GISUGISHILO GIA GIKOMBELELO GIA MAMBO GIDI HEHI!

Wanavua lamba gu mutshima ha gumona athu mutshita ndaga jia khuta mu jina dia gikombelelo Bakristu? Wanavua gubola mukunda nu ita, giterorisme, nu gabatshi’akano gadi athu muhana, uvi athu ene anazuel’egi adi akombeledi Bakristu? Mukunda natshi gikombelelo gianamonega gifua gidi gishina gia malamba avula ngegi?

Gubola gushigo nu ikombelelo yagasue ndo, uvi gudi gua gikombelelo gia mambo. Muenya gikombelelo gimoshi yago athu ananemesa muavula, Yesu Kilisto, wazuelele gamba gikombelelo gia mambo gianabemba athu agio mutshita midimo yabola, gifua muho “mutshi wagasue wabola udi [muhaga] mabundu abola.” (Matayo 7:15-17) Mabundu tshi gikombelelo giabola gianahaga?

Gikombelelo gia Mambo . . .

GIANAGUGUDINGINYISA MU ITA NU MU NDAGA JIA POLITIGI: Jurnale, Asiaweek imuzuela gamba, “Gukhanda jia Asia nu mu ifutshi iko mafumu anatshigina gukhala nu ufumu wakoma anatuma enya ikombelelo mu ndunge jiawo jiabola ha gutshita mubulu mukunda nu gutagenesa ima I adi nayo funu.” Hagusugisa, Jurnale yene imuzuel’egi: “Mavu agasue adi hehi nu gubola sha.” Fum’ia gikombelelo mumoshi wakoma wa gu Etas-Unis wazuelel’egi: “Hagula bateroriste abembe gushiya athu, sendesenu gu’ashiya.” Matangi’enji akhalel’egi: “Bateroriste agasue a shiyiwe mu jina dia Nzambi.” Uvi Bibilia id muzuela gamba: “Gula muthu wazuel’egi: ‘Ngazumba Nzambi,’ hadi muene you nu phanji’enji umbalagaji, udi muenya mambo.” (1 Yone 4:20) Yesu nji wazuelele gamba: “Nzumbienu adi n’enu umbalagaji.” (Matayo 5:44) Yadiago, athu a ikombelelo yavula sha ana gudinginyisa mu ita.

GIANALONGESA MALONGO A MAMBO: Ikombelelo yavula yanalonges’egi monyo nga muhehe wa monyo wanazoga mu muila wa muthu hadi muene mufwa. Mukunda nu malongo awa ikombelelo yavula yanalomba athu ayo falanga hagukombelela mukunda nu mionyo yawo. Uvi, Bibilia ishigo mulonga ngenyi. ‘[Monyo, NW] udi mutshita ndaga jiabola, wene mbawufua.’ (Ezekiele 18:4, NW) “Athu a monyo adi mujiya egi adi mufua, uvi athu a gufua gashigo mujiya gima.” (Mulongeshi 9:5) Yesu walongesele gamba athu a gufua baafuzumuga––mbimbi’eyi ishigo nu ndando gula athu anakhala nu monyo uu wanalagufua ndo. (Yone 11:11-25) Gikombelelo gienu gianalongesa gamba monyo wanafuago bo?

GIANABEMBA ATHU MUTSHITA UTHAMBI: Mu ifutshi yavula, ikombelelo yanatumbamesa miphe yago yanatshita uthambi mala-mala nga akhetu-akhetu nunji anatoga mbula-matadi hagutshigina mahata a mala-mala nga akhetu-akhetu. Ngatshima ikombelelo yanatuna uthambi, uvi yanabemba mafumu ayo a anabandesa ana azonda mu ikombelelo yao. Uvi, Bibilia idi mulongesa itshi? Idi mumonegesa haphelo gamba: “Mudihuigigo: enya uthambi, nga akombeledi a isongo, nga enya mahata abola, nga mala adi mudijiya nu mala . . . mbagahinganago ufumu wa Nzambi.” (1 Kolinto 6:9, 10) Udi mujiya ikombelelo yanatshuigago meso gu uthambi Bakristu?

Itshi mbaibuila ikombelelo yanahaga mabundu abola? Yesu wazuelele gamba: “Mutshi wagasue udi ushigo [muhaga] mabundu abonga mbawubatuiwa, mbawumbiwa mu tshuya.” (Matayo 7:19) Ai, gikombelelo gia mambo mbagibuishiwa nu gumwangewa sha! Uvi ndag’eyi mbaitagana luholo tshi nu kumbi tshi? Mbimbi yalondoluele ngambi ya Nzambi mu mukanda wa Yatuwuwe, mukhapho wa 17 nu wa 18, idi gututaya mu ndag’ei.

Luholo tshi gikombelelo gia mambo mbagisuga?

Tangiza luholo ndaga mbajibalega. Mukhethu ya thambi udi yaguditumbiga holu dia shitu imoshi ikwatesa woma. Shitu yene idi nu mito sambadi nu mbinga kumi. (Yatuwuwe 17:1-4) Mukhetu ya thambi udi mukotelesa nanyi? Mukhetu muene udi “muhinyina mafumu a ha mavu.” Udi wagusudiga milele ya bonga ya linene ya benguluga, ya suwa nu ilababa, mitshi ya vumba diabonga ya miho yagasue nunji udi nu umonyi wavula. Luangiadi, mukunda nu ilumbelumbe yenji, udi ‘muhuiga athu agasue.’ (Yatuwuwe 17:18; 18:12, 13, 23) Bibilia idi gutukuatesa hagujiya egi mukhetu ya thambi you udi thundu ya ikombelelo ya ha mavu agasue. Ishigo mudijigago gikombelelo gimoshi, uvi ikombelelo yagasue ii yanahaga mabundu abola.

Shitu idi mukhetu ya thambi yaguditumbiga, idi uhinyinyi wa politigi wa mavu a mudidi.* (Yatuwuwe 17:10-13) Gikombelelo gia mambo gidi giaguditumbiga holu dia shitu ii ya politigi, ha guhinyina matangi ayo nunji ha guituameza.

Uvi, gualeha ndo, ndaga imoshi yagushimana mbaidi mubua. “Mbinga kumi jiwamuenene, jiene nu shitu mbajikhala nu thambi umbalagaji, mbajimubambumuna ima yagasue yadi n’ayo, mbajimubuisa gituhu nu ithowa, mbajidia mbiji ya muila wenji, mbajimukonda tshuya.” (Yatuwuwe 17:16) Mu gisagumuisa, ndaga ya lamba mbaibua, uhinyinyi wa politigi wa ha mavu agasue mbaubalumugila gikombelelo gia mambo nunji mbagikuluga sha! Nanyi mbautuma uhinyinyi wa politigi hagutagenesa ndag’eyi? Mukanda wa Yatuwuwe udi mutaya gamba: ‘Nzambi mbauhaga matangi mu mitshima yawo, hagutagenesa matangi enji.’ (Yatuwuwe 17:17) Ai, Nzambi mbaumulomba mukudi gudi gikombelelo gia mambo mukunda nu ndaga jiabola ji gidi mutshita mu jina dia Nzambi. Mu ungambi wenji watagana, Nzambi mbautuma makangu’agio a politigi ha gugikulula sha.

Itshi udi naye gukalagala gula watshigin’egi malamba mbaabwila gikombelelo gia mambo agukuatshigo? Mutumiwi wa Nzambi udi muzuel’egi: “Athu ami, katugienu gudi muene.” (Yatuwuwe 18:4) Ai, didi kumbi dia guzoga sha mu gikombelelo gia mambo! Uvi gudi nanyi wajiya gulengela? Ishigo gudi aphagano, mukunda ene nji ashigo nu gudifelela. (2 Tesalonike 1:6-9) Fundo dia gudisuega didi khuta gudi gikombelelo gia giamatshidia. Luholo tshi aye gujiya gikombelelo gia giamatshidia?

Luholo lua gujiya gikombelelo gia giamatshidia

Mabundu tshi gikombelelo gia giamatshidia gidi naye guhaga?––Matayo 7:17.

Gikombelelo gia Giamatshidia . . .

GIANAJIYIWA MU GUZUMBA: Akombeledi a giamatshidia “gashigo a ha mavu,” anagudikhaphago mukunda nu ilema ya mwila nga makalegelo, anamonegesa “guzumba mukatshi diawo.” (Yone 13:35; 17:16; Makalegelo 10:34, 35) Hafundo dia gudishiya ene ene, anakhala hehi ha gufua mukunda nu athu ako.––1 Yone 3:16.

GIANASHA MUTSHIMA GU MBIMBI YA NZAMBI: Hafondo dia gulongesa ‘mikhuala ya athu,” gikombelelo gia giamatshidia gianazula malongo agio mukatshi dia Bibilia, Mbimbi ya Nzambi. (Matayo 15:6-9) Mukunda na’tshi? Mukunda “mbimbi jiagasue jia mu mukanda wa Nzambi jiafundjishiwe gudi Nzambi, nu jidi jiatagana ha gulongesa giamatshidia, ha gutungumuna gujimbila gua athu, nu ha gubela.”––2 Timote 3:16.

GIANAKOLESA MAJIGO NU GIANATSHITSHILA MIKHUALA YA NZAMBI: Gikombelelo gia giamatshidia gianalongesa mala ha “guzumba akaji’awo gifua mudi ene muzumba mila yawo,” gianakuatesa akhetu a mahata ha ‘gunemesa alumi’awo,’ nunji gianalongesa ana ha ‘gutumageela abutshi awo.’ (Efeso 5:28, 33; 6:1) Luangiadi, athu ago adi mambuta a mahungu, adi naye gukhala gifezegeselo giabonga mukunda nu athu ako.––1 Timote 3:1-10.

Gudi nu gikombelelo gianatagenesa mikhual’eyi Bakristu? Mukanda, Holocaust Politics wazolewe mu 2001, umuzuela gamba: “Alondolodi a Yehowa analongesa nu anakalagala idi ene mulongesa. Ngenyi gula athu adi mulandula ndaga jia Alondolodi, ajiyilego gushiya athu avula mu mbala imoshi haguhana gikenene mu ifutshi yagasue.”

Yadiago, mu membo 235, Alondolodi a Yehowa analongesago khuta mikhuala ya Bibilia, uvi anaguinemesa nji mu makalegelo awo. Tuagutoga ha guhula Alondolodi a Yehowa ha gugu kuatesa aye gulonguga ndaga jidi Nzambi gugulomba hagula wajiya gumukombelela muluholo ludi mutshigina muene. Kumbi dia guhula dienyedi, ushiphigo. Gisugishilo gia gikombelelo gia mambo gidi hehi!––Sefanya 2:2, 3.

*  Hagukotelesa ndag’eyi, tanga mukanda La Révélation, le grand dénouement est proche! Wazolewe gudi Alondolodi a Yehowa.