 |
Beliefs | Future | Medical | Topics | Contact Us | Publications | Languages |
Walit diγen
TIDEŢ af acu ? Af kra n yesteqsiyen imeqqṛanen i fi g-nuda si zik wemdan. Aten-ah kra seg-sen :
Anda ara tqellbem lejwab i yesteqsiyen-a ? Ma testeqsam lγaci, yal yiwen amek ara wen-d-yerr awal. U ma testeqsam amγaṛ azemni d ineḥkamen n ddyanat, aţ-ţafem lejwab-nsen mxalafen. Ayen d-ibanen yemεen ass-a di lejwab-nsen, azekka a t-yeǧǧ zzman.
Lameεna yella yiwen n wedlis d-iţţarran lejwab yuklalen leţkal. Ala tideţ i gellan deg wedlis-a. Σisa Lmasiḥ yenna di yiwet n tẓẓalit i Ṛebbi : “ Awal-ik i ţ-ţideţ. ” (Yuḥenna 17:17). Awal-agi d Adlis Iqedsen. Taweṛqeţţ-agi a wen-d-efk kra n lejwab iṣeḥḥan yerna isehlen i lefhama yellan deg Wedlis Iqedsen γef yesteqsiyen i neẓṛa uqbel.
IWACU ASTEQSI-YAGI : Neţεic di ddunit yeččuṛen d cceṛ akk-d ẓẓuṛ (lbaṭel). Aṭas n ddyanat i yesselmaden belli d Ṛebbi i gebγan a γ-ijeṛṛeb s lemḥayen.
AYEN YESSELMAD WEDLIS IQEDSEN : D lmuḥal ad yexdem Ṛebbi cceṛ. “ Ṛebbi n ṣṣeḥ Bu Tezmert, d lmuḥal ad ixdem cceṛ d lbaṭel ! ” i d-inna Yub 34:10. Ṛebbi yebγa lxiṛ i yemdanen. Af annect-a i γ-isselmed Σisa a neẓẓall akka : “ A Baba-tneγ yellan deg igenwan, [...] lḥekma n tgeldit-ik a d-tass, lebγi-k ad idṛu di lqaεa akken yedṛa deg igenwan. ” (Matta 6:9, 10). Ṛebbi yeţḥebbiṛ aṭas fell-aγ armi yexdem ayen akk ilaqen akken leqsed-is ad yeḍṛu. — Yuḥenna 3:16.
Walit diγen Laṣel n ddunit 1:26-28 ; Yeεqub 1:13 akk-d 1 Buṭrus 5:6, 7.
IWACU ASTEQSI-YAGI : Mazal Lgirrat gellunt s luluf n yemdanen. Ulac win ur tḥuz ara lmeḥna.
AYEN YESSELMAD WEDLIS IQEDSEN : Ṛebbi icar-ed af yiwen n lawan and’ara d-yawi lehna γef lqaεa meṛṛa. Ddaw Tgelda-s, lḥekma n igenwan, imdanen “ ur ḥefḍen ara lgirra ”. Lameεna, ad “ rren iskiyen-nsen ţ-ţigwersa n tyerza ”. (Iceεya 2:4.) Ṛebbi s yiman-is ad ikkes lbaṭel d lemḥayen. Adlis Iqedsen iwεed-ed : “ [Ṛebbi] a sen-yesfeḍ imeṭṭawen, ur teţţili lmut, ur yeţţili leḥzen, ur yeţţili umeǧǧed ur yeţţili lqeṛḥ axaṭer leḥwayeǧ timezwura [gar-asent lbaṭel d lemḥayen n wass-a] εeddant ur ţεawadent ara a d-uγalent. ” — Aweḥḥi 21:3, 4.
Walit diγen Ahellil 37:10, 11 ; 46:9 akk-d Mika 4:1-4.
IWACU ASTEQSI-YAGI : Lketṛa n ddyanat sselmadent belli tella lḥaǧa daxel n lεebd yeţţidiren mbeεd lmut. Kra umnen belli wid yemmuten zemren ad xedmen lexsaṛa i wid yeddren. Γuṛ-sen Ṛebbi yeţεaqab imcumen i dima deg uḥeǧǧaǧu n tmes.
AYEN YESSELMAD WEDLIS IQEDSEN : Tfuk temεict γef yemdanen m’ara mmten. “ Wid yemmuten [...] ur ẓṛin acemma ”, i d-inna Wemsegraw 9:5. Imi lmegtin ur ţḥusun, ur ẓṛin acemma, af aya ur zmiren ara ad xedmen cceṛ naγ ad εiwnen wid yeddren. — Ahellil 146:3, 4.
Walit diγen Laṣel n ddunit 3:19 akk-d Wemsegraw 9:6, 10.
IWACU ASTEQSI-YAGI : Nebγa a nεic, yerna nebγa a nesεeddi tudert-nneγ di lfeṛḥ d wid i nḥemmel. Γef ayagi i nessaram a nwali wid εzizen fell-aγ yemmuten.
AYEN YESSELMAD WEDLIS IQEDSEN : Lketṛa n lγaci yemmuten a d-kkren. Σisa yewεed “ wid akk yellan deg iẓekwan [...] a d-kkren. ” (Yuḥenna 5:28, 29). Wid ara d-yeḥyun am yemdanen ad izmiren ad εicen γef lqaεa yuγalen meṛṛa d lǧennet, am akken yella di leqsed n Ṛebbi di tazwara (Luqa 23:43). Lweεd-a n Ṛebbi ara yeḍṛun ar zdat, a d-yeglu s ṣṣeḥḥa ikemlen ţ-ţudert n dima i yemdanen yeţţaγen awal. Adlis Iqedsen yefka-yaγ-d ṭṭmana-yagi : “ Iḥeqqiyen ad kesben lqaεa, u fell-as ad zedγen i dima. ” — Ahellil 37:29.
Walit diγen Yub 14:14, 15 ; Luqa 7:11-17 akk-d lecγal 24:15.
IWACU ASTEQSI-YAGI : Wid akk yeṭṭfen di ddin ţẓallan. Lameεna, aṭas deg-sen ţḥusun am akken tiẓẓaliwin-nsen ur ţwaqeblent ara.
AYEN YESSELMAD WEDLIS IQEDSEN : Σisa isselmed-aγ belli ur ilaq ara a neḥfeḍ tiẓẓaliwin-nneγ am aman w’a sent-neţεawad. Inna-d : “ M’ara teţẓallam, ur sṭuqqutet ara lehduṛ am akken xeddmen at ddunit, γilen s lektṛa n imeslayen ara d-ţwaqeblen. ” (Matta 6:7). Ma nebγa a γ-d-issemḥes Ṛebbi, ilaq-aγ a neẓẓall am akken yebγa neţţa. Af akka, ilaq-aγ a nelmed d acu-t lebγi-s, w’a neẓẓall eεlaḥsab n wayen neεlem. Neqqaṛ di 1 Yuḥenna 5:14 : “ Ma nessuter-as kra yellan di lebγi-s, yeţḥessis-aγ-d. ”
Walit diγen Ahellil 65:2 ; Yuḥenna 14:6, 14 akk-d 1 Yuḥenna 3:22.
IWACU ASTEQSI-YAGI : Xilla n lγaci i gumnen belli, idrimen, cciεa naγ cbaḥa a sen-d-awin sseεd. Ţnadin akk γef lecγal-a, lameεna sseεd irewwel fell-asen.
AYEN YESSELMAD WEDLIS IQEDSEN : Σisa yefka-d tassaruţ n sseεd s imeslayen-a : “ D iseεdiyen wid iẓṛan d imeγban i yellan di leḥwayeǧ n ṛṛuḥ. ” (Matta 5:3, Les Saintes Écritures — Traduction du monde nouveau). Sseεd-nneγ n ṣṣeḥ a γ-d-yas ma yella nesseqneε lmeḥwiǧa-nneγ yugaren akk tiyaḍ : Tamusni n tideţ γef Ṛebbi d lmeqsud-is γuṛ-nneγ. Tideţ-a tella deg Wedlis Iqedsen. Tamusni-yinnes a γ-tεiwen akken a neεqel ayen yesεan azal ameqqṛan d wayen ur t-nesεi y’ara. Ma neǧǧa tideţ n Wedlis Iqedsen a γ-twelleh di lecγal-nneγ akk-d ṛṛay neţţaṭṭaf, tudert-nneγ aţ-ţesεu akteṛ n lmeεna. — Luqa 11:28.
Walit diγen Lemtul 3:5, 6, 13-18 akk-d 1 Timuti 6:9, 10.
Drus kan n lejwab i nmuqel deg Wedlis Iqedsen af seţţa yesteqsiyen-a. Tebγam aţ-ţlemdem akteṛ ? Bla ccek, ma tellam ger wid “ iẓṛan d imeγban i yellan di leḥwayeǧ n ṛṛuḥ ”. Ahat testeqsayem diγen : ‘ Ma Ṛebbi yeţḥebbiṛ fell-aγ, ayγeṛ iεemmed i wannect-a n cceṛ d lemḥayen seg wasmi tebda ddunit ? Amek ara seggmeγ xiṛ tudert n twacult-iw ? ’ Adlis Iqedsen yeţţarra-d awal s lekmal u s leqneε i yesteqsiyen-a d wiyaḍ meṛṛa.
Lameεna, aṭas n yemdanen i gekukran ad muqlen Adlis Iqedsen, axaṭeṛ ur t-ssinen ara yerna ur uγen ara tanumi yid-es. Tebγam a kkun-nεiwen akken aţ-ţafem lejwab deg Wedlis Iqedsen i yesteqsiyen-nwen meṛṛa ? Inagan n Yahwa a wen-d-fken sin n ţawilat.
Di tazwara, adlis Acu yesselmad s ṣṣeḥ Wedlis Iqedsen ? Yeţwaxdem akken ad iεiwen lεibad ur nesεi y’ara lweqt iwakken ad muqlen lejwab isehlen i d-yeţţak Wedlis Iqedsen af temsal timeqqṛanin. Ţawil wis sin, ţ-ţaγuṛi n Wedlis Iqedsen iwulmen i lmeḥwiǧat-nwen. Mebla lexlaṣ, yiwen n lǧ̌aṛ-nwen i g-qefzen yezmer a d-yas, yal dduṛt ar wexxam-nwen naγ ar wemḍiq nniḍen i kkun-isuεden, ad isεeddi cwiṭ n lweqt yid-wen akken a wen-d-immeslay γef Wedlis Iqedsen. D imelyan n lγaci di ddunit meṛṛa i gesfaydin s tγuṛi-yagi. Ar taggara aṭas gar-asen i g-feṛḥen u nnan : “ Ufiγ tideţ ! ”
Ulac agerruj i ţ-yifen ! Tideţ n Wedlis Iqedsen tessufuγ-aγ-d seg ukukru, si lexṛeb ţ-ţugdi n diri. Teţţak-aγ-d asirem d lmeεna i tudert-nneγ yerna teţţarra-yaγ d iseεdiyen. Σisa yefka-d lemεahda-ya : “ Aţ-ţissinem tideţ, tideţ ara kkun-issufγen γer tlelli. ” — Yuḥenna 8:32.
Teffeγ-ed di 2008 |
 |