fɔta ye. O la, u tɛ waajuli kalan dɔ kɛ ka tila k’a kɔkana sira tagama.—Tite 1:15, 16.

5. Tiɲɛn diinan ka kan ka Ala tɔgɔ bonya fana (Matiyu 6:9). Yesu ye mɔgɔ wɛrɛw lalɔnniya Ala tɔgɔ, Jehova, koo la. Kerecɛn lakikaw ka kan k’o ɲɔgɔn lo kɛ (Yuhana 17:6, 26; Romɛkaw 10:13, 14). E sigida la, mɔgɔ jumanw lo be mɔgɔ wɛrɛw lalɔnniya Ala tɔgɔ la?

6. Kerecɛn lakikaw be waajuli kɛ Ala ka Masaya koo la. Yesu tun b’o lo kɛ. Tuma bɛɛ, a tun be kuma Masaya koo la (Luka 8:1). A y’a ka kalandenw ci u k’o cikan kelen waajuli kɛ dugukolo bɛɛ kan (Matiyu 24:14; 28:19, 20). Kerecɛn lakikaw lalen b’a la ko Ala ka Masaya dɔrɔn lo bena ɲɛsuma ni lasagoli lakikaw lase dugukolo nin ma.—Zaburuw 146:3-5.

7. Yesu ka kalandenw man kan k’u seen don duniɲa juguman nin na (Yuhana 17:16). U t’u seen don duniɲa ka politikow la, ani sɔsɔliw minw be duniɲalatigɛ nɔgɔyali kan. U be ban tagamacogo, kɛcogoya, ani cogoya jugumanw na, minw jɛnsɛnnen be duniɲa kɔnɔ (Yakuba 1:27; 4:4). Yala i be diinan jɛkulu dɔ lɔn i sigida la min be ni o kerecɛnya lakika tagamasiyɛnw ye wa?

Copyright © 2006 Watch Tower Bible and Tract Society of Pennsylvania. All rights reserved.