Anwa i d Cciṭan ?

1. “ Iblis ” lmeɛna-s : d win i d-iqaṛen lekdubat af ayeḍ akken a t-iḍuṛ. Ma d awal “ Cciṭan ” : d aɛdaw naγ d axṣim. D ismawen i geţţunefken i weɛdaw ameqqṛan n Ṛebbi. Di tazwara, yella d lmelk ikemlen, deg igenwan, zdat Ṛebbi. Lameɛna, yuγal yeḥseb iman-is akteṛ n wayen i glaq lḥal ; yerna yebγa i yiman-is lɛibada yellan d ayla n Ṛebbi. — Matta 4:8-10.

2. Lmelk-agi, Cciṭan, isexdem azrem akken a s-ihdeṛ i Ḥewwa. Imi i s-iskiddeb Cciṭan, isaweḍ-iţ aţ-ţɛeṣi Ṛebbi. S waya, Cciṭan ibed d axṣim n wayen iţţusemman “ tanaya ” n Ṛebbi, naγ amkan n win Σlayen-Akk. Cciṭan ixdem taγennant i tnaya n Ṛebbi ; amzun yenna-d lḥekma n Ṛebbi ur telhi, ur tenfiɛ i yemdanen. Daγen Cciṭan isekcem-ed ccek imi yenna ulac amdan ara yiqqimen d unṣiḥ γer Ṛebbi. S wakka, Cciṭan isbed iman-is d aɛdaw n Ṛebbi. Γef aya i geţţusemma Cciṭan Iblis. — Laṣel n ddunit 3:1-5 ; Yub 1:8-11 ; Aweḥḥi 12:9.

3. S tḥila, Cciṭan yebγa ad isiweḍ imdanen a t-ɛebden neţţa (2 At Kurintus 11:3, 14). Ţţawil amezwaru s wayes i geţγuṛṛu medden d ddin l-lekdeb. Ma yiwen n ddin iselmad lekdubat af Ṛebbi, ihi ixeddem lebγi n Cciṭan (Yuḥenna 8:44). Wid i getabaɛen ddyanat l-lekdeb, ahat s wul-nsen γillen ɛebden Ṛebbi n ṣṣaḥ. Nutni, s tideţ, xedmen lebγi n Cciṭan. D neţţa i d ‘ ṛebbi n ddunit-agi ’. — 2 At Kurintus 4:4.

Ddin l-lekdeb, lesḥur d tγelnazrit ţγuṛṛun medden.

4. Lesḥur d ţţawil nniḍen s wayes Cciṭan iţarra lγaci ddaw ufus-is. Kra neddhen iṛṛuḥaniyen akken ad ḥarben fellasen, ad ḍuṛṛen wiyaḍ, aţ-ţkacafen, naγ ad xedmen lbeṛhanat. Cciṭan ţ-ţazmert tamcumt i gellan s deffir lecγal-agi meṛṛa. Iwakken a s-neɛjeb i Ṛebbi, ilaq-aγ a nexḍu maḍi i lesḥur. — Asmekti 18:10-12 ; Lecγal 19:18, 19.

5. Cciṭan iţγuṛṛu daγen imdanen m’ara ten-yawwi ad zuxxen aṭas s ccetla-nsen naγ ad ɛebden tuddsiwin tisertiyin. Kra γillen belli tamurt-nsen naγ ccetla-nsen tif tiyaḍ. Lameɛna mačči d ṣṣaḥ (Lecγal 10:34, 35). Kra nniḍen ţeklen af tuddsiwin tisertiyin u nwan ad frunt uguren n yemdanen. Wid yumnen annect-a, ur qbilen ara Tagelda n Ṛebbi, yellan ţ-ţifrat tawḥiţ i lehmum-nneγ. — Danyil 2:44.

Kemlet aţ-ţlemdem af Yahwa akken aţ-ţxaṣmem Cciṭan.

6. Ţţawil nniḍen s wayes Cciṭan iţγuṛṛu medden d ccehwat timednubin. Yahwa inehhu-yaγ a nbaɛed af lecγal imednuben axaṭeṛ yeẓṛa a γ-ḍuṛṛen (At Galasya 6:7, 8). Izmer lḥal ad bγun kra n medden aţ-ţeddum yidsen di lecγal-agi. Ihi, cfut belli d Cciṭan i gebγan aţ-ţxedmem leḥwayeǧ-agi. — 1 At Kurintus 6:9, 10 ; 15:33.

7. Cciṭan izmer ad isexdem leqheṛ naγ axaṣem akken aţ-ţeǧǧem Yahwa. Ger wid i tḥemlem ahat llan kra ara i zeɛfen axaṭeṛ teqqaṛem Adlis Iqedsen. Ahat kra nniḍen a kkun-ɛayṛen. Lameɛna i wumi teţţusayalem tudert-nwen ? Cciṭan ibγa a kkun-isiggwed akken aţ-ţḥebsem deg welmad-nwen af Yahwa. Ihi ur ţţaǧǧat ara Cciṭan ad yerbeḥ (Matta 10:34-39 ; 1 Buṭrus 5:8, 9) ! M’ara teţxaṣamem Iblis, tzemrem aţ-ţesferḥem Yahwa w’aţ-ţesbanem belli teţdafaɛem af tnaya-yines. — Lemtul 27:11.

Copyright © 2008 Watch Tower Bible and Tract Society of Pennsylvania. All rights reserved.