CƐTしM ƐSƆ-SƐTƲ ƐGBƐYƐ
TしNAƔ SしƲ
ÑƆTAA!

Ɛbε cεtɩm εsɔ-sεtʋ εgbεyε kεnaa? Ɛyaa kʋʋ mbʋ pɩlakɩ εsɔ-sεtʋ εgbεyε hɩɖε taa yɔ, pɩwɩzɩ-ŋ? You, ajεyε yɔkʋʋ, mulum mbʋ mba pɔtɔŋ pεsεɣ Ɛsɔ palakɩ yɔ pɩcεyɩɣ ñε-tε siɣsiɣ nɩʋ lɩmaɣza na? Ɛbε yɔɔ pʋwε εzɩ kaɖε sakɩyε lɩɣnɩ cεtɩm εsɔ-sεtʋ εgbεyε cɔlɔ na?

Ɛzaɣtʋ ndʋ tɩtɩlɩɩnɩ εsɔ-sεtʋ aŋgba tɩŋa cɔlɔ, εlε cεtɩm εsɔ-sεtʋ εgbεyε cɔlɔ tɩlɩnaa. Yeesu Krɩstʋ, εsɔ-sεtʋ εgbεyε nɩmɔʋ taa weyi εyaa sakɩyε ñaŋ siŋŋ yɔ, εyɔɔdaa se cεtɩm εsɔ-sεtʋ εgbεyε lakɩ lakasɩ kɩdεkεdasɩ, εzɩ “tɩʋ kɩdεkεdʋ lʋlʋʋ pee wena aawazɩɣ nabʋyʋ yɔ.” (Matiyee 7:15-17)* Pee wena cεtɩm εsɔ-sεtʋ εgbεyε lʋlʋʋ?

Cεtɩm Ɛsɔ-sεtʋ εgbεyε . . .

ÐしÐƲƲ Ðし-NƆƆ YOU NƐ POLITIKI PA-TAA: Tɔm yɔɔdʋʋ takayaɣ ŋga payaɣ se Asiaweek kɔtɔm se: “Nɔsɩɖεyaa ma makɩlɩnɩ ɖoŋ waa, Azii tεtʋ nε hɔɔlʋŋ lεεŋ taa, tɩŋɩɣnɩ εyaa εsɔ-sεtʋ lɩmaɣza yɔɔ nε palakɩ mbʋ pɔsɔɔlaa yɔ.” “Kedeŋa wεε kasʋʋ wεεkʋtʋ siŋŋ taa,” mbʋ tɔm yɔɔdʋʋ takayaɣ ŋga kɔtɔŋ se pɩlɩ pɩ-taa lε. Ɛsɔ-sεtʋ εgbεyε taa abalʋ sɔsɔ nɔɔyʋ Amerika tεtʋ taa yɔɔdɩ se: “Pʋwε se ɩkʋ ajεyε yɔkɩyaa fayɩɩ pʋcɔ εyaa kʋtʋ sɩŋ.” Ɛzɩma εmazɩɣ se pala? “Pakʋ-wε payɩ Kɩpaɣlʋ hɩɖε taa.” Ɛlε, Bibl ñɔyɔɔdʋʋ se: “Yee nɔɔyʋ εtɔm se: ‘Mɔnsɔɔlɩ Ɛsɔ’ nε εpaɖɩɣ lεlaa εkε cεtɩyʋ.” (Yohanεεsɩ I, 4:20) Yeesu εtεm yɔɔdʋʋ se: “しsɔɔlɩ mi-koyindinaa [“しwεε mi-koyindinaa sɔɔlʋʋ yɔɔ,” NW ].” (Matiyee 5:44) Ɛsɔ-sεtʋ aŋgba εzɩma takpaɣ a-tɩ nε aɖʋ you taa?

ÐしWしLしƔ CƐTしM WしLしTƲ: Ɛsɔ-sεtʋ aŋgba sakɩyε wɩlɩɣ se εyʋ wεna nabʋyʋ ε-taa, paanaɣ-pʋ, nε pɩɩsɩkɩ kaɣʋ paa εyʋ-tɔnʋ εsɩba yɔ. Pɩtɩŋnɩ wɩlɩtʋ ndʋ tɩ-yɔɔ lε, εsɔ-sεtʋ aŋgba sakɩyε mulu a-εyaa, pɔpɔzʋʋ-wε liidiye sakiyε pʋcɔ pεsεɣ Ɛsɔ sɩɖaa yɔɔ. Ŋgʋ Bibl wɩlɩtʋ ñεwε ndɩ. “Ɛsatɩnaa sɩma [mbʋ se] paɣkaɣ sɩbʋ; piyele sɩɖaa ɩɩtasɩɣ natʋyʋ sɩm.” (Ekklesiaste 9:5) Yeesu wɩlaa se sɩɖaa kɔŋ fem—pʋnε pɩtaacεyɩ yee εyʋ εεwεnɩ maasɩkɩ hɔɔlʋʋ nakʋyʋ ε-taa yɔ. (Yohanεεsɩ 11:11-25) Ñε-εsɔ-sεtʋ εgbεyε wɩlɩɣ se εyʋ hɔɔlʋʋ nakʋyʋ εεsɩkɩ?

ÐししÐAŊしƔ KƲZƲƲ KしDƐKƐDƲ: Wɩsɩ ɖɩɖʋyε ajεyε taa cɔɔcɩnaa nabεyε yaɣ abalaa mba paɣcaɣ-ɖama nε halaa mba paɣcaɣ-ɖama se pεkεnɩ cɔɔcɩ taa nɔɔ ɖεyaa taa lεlaa, nε pañɩɣkɩɣ kominina waa yɔɔ se petisi abalaa yaa halaa ɖeke ɖama kpaɣʋ yɔɔ. Ðoo cɔɔcɩnaa mba paɖaŋaɣ kʋzʋʋ kɩdεkεdʋ yɔ, lεεlεεyɔ pa-taa nɔɔ ɖεyaa mba pakpaɣ-piya nε pacaɣ-sɩ yɔ paalakɩ-wε nabʋyʋ. Paa mbʋ suwee Bibl ñawɩlɩɣ? Kɩyɔɔdɩ kpayɩ kpayɩ se: “しtaacεtɩ mɩ-tɩ. Acεyε laɖaa yaa sɩɩnaa layaa yaa hayitu laɖaa yaa abalaa mba pacaɣ ɖama yɔ… paakaɣ sʋʋ Ɛsɔ-kewiyaɣ taa [“pa-taa nɔɔyʋ εεkaɣ tɩɩɣʋ Ɛsɔ-kewiyaɣ,” NW ].” (Kɔrεntɩ I, 6:9,10) しsɩm εsɔ-sεtʋ aŋgba nayε wena aaɖaŋɩɣ kʋzʋʋ kɩdεkεdʋ yɔ?

Ɛsɔ-sεtʋ aŋgba wena alʋlʋʋ pee kɩdεkεdaa yɔ εbε pɩkɔŋ-yε tεmnaʋ? Yeesu laba heyi kʋnε: “Tɩʋ ŋgʋ kɩɩlʋlʋʋ pee kɩbana yɔ pεsεtɩɣ-kʋ nε paɖʋ-kʋ miŋ taa.” (Maatiyee 7:19) Pɩtʋʋ fεyɩ, pakaɣ cεtɩm εsɔ-sεtʋ εgbεyε yɔkʋʋ nε paɖɩzɩ-ɖɩ! Ɛlε εzɩma nε εzɩmtaa pɩkɔŋ labʋ? Natʋ ndʋ pama Bibl taa Natʋ (yaa Wɩlʋʋ) takayaɣ taa ñʋŋ 17 nε 18 cosuu tɩ-yɔɔ.

Ɛzɩma cεtɩm εsɔ-sεtʋ εgbεyε kaɣ tɩnaɣ sɩʋ?

Maɣzɩ tʋnε. Hayitu abiɖe caɣ sɔɔndʋ kpɩnε naɖɩyε haɣlaɣ taa, kpɩnε nɖɩ ɖɩwεnɩ ñʋŋ lʋbε nε hɩŋ hiu. (Wɩlʋʋ 17:1-4) Hayitu abiɖe nɖɩ ɖɩsɩŋɩnɩ anɩ? Kajalaɣ lε, ɖɩwεnɩ ɖoŋ “tεtʋ yɔɔ awiya yɔɔ.” Pɩsɔzɩ lε, ɖisuu wondu ndʋ tiwobini sεmɩŋ yɔɔ yɔ, ɖɩlakɩnɩ sɔzɩŋ tɩlaaɖɩ tʋmɩyε, nε ɖɩwε ñɩm pɩtɩɩfεyɩ. Kεtεzaɣ lε, pɩtɩŋnɩ ti-efeletu lakasɩ yɔɔ lε, ‘pitolisi ajεε kpeekpe.’ (Wɩlʋʋ 17:18; 18:12, 13, 23) Bibl sɩŋnɩ-ɖʋ nε ɖɩnaɣ se hayitu abiɖe nɖɩ ɖɩkεna εjaɖε kpeekpe yɔɔ cεtɩm εsɔ-sεtʋ εgbεyε. Ðɩtɩsɩŋnɩ εgbεyε kʋɖʋmɖε ɖeke, εlε εsɔ-sεtʋ aŋgba kpeekpe wena alʋlʋʋ pee kɩdεkεdaa yɔ.

Kpɩnε nɖɩ ɖɩ-yɔɔ hayitu abiɖe caɣ yɔ ɖɩsɩŋnɩ εjaɖε yɔɔ politiki ɖoŋ.^# (Wɩlʋʋ 17:10-13) Cεtɩm εsɔ-sεtʋ εgbεyε caɣ politiki kpɩnε haɣlaɣ taa pɩtɔbʋʋ se ɖɩwεnɩ ɖoŋ ɖɩ-lɩmaɣza yɔɔ nε ɖɩcɔŋnɩ ɖɩ-yɔɔ paa lee ɖiwoki yɔ.

Ɛlε, pɩkazɩ cʋkɔ maamaaci lakasɩ nasɩyɩ kaɣ labʋ. “Hɩŋ hiu weyi ŋnawa yɔ nε kpɩnε pɔkɔŋ halʋ [“hayitu abiɖe,” NW ] εnʋ paɖʋʋ: pɔkɔŋ mʋʋ mbʋ pɩtɩŋa payɩ εwεna yɔ nε pɔhɔzɩ e-wondu nε piyebi-i ndaakpeɖe. Pɔkɔŋ tɔɔʋ ε-nandʋ nε pɩkazɩ pɔsɔ miŋ.” (Wilʋʋ 17:16) Kpεdεε lakasɩ taa lε, εjaɖε yɔɔ politiki ɖoŋ tɩnaa kaɣ pa-tɩ pɩsɩnaʋ cεtɩm εsɔ-sεtʋ εgbεyε yɔɔ nε pɔyɔkɩ-ɖɩ caɣcaɣ! Atuzuu-wε se pala pɩ-tε lakasɩ? Natʋ takayaɣ cosuu se: “Ɛsɔ ɖʋ pa-laŋεε taa se pala Ɛ-lɩmaɣzεε.” (Natʋ 17:17, NW ) Ɛsɔ kaɣ cεtɩm εsɔ-sεtʋ εgbεyε tɔm pɔzʋʋ pɩtɩŋnɩ lakasɩ kɩdεkadasɩ nzɩ ɖɩlabɩ Ɛsɔ-hɩɖε taa yɔ sɩ-yɔɔ. Ɛsɔ-siɣsiɣ lakasɩ yɔɔ lε, εkɔŋ tɩŋɩnaʋ cεtɩm εsɔ-sεtʋ εgbεyε taabalaa politiki ñɩma yɔɔ nε Ɛɖɩzɩ-ɖɩ.

Ɛbε pʋmʋna-ŋ se ŋla yee ŋŋcaɣ ŋɖʋ ñe-nesi cεtɩm εsɔ-sεtʋ εgbεyε-kɩwεεkɩm taa? Ɛsɔtɔm tusuu-ɖʋ nε tɩtɔŋ se: “Ma-ñɩma ɩlɩɩ [ɖɩ-taa].” (Wɩlʋʋ 18:4) Lεεlεεyɔ alɩwaatʋ tabaa se ɖise nε ɖɩlɩɩ cεtɩm εsɔ-sεtʋ εgbεyε taa! Ɛlε lee ŋpɩzɩɣ ŋse nε ŋwolo? Pɩtεkε maatisiu se Ɛsɔ wεε waa cɔlɔ, mbʋ pʋyɔɔ yɔ lɩdaʋ fεyɩ pɔ-cɔlɔ. (Tesalooniki II, 1:6-9) Lone nɖɩ ɖɩ-taa koŋ yɔɔhuzuu wεε yɔ ɖɩwε toovenim εsɔ-sεtʋ εgbεyε taa kεnε. Ɛzɩma ŋpɩzɩɣ ŋtɩlɩ toovenim εsɔ-sεtʋ εgbεyε?

Ɛzɩma ŋlakɩ ŋtɩlɩ toovenim εsɔ-sεtʋ εgbεyε?

Pee kɩbana wena toovenim εsɔ-sεtʋ εgbεyε lʋlʋʋ?—Maatiyee 7:17.

Toovenim εsɔ-sεtʋ εgbεyε taa . . .

SƆƆLしM ƐWƐƐ EYAA HƐKƲ TAA: Toovenim εsɔ sεyaa “nε kedeŋa [yɔɔ] ñɩma patakaa lɩmaɣza [“patɩkε kedeŋa yɔɔ mba,” NW ],” tɔnʋʋ tɔlɩm yaa ɖenɖe palɩna yɔ pɩɩtayɩɣ pε-hεkʋ taa, nε palɩzɩɣ ‘sɔɔlɩm pawɩlɩɣ-ɖama.’ (Yohanεεsɩ 13:35; 17:16; Tʋma 10:34, 35) Ɛzɩma mbʋ paakʋ ɖama yɔ lε, pɔsɔɔla pasɩ pa-taabalaa lone taa. —Yohanεεsɩ I, 3:16.

ÐI-LIDAƲ WƐ ƐSƆTƆM YƆƆ: Se ɖɩɩwɩlɩ “sɔnzɩ tɔm” nε “εyaa paɣtʋ εzɩ εsɔ-ñɩndʋ lε,” toovenim εsɔ-sεtʋ εgbεyε wɩlɩtʋ lɩɣnɩ εsɔtɔm, Bibl, taa kεnε. (Maatiyee 15:6-9) Ɛbε yɔɔ? Mbʋ pʋyɔɔ yɔ “Tɔm kelekele ndʋ payɩ pamawa yɔ tɩlɩnɩ Ɛsɔ cɔlɔ nε tɩwεε wazaɣ, ndʋ pawɩlɩɣnɩ εyaa, ndʋ tɩsɩŋna-wε nε pana mbʋ palabɩ pɩfεyɩ ɖeu yɔ nε tɩñɔɔzʋʋ wondu ndɩ ndɩ nε tɩtʋʋzɩ.”—Timotee II, 3:16, NW.

ÐしKPAZしƔ CEJEWIYE TAA ƐYAA TAABALしYƐ ÐOŊ, ÐしLAKし NƐ ÐISEƔTIƔ ƐYAA WEZUU KしBAŊGƲ CAƔƲ NしMƆƲ TAA: Toovenim εsɔ-sεtʋ εgbεyε wɩlɩɣ walaa se ‘pɔsɔɔlɩ pa-halaa εzɩ pɔsɔɔlʋʋ pa-maɣmaɣ pɔ-tɔnʋʋ yɔ,’ ɖɩsɩɣna halaa se pεwεεna ‘ñamtʋ siŋŋ pa-walaa yɔɔ,’ ɖɩwɩlɩɣ piya se ‘paña pa-lʋlɩyaa.’ (Efεεzɩ 5:28, 33; 6:1, NW ). Pɩtasɩ lε, mba pεɖεɣ nɔɔ hɔɔlɩŋ ndɩ ndɩ taa yɔ pʋmʋnaa pe-wezuu caɣʋ εtʋʋzɩ siŋŋ.—Timotee I, 3:1-10.

Ɛsɔ-sεtʋ aŋgba tɩŋa tisiɣ nε aluzuu a-tɩ paɣtʋ tʋnε tɩ-tεε? Takayaɣ ŋga palɩzɩ-kε 2001 anglais yɔɔdaɣ taa nε payaɣ-kε se La politique de l’Holocauste yɔ kɔtɔm se: “Yee εyaa sakɩyε εεlakaɣ mbʋ Yehowa-Aseɣɖe tɩnaa susuu nε palakɩ yɔ, yuda ñɩma-kʋʋ Jama You II Ñɩŋgʋ taa εtaala nε εyaa-kʋʋ kedeŋa yɔɔ εεtaatɔyɩ pɩtɩɩfεyɩ mbʋ.”

Ŋcɔnɩ tεtʋ yɔɔ ageta εzɩ 235 taa, Yehowa-Aseɣɖe tɩnaa eeheyiɣ εyaa ndʋ Bibl yɔɔdʋʋ wezuu kɩbaŋgʋ caɣʋ yeke yɔɔ kεnε; pa-maɣmaɣ pɔɖɔŋ ndʋ pawɩlɩɣ yɔ tɩ-yɔɔ. Ðiseɣti-ŋ se ŋpɔzɩ Yehowa-Aseɣɖe tɩnaa se pasɩɣna-ŋ nε ŋkpεlɩkɩ mbʋ Ɛsɔ sɔɔlaa se ŋla yɔ, yaa εzɩma ŋpɩzɩɣ ŋsε-ɩ camɩyε yɔ. Lεεlεεyɔ pʋmʋnaa se ŋla mbʋ. Taatɔ se cee. Cεtɩm εsɔ-sεtʋ εgbεyε tɩnaɣ sɩʋ ñɔtaa!—Sofonia 2:2, 3.

*  Yee patɩla yʋsɔ nakεyε, hɔɔlʋʋ ŋgʋ pamana Bibl taa Ebree yɔɔdaɣ taa ε-hɔɔlɩŋ weyi ɩwε takayaɣ kεnε kɔ-yɔɔ yɔ ɩlɩnɩ Takayaɣ Kiɖeɖea, Kinshasa, Verbum Bible, 1997 taa. Yee pɩkεna hɔɔlʋʋ ŋgʋ pamana Hela yɔɔdaɣ taa yɔ ε-hɔɔlɩŋ yɔ, ɩlɩnɩ Nɔɔ Haʋ Kɩfam Takayaɣ, Lomé, Alliance Biblique du Togo, 1996 taa. Yee ɩna yʋsɔɔ NW Bibl hɔɔlʋʋ nakʋyʋ cɔlɔ kεyɔ pʋtɔbʋ se kɩlɩnɩ Anglais Bibl ŋgʋ payaɣ se New World Translation of the Holy Scriptures—With References yɔ kɩ-taa.

^#  Yee ŋcaɣ ŋtasɩ nɩʋ tɔm tʋnε tɩ-taa kpayɩ kpayɩ yɔ cɔna takayaɣ ŋga Yehowa-Aseɣɖe tɩnaa lɩzaa nε payaɣ-kε se La Révélation : le grand dénouement est proche ! yɔ.