Jehova Seerew ka koow labɛnnen be cogo min na

1. Jehova Seerew ka tariki kura daminɛna saan 1870 fan fɛ. A daminɛ na, u tun be weele Bibulu Kalandenw. Nka saan 1931 la, u ye Jehova Seerew tɔgɔ ta min be bɔ Bibulu kɔnɔ (Esayi 43:10). Jɛkulu tun be fitinin a daminɛtɔ la, nka a yiriwala ka na kɛ Seere miliyɔn caaman ye minw cɛsirilen be ka waajuli kɛ jamana 230 ni kɔ kɔnɔ.

2. Jehova Seerew ka kɔngeregasiyɔn caamanba be lajɛn kɛ siɲɛ saba lɔgɔkun o lɔgɔkun. I weelelen be ka taga o lajɛnw na (Heburuw 10:24, 25). U ka kalan bɛɛ basigilen be Bibulu ka fɔta kan. Lajɛnw be daminɛ ani u be laban ni delili ye. O lajɛn caaman na, “Alako dɔnkiliw” be la fana ni dusukun ɲagalilen ye (Efesekaw 5:18, 19). O yɔrɔw donsɔngɔ ye fuu ye ani wari tɛ deli mɔgɔ fɛ.—Matiyu 10:8.

3. Kɔngeregasiyɔn caamanba ka lajɛnw be kɛ Masaya Boon dɔ kɔnɔ. Tuma caaman na, Seere dɔw lo y’u yɛrɛ di k’o boonw lɔ cogo nɔgɔman na. I tɛna jaaw, kuruwaw, wala o ɲɔgɔnna fɛɛn si ye Masaya Boon kɔnɔ. Musakaw be ɲɛnabɔ bolomafaraw sababu fɛ, minw tɛ kɛ ni diagoya ye. Bolomafarabuwati dɔw sigilen be niliw kama ni mɔgɔ dɔw b’a fɛ ka sɔnni kɛ.—2 Kɔrɛntekaw 9:7.

4. Kɔngeregasiyɔn kelen kelen bɛɛ kɔnɔ, diinan mɔgɔkɔrɔw dɔw, wala kɔrɔsibagaw be yen. U be kalan ɲɛmɔgɔya ta kɔngeregasiyɔn kɔnɔ (1 Timote 3:1-7; 5:17). Kɔrɔsigi cidenw b’u dɛmɛ (1 Timote 3:8-10, 12, 13). O cɛɛw kɔrɔtalen tɛ kɔngeregasiyɔn tɔ kun na (2 Kɔrɛntekaw 1:24). Bonyali tɔgɔ faranfasilenw t’u la (Matiyu 23:8-10). U ka fani don cogo tɛ daan na ni mɔgɔ tɔw ta ye. U fana tɛ sara u ka baara la. U yɛrɛ ŋaniya la, diinan mɔgɔkɔrɔw b’u janto kɔngeregasiyɔn magow la Alako ta fan fɛ. U be se ka mɔgɔ dusu saalo ani k’a bila sira kan wagati gwɛlɛnw na.—Yakuba 5:14-16; 1 Piɛre 5:2, 3.

5. Jehova Seerew be lajɛnbaw kɛ fana saan o saan. Kɔngeregasiyɔn caaman be ɲɔgɔn kunbɛn ka Bibulu ka kalansira wɛrɛ labɛnnen dɔ lamɛn o lajɛnbaw la. Tuma o tuma, o lajɛnba kelen kelen ka labɛn dɔ ye ka kalanden kuraw batise.—Matiyu 3:13-17; 28:19, 20.

6. Jehova Seerew ka tɔn sigiyɔrɔsoba be Niyɔriki (New York). Koɲɛnabɔla Jɛkulu sigilen be yen. O ye diinan mɔgɔkɔrɔ kolɔnbagaw jɛkulu dɔ ye min be duniɲa kuru bɛɛ kɔngeregasiyɔn kɔrɔsi. Ka fara o kan, bolofara 100 ni kɔ be yen duniɲa kɔnɔ. O soo ninw kɔnɔ, fubaarakɛlaw be dɛmɛ don ka sɛbɛw bɔ minw basigilen be Bibulu kan ani k’u ci. Waajulibaara fana be labɛn o yɔrɔw la. Bolofara min ka surun i la, mun na i tɛ labɛn kɛ ka taga o filɛ?

Copyright © 2006 Watch Tower Bible and Tract Society of Pennsylvania. All rights reserved.