1. Sisan kɔni, i ye koo ɲuman caaman kalan ka bɔ Bibulu kɔnɔ. O lɔnniya ka ɲi k’i bila ka kerecɛnya jogo baara i yɛrɛ la (Efekaw 4:22:24). O lɔnniya sifa kɔrɔtalen lo walisa i ka ɲɛnamaya banbali sɔrɔ (Yuhana 17:3). Nka mɔgɔ wɛrɛw fana mago b’a la ka kibaro duman lamɛn walisa olu fana ka se ka kisi. Kerecɛn lakikaw bɛɛ ka kan ka seereya kɛ mɔgɔ wɛrɛw ye. O ye Ala ka cikan ye.—Romɛkaw 10:10; 1 Kɔrɛntekaw 9:16; 1 Timote 4:16.
2. I be koo ɲuman minw kalanna, i be se k’a daminɛ k’u tilan n’i gɛrɛfɛ mɔgɔw ye. U fɔ i somɔgɔw, i teriw, i kalanɲɔgɔnw, ani i baarakɛɲɔgɔnw ye. I k’o kɛ ɲumanya la ani i ka muɲu (2 Timote 2:24, 25). I hakili to a la ko tuma caaman na, mɔgɔw be mɔgɔ tagamacogo kɔrɔsi ka tɛmɛ a fɔtaw kan. O la, i be cikan min fɔ mɔgɔw ye, i tagamacogo ɲuman be se k’u dɛmɛ k’a lamɛn.—Matiyu 5:16; 1 Piɛre 3:1, 2, 16.
3. Wagati nata la, i bena se k’i ka koow dafa walisa k’a daminɛ ka waajuli kɛ ni Jehova Seerew kɔngeregasiyɔn ye min be i sigida la. O ye koba ye i ka ɲɛtaga la (Matiyu 24:14). N’i sera ka mɔgɔ wɛrɛ dɛmɛ ka kɛ Jehova ka baarakɛla ye ani ka ɲɛnamaya banbali sɔrɔ, o bena kɛ nisɔndiyako ye dɛ!—1 Tesalonikekaw 2:19, 20. |
