Чуртасты паза ханны улуғлааны

1. Иегова — чуртас Пазы. Прай тіріг нимелер Худай сылтаанда тыннығлар (Псалом 35:10). Худайның хараанда чуртас священнай. Тӧреелек тее паланың чуртазын Иегова аарлығ тіп санапча. Ӧсчеткен тӧлні ӧдіргені Худай хараанда чабал кирек полча (Исход 21:22, 23; Псалом 126:3).

Худай кӧңніне кірер ӱчӱн, піске хан урдырарынаң, арығ нимес кӧнігістердең паза кирек чохха айанминчатханнаң хыйалазарға кирек.

2. Сын христианнар хорғыс чохха кӱстенчелер. Олар постарының машиналарында чӧрерге паза тураларында чуртирға хорғыс чох ползын тіп кӱстенчелер (Второзаконие 22:8). Худай нымысчылары, кирек чохха позы ла хынигіп алай чӱрек чилістірер ӱчӱн, постарының чуртазын хорғысха сухпинчалар. Аннаңар олар кізее ӱрег ағылчатхан кӱстегліг спорт ойыннарында араласпинчалар. Олар кӱстег чарадылчатхан ӱтестердең хыйаласчалар (Псалом 10:5; Иоанна 13:35).

3. Аң-хустарның даа чуртазы Чайаанның хараанда священнай. Посха чіҷең нимені паза кип-азахты тимнир ӱчӱн, ідӧк ағырығларны паза хорғыстарны хыйа идер ӱчӱн христианнарға аң-хустарны ӧдірерге чарапча (Бытие 3:21; 9:3; Исход 21:28). Че аң-хустарны иреелеені паза оларны спорт хыринаң алай алҷаастанар ӱчӱн ӧдіргені саба кирек полча (Притчи 12:10).

4. Христианнарға тамкы тартарға паза кӧңнін толдырар ӱчӱн наркотик аларға чарабинча. Андағ кибірлер 1) кӧніктірчелер, 2) организімге ӱрег ағылчалар паза 3) пуртахтар, аннаңар — хомайлар (Римлянам 6:19; 12:1; 2 Коринфянам 7:1). Андағ кибірлердең позып аларға сидік полча. Че Иегованың кӧңніне кірер ӱчӱн, позирға кирек.

5. Хан ідӧк Худай хараанда священнай. Худай ханда тын алай чуртас тіпче. Ханны чирге чарабинча. Iдӧк ханы тооза ахпаан мал идін чирге чарабинча. Сынап, аң моонҷахта алай хахпанда моон парған полза, аның идін чирге чарабас. Аңны сасханаң хазабысса алай мылтыхнаң атыбысса, аның ханын табыраанҷа ағызыбызарға кирек, анаң на аның идін чирге чарир (Бытие 9:3, 4; Левит 17:13, 14; Деяния 15:28, 29).

6. Кізее чи хан урдырарға чарабас па? Ундуба: Иегова пістің ханнаң хыйа тудынарыбысты киректепче. Анзында піске хайдағ даа оңдайнаң пасха кізінің ханын посха аларға чарабазы кӧрінче. Iдӧк постың даа ханын, пасха чирде чыылған полза, аларға чарабас (Деяния 21:25). Аннаңар сын христианнар постарына хан урдыртпинчалар. Олар чаратчалар постарын пасха оңдайнаң имнирге, кӧзідімге алза, ханнаң итпеен имнерні урарға. Христианнар чуртирға хынчалар, че олар постарының чуртастарын, Худай законнарын тобырып, арачылирға кӱстенместер (Матфея 16:25).

Copyright © 2007 Watch Tower Bible and Tract Society of Pennsylvania. All rights reserved.