Худайға киліскек семьялығ чуртас

1. Библияда ир семьяның пазы тіп чоохтаалча (1 Коринфянам 11:3). Иреннің пір ле ипчі поларға кирек. Чуртапчатхан странада алылған закон хоостыра ир ипчізінең хада пазын саларға кирек (1 Тимофея 3:2; Титу 3:1).

2. Ирі ипчізін позынаох чіли хынарға кирек. Хайди Иисус хайысхан позының чолынҷа парчатханнарнаң, ідӧк ирге ипчізінең хайызарға кирек (Эфесянам 5:25, 28, 29). Ирге ипчізін соғарға алай пасха даа оңдайнаң хомай хайызарға чарабас. Уламох ағаа ипчізіне аарлас, улуғлас пирерге кирек (Колоссянам 3:19; 1 Петра 3:7).

Хыныстығ паба семьязының материальнай паза духовнай кирексіністерінеңер сағыссырапча.

3. Паба кізее, семьязынаңар сағыссырап, кӱстеніп тоғынарға кирек. Ол ипчізіне паза палаларына азырал, кип-азах паза чурт читкіҷе пирерге кирек. Паба кізее семьязының духовнай кирексіністерін ідӧк толдырарға кирек (1 Тимофея 5:8). Худайны паза аның сағызын пілерге семьязына полызар ӱчӱн , ол позына устағ аларға кирек (Второзаконие 6:4—9; Эфесянам 6:4).

4. Ипчізіне ирінің ах сағыстығ полысчызы поларға кирек (Бытие 2:18). Ағаа палаларын ӱгредіп ӧскірерге иріне полызарға кирек (Притчи 1:8). Иегова ипчінің семьязынаңар хыныснаң сағыссырирын киректепче (Притчи 31:10, 15, 26, 27; Титу 2:4, 5). Ағаа позының ирінзер улуғ аарлас тударға кирек (Эфесянам 5:22, 23, 33).

5. Худай палалардаң іҷе-пабаларының сӧзін истерін сағыпча (Эфесянам 6:1—3). Ол іҷе-пабаларға палаларын ӱгредіп, тӱзедерге чахығ пирче. Iҷе-пабаларға палаларынаң хада Библияны ӱгренерге паза оларның духовнай, эмоциональнай кирексіністерін толдырарға тус табарға кирек (Второзаконие 11:18, 19; Притчи 22:6, 15). Iҷе-пабаларға палаларын хатығнаң, чабалнаң ӧскірерге чарабас (Колоссянам 3:21)

Худай іҷе-пабаларның палаларны ӱгредерін паза тӱзедерін сағыпча.

6. Хаҷан ирепчілерге удур-тӧдір килізерге сидік полчатса, оларға Библияда пирілчеткен чӧптерні тудынарға кӱстенерге кирек. Библия хынарға паза пыроны тастирға хығырча (Колоссянам 3:12—14). Худай Сӧзі тың сидік нимес киректерні чара чуртаснаң ӱзӱрерге чаратпинча. Че ипчізі ирінең піргер парыбызарға чарат салар, хаҷан: 1) ол пір дее семьязынаңар сағыссырирға хынминчатса, 2) ол позының чабалынаң аның хазиина паза чуртазына хорғыс ағылчатса, 3) хазыр тоғырланыснаң ағаа Иеговаға пазырарға пирбинчетсе (1 Коринфянам 7:12, 13).

7. Ирепчілерге удур-тӧдір киртістіг поларға кирек. Киртісті сайбааны — ол Худайның паза хоных хонғанынаң тоғыр иділчеткен чазых (Евреям 13:4). Библия хоостыра хонғанынаң чарылып, пасха хоных хонарға пір ле сылтағ пар — ол пасха кізінең чӧргені (Матфея 19:6—9; Римлянам 7:2, 3). Иегова хыртыстанча, хаҷан кізілер Библияда тӧстегі чох оңдайнаң чарылызып, пасха кізінең хоных хончатсалар (Малахия 2:14—16, СоП).

Copyright © 2007 Watch Tower Bible and Tract Society of Pennsylvania. All rights reserved.