Худай хырт кӧрчеткен киректер

1. Худай нымысчылары чахсы нимее хынчалар. Че оларға ідӧк чабалны хырт кӧрерге ӱгреніп аларға кирек (Псалом 96:10). Анзы Худай хырт кӧрчеткен нимелердең хыйаласханы полча. Хайдағ киректердең?

2. Сайбах чуртас. Хоных хонғалахтағы секс, ирепчінің киртіс чох полғаны, малнаң чатханы, чағын ханнығлар чуртааны паза ирнең ир чуртааны — Худайдаң тоғыр улуғ чазых (Левит 18:6; Римлянам 1:26, 27; 1 Коринфянам 6:9, 10). Iкӧлең, хоных хонмин ирепчі чіли, чуртапчатсалар, орта полар чара парыбызарға алай хоных хонғанын пазын саларға (Евреям 13:4).

Араға тың іскенін, оғырласты, ӧкпеліністіг ойыннарны паза кӱстегні Худай хырт кӧрче.

3. Чойланыс, ӧкпеліністіг ойыннар, оғырлас. Иегова Худай хаҷан даа чойланминча (Титу 1:2). Аның кӧңніне кірерге сағынчатханнарға ідӧк чойланмасха кирек (Притчи 6:16—19; Колоссянам 3:9, 10). Прай ӧкпеліністіг ойыннар чабдыны кӧдірчелер. Аннаңар христианнар пір дее ӧкпеліністіг ойыннар ойнабинчалар: ползын ол лотерея, бинго алай ат чарызында ахчаа марғыспинчалар (Эфесянам 5:3—5). Христианнар оғырлабинчалар. Олар оғырлаан нимені піле тура садып албинчалар (Исход 20:15; Эфесянам 4:28).

4. Тың ӧкпеленіс, кӱстег. Тудығ чох ӧкпеленіс тудысха кӧдірче (Бытие 4:5—8). Кем кӱстегнең тузаланча, ол Худайға нанӌы пол полбас (Псалом 10:6; Притчи 22:24, 25). Пірее кізі піске хомай ит салза, аннаң ӧс алғаны паза ағаа чабалнаң чабалға надырғаны орта нимес (Притчи 24:29; Римлянам 12:17—21).

5. Сыбырааны паза спиритизм. Пірее кізілер, ағырығларны имнир ӱчӱн, хуттар кӱзінзер айланчалар. Піреезі ыырҷылары ағырабыссыннар алай ӧл тее парзыннар тіп, оларға ардағ ысчалар. Прай пу нимелерні итчеткен кӱс — Сайтан. Аннаңар христианнарға пу киректерде кӧп нимес тее арласпасха кирек (Второзаконие 18:9—13). Иегованаң чағын палғалысханы сыбырағҷының чабал иткенінең ізестіг арачылас полча (Притчи 18:10).

6. Араға іскені. Кӧп нимес араға, пиво паза пасха даа итке хапчаң суғны іскенінде саба ниме чоғыл (Псалом 103:15; 1 Тимофею 5:23). Че кӧп іскені паза чуулғаны — Худай хараанда чарабас ниме (1 Коринфянам 5:11—13; 1 Тимофею 3:8). Арағаны иртіре іскені хазыхты даа тӱзірер паза семьяны даа сайбир. Анаң пасха тудығы чох хатығ араға ісчеткен кізі ӧң-пасха хыҷалынысха оой кір парча (Притчи 23:20, 21, 29—35).

7. Худай хомай тіп санапчатхан киректернең теесчеткен кізілер «Худай Царствозына кірбестер» (Галатам 5:19—21). Сынап, син Худайға хынчатсаң паза аның кӧңніне кірерге хынчатсаң, син ол киректердең хыйа тур поларзың (1 Иоанна 5:3). Ӱгрен Худай харағында хомай нимелерні хырт кӧрерге (Римлянам 12:9). Худайға чарас кибірліг кізілернең аралас (Притчи 13:20). Христианскай чуртаста пысхан нанҷылар сағаа полыс поларлар (Иакова 5:14). Худайның полызиина матап ізен, ағаа пазыр (Филлипийцам 4:6, 7, 13).

Copyright © 2007 Watch Tower Bible and Tract Society of Pennsylvania. All rights reserved.