D acu d Tagelda n Ṛebbi ?

1. Mi gella af lqaɛa, Σisa iselmed i yinelmaden-is ad ẓallen akken aţ-ţass Tgelda n Ṛebbi. Tagelda d lḥukuma i γef yeţḍebbiṛ yiwen ugellid. Tagelda n Ṛebbi d lḥukuma s ṣṣenf iman-is. Deg igenwan i tella yerna aţ-ţeḥkem af lqaɛa-yagi. Aţ-ţqeddes isem n Ṛebbi, naγ a s t-err ṣṣfawa-yines. Syes ara yeḍṛu lebγi n Ṛebbi af lqaɛa am akken iḍeṛṛu deg igenwan. — Matta 6:9, 10.

2. Ṛebbi iwaɛed belli d Σisa ara yuγalen d Agellid n Tgelda-yines (Luqa 1:30-33). Assmi yella af lqaɛa, Σisa isban-ed belli yezmer ad yili d Aneḥkam aḥnin, aḥeqqi, akmali. Mi yuγal ar igenwan, ur t-isbed ara Ṛebbi imiren kan d Agellid n Tgelda-yines (Iɛebṛaniyen 10:12, 13). Deg useggwas 1914, Yahwa yefka-yas i Σisa lḥekma i S-iwaɛed. Seg imiren-nni, Σisa iḥekkem deg igenwan d Agellid i gesbed Yahwa. — Danyil 7:13, 14.

3. Yahwa yextaṛ daγen af lqaɛa kra n yergazen d tlawin unṣiḥen akken ad alin γer igenwan. Ad ḥekmen, akk-d Σisa ; ad ilin d igelliden, d leqwadi, akk-d lmuqedmin af imdanen (Luqa 22:28-30 ; Aweḥḥi 5:9, 10). Σisa yesemma i wid ara yeḥekmen yides “ taqeḍɛit tamecṭuḥt ”. Llan di 144 000 yidsen. — Luqa 12:32 ; Aweḥḥi 14:1-3.

4. Akken kan ibedd Σisa d Agellid iqceɛ-ed seg igenwan Cciṭan d lmalayekkat timcumin ar leǧwahi n lqaɛa. Af aya, seg useggwas 1914, lḥala texṣeṛ aṭas dagi af lqaɛa (Aweḥḥi 12:9, 12). Lfetnat, laẓ, ţţeṛkat, lqella n wid iţqadaṛen lqanun, ayagi akk d “ limara ” i d-isbanen belli Σisa yeḥkem yerna ddunit-agi tewweḍ ar wussan-is ineggura. — Matta 24:3, 7, 8, 12 ; Luqa 21:10, 11 ; 2 Timuti 3:1-5.

5. Qṛib, Σisa ad iḥaseb imdanen, a ten-ifṛeq akken i gfeṛṛeq umeksa ulli γef tγeṭṭen. ”Ulli” d wid i d-isbanen iman-nsen d unṣiḥen γer Σisa. A sen-ţunefk tudert n dayem af lqaɛa. ”Tiγeṭṭen” d wid ur neqbil ara Tagelda n Ṛebbi (Matta 25:31-34, 46). Qṛib, Σisa ad imḥu wid akk icuban ar tγeṭṭen (2 At Tiṣalunik 1:6-9). Ma tebγam aţ-ţillim d yiwet gar “ ulli ” n Σisa ilaq aţ-ţḥessem i lexbaṛ n Tgelda wa ţxedmem aɛlaḥsab n wayen i t-ţelmadem. — Matta 24:14.

Ddaw lḥekma n Σisa ur yeţţili lkeṛh, naγ taneḥyaft.

6. Ass-a ddunit tefṛeq γef xilla n tmura. Yal yiwet tesɛa lḥukuma-yines. Timura-yagi zgant ţnaγent wway gar-asent. Lameɛna Tagelda n Ṛebbi aţ-ţeṭṭef amkan n akk lḥukumat n yemdanen. Ala neţţat ara yeḥekmen af lqaɛa meṛṛa (Danyil 2:44). Imiren ad kfunt lfetnat, imenγiwen akk-d leqheṛ. Imdanen meṛṛa ad idiren lwaḥid di talwit akk-d tdukli. — Mixa 4:3, 4.

7. Di lmudda n walef iseggwasen n lḥekma n Σisa, imdanen unṣiḥen ad uγalen kemlen, u lqaɛa meṛṛa aţ-ţuγal d lǧennet. Ar taggara n walef iseggwasen-nni, Σisa ad issiweḍ ad ixdem ayen akk i s d-iḍleb Ṛebbi. Imirenni ad yerr Tagelda i Baba-s (1 At Kurintus 15:24). Ihi, acuγeṛ ur teqqaṛem ara i yemdukkal-nwen akk-d wid ɛzizen fellawen ayen ara texdem Tgelda n Ṛebbi ?

Copyright © 2008 Watch Tower Bible and Tract Society of Pennsylvania. All rights reserved.