 |
Beliefs | Future | Medical | Topics | Contact Us | Publications | Languages |
Tala nu
GIAMATSHIDIA giatshi? Gimutalela mihu ya balega ndando yanagudihula athu. Mahugo ako wadihudile gale mihu gifua ii:
Gui wajiya guheta jimvutu jia mihu ii? Gula waya mu jinzo jia natangewa mikanda nga mu jifundo jia nadigiwa mikanda, wajiya gusanga mikanda yavula yanamonesa egi yajiya guhana jimvutu jia mihu ii. Uvi ndaga jia nazuela mikanda yene jianaguditagenesago. Mangino athu ajia gutshigina ndaga jia nazuela mikanda yene uvi hangima anagojituna luko, nunji anagojibalumuna hagujihingisa nu matangi ako.
Uvi, gudi nu mukanda ungoshi udi nu jimvutu jia gushila mutshima. Udi mukanda wagiamatshidia. Yesu Kilisto wawambele Nzambi mu gisambu egi: “Mbimbi yaye idi giamatshidia.” (Yone 17:17) Mamino uu tanatamega Mbimbi yene egi Bibilia ya Santu. Umuheta jimvutu jia puelele nu jiamatshidia jia mihu ii mu gamukanda gaga.
MUKUNDA NATSHI GHULA MUHU UU: Tumujinga hosha mavu azala nu khuta nu lutondo. Ikombelelo yavula yana longa egi Nzambi wanatshigina egi tumone malamba.
BIBILIA DIDI MULONGA EGI: Ndaga jiabola jianokatugago gudi Nzambi nga hazonda. Yobo 34:10 imuzuela egi: “Nzambi gashigo mutshita ndaga yabola, Nzambi wa Ngolo Jiagasue ganatshitago milonga idi ishigo handuelu.” Nzambi udi nu lukhanu lua guzumba mukunda nu athu. Hene Yesu watulongele hagukombelela egi: “Tata udi mu dilu . . . Ufumu waye uze, gutshigina guaye gutshitshiwe ha mavu, gifua mugudi mutshitshiwa mu dilu.” (Matayo 6:9, 10) Nzambi wana gututangijila muavula diago hene ahanene gima gia ndando ya kola mukunda nu gulungisa lukhanu luenji.—Yone 3:16.
Tala nu Gisendeselo 1:26-28; Yakoba 1:13; nu 1 Phetelo 5:6, 7.
MUKUNDA NATSHI GUHULA MUHU UU: Ita imushiya athu avula diago. Malamba anagutubuila khungi etu agasue.
BIBILIA DIDI MULONGA EGI: Nzambi wazuelele egi gudi nu kumbi dimoshi mba umusha guhuima hamavu agasue. Mu Ufumu wenji, nga uhinyinyi wa gosa, athu “mbagadilondjigo ha guya mulua ita.” Uvi, “phogo jiawo jia khusa, ene mbajifula matemo a gudimina.” (Yeshaya 2:4) Nzambi mbaumanesela lutondo nu malamba agasue. Bibilia imuhana laji egi: “[Nzambi] mbawukungula masoji agasue gu meso awo, gufua mbagukhadigo luko. Madilo gashigo mukhala luko nga mitataganyi nga gubala, ndaga ya ndaga jia gudiangela [gifua lutondo nu malamba] jiahua.”—Yatuwuwe 21:3, 4.
Tala nu Ngimbo 37:10, 11; 46:9; nu Mika 4:1-4.
MUKUNDA NATSHI GUHULA MUHU UU: Ikombelelo ya vula ya hamavu yana longa egi gima gingoshi gianakhala mukatshi dia muthu gianasala nu monyo hagufua. Athu ako anazuela egi athu agufua ajiya gutshita athu adi nu monyo gubola. Anazuela luko egi athu abola anamonesawa malamba mutshuya tua bala tua milungi ivuo nu ivuo.
BIBILIA DIDI MULONGA EGI: Kumbi dianafua muthu, lujingu luenji luano suga. Mulongeshi 9:5 umuzuela egi: “Athu a gufua gashigo mujiya gima.” Mundaga ya athu a gufua ajiilego gujiya, nga guvua, nga gumona gimago, ajiilego gutshita athu amonyo gubola nga guakuatesa.—Ngimbo 146:3, 4.
Tala nu Gisendeselo 3:19 nu Mulongeshi 9:6, 10.
MUKUNDA NATSHI GUHULA MUHU UU: Tuanatshigina gujinga, nunji tuanatshigina gujinga nu gusuanguluga nu athu anyi tuanazumba. Hene ishi matangi abolago egi tukale nu nzala ya bala ya gumona luko athu tuanazumba anyi afuile gale.
BIBILA DIDI MULONGA EGI: Athu avula anyi afuile gale mbamufuzumuga. Yesu wahanene laji egi: “Agufua agasue adi mu ndumba . . . mbazuga mu ndumba jiawo.” (Yone 5:28, 29) Hagutagana nu lukhanu diagishina dia Nzambi, athu anyi mbafuzumuga mbakhala nu luholo lua gujinga ivuo nu ivuo mu phaladiso dia hamavu. (Luka 23:43) Athu atumaga anyi mbajinga lujingu luene mu masugu adi muza, mbakhala nu muila watagana nu lujingu lua ivuo nu ivuo. Bibilia dimuzuela egi: “Athu abonga mbahingana mavu, nu mbakhala hene ivuo nu ivuo.”—Ngimbo 37:29.
Tala nu Yobo 14:14, 15; Luka 7:11-17; nu Makalegelo 24:15.
MUKUNDA NATSHI GUHULA MUHU UU: Athu a ikombelelo yagasue ana kombelela. Uvi, athu avula anatangiza egi Nzambi ganahanago mvutu gu isambu yawo.
BIBILIA DIDI MULONGA EGI: Yesu watulongele egi tukadigo muvutuila ndaga jingoshi mu isambu yetu. Muene wazuelele egi: “Hamudi mukombelela Nzambi, muzuedigo [ndaga jingoshi mbala nu mbala, NW].” (Matayo 6:7) Gula tuatshigina egi Nzambi ahane mvutu gu isambu yetu, tudi naye gukombelela luholo luanatshigina muene. Hagutshita ngenyi, tudi naye gulongoga itshi yanatshigina Nzambi, gungima tuajiya gukombelela luholo lanatshigina muene. 1 Yone 5:14 imulondolola egi: ‘Gula tudi mulomba nga gimatshi gifua mudi mutshigina Nzambi, muene udi mutuvuila.’
Tala nu Ngimbo 65:3; Yone 14:6, 14; nu 1 Yone 3:22.
MUKUNDA NATSHI GUHULA MUHU UU: Athu avula anatangiza egi fualanga, lukuma, nga gubonga gua meso mbaguabatela gusuanguluga. Hene, anakamba gukala nu ima yene, uvi anahetago gusuanguluga guene.
BIBILA DIDI MULONGA EGI: Yesu wamonesele gima gianabata gusuanguluga kumbi gazuelele egi: “Gusuanguluga gudi gudi athu adi mujiya egi adi aphutu mugipheve.” (Matayo 5:3, NW) Tuajiya guheta gusuanguluga guagiamatshidia khuta gula tuatshita mangolo hagulungisa nzala yetu ya gujiya giamatshidia gia Nzambi nu lukhanu luenji mukunda nu esue. Giamatshidia giene gidi mukatshi dia Bibilia. Gujiya giamatshidia giene guajiya gutukuatesa hagukotelesa ndaga jinyi jidi nu ndando yavula, nu jinyi jishigo nu ndando. Gula tuabemba egi giamatshidia gia mu Bibilia gituameze malukhanu nu midimo yetu, lujingu luetu mbalumukhala luabonga.—Luke 11:28.
Tala nu Ishima 3:5, 6, 13-18 nu 1 Timote 6:9, 10.
Tuatalela khuta hazonda jimvutu jinyi jimuhana Bibilia gu mihu isamano idi mu gamukanda gaga. Watshigina gujiya luko ndaga jiavulaba? Gula udi mukatshi dia athu anyi “adi mujiya egi adi aphutu mugipheve,” yadyago udi phutu sha. Wajiya gudihula mihu iko gifua ii: ‘Gula Nzambi wanagututangijila, mukunda natshi wabemba egi gubola nu malamba avula akhale mulujingu lua athu? Luholotshi ngajiya gubongesa lujingu lua fami yami?’ Bibilia didi muhana jimvutu jiagusuangulusa gu mihu ii nu iko yavula.
Uvi, athu avula mamino akhala nu giphapha hagukamba jimvutu mu Bibilia. Anamona gifua Bibilia yabalega gukoma hagukotelesa makumbi ako. Watshigina muthu agukuatese haguheta jimvutu jidi mu Bibilia ba? Alondolodi a Yehowa ajiya gugukuatesa mu maluholo ayadi.
Luholo luathomo ludi lua gutanga gamukanda Wajiya Gubwa Futa dia Nzambi! unu wasonegewe hagukuatesa athu adi nu midimo yavula hagula egi ahete jimvutu jia puelele ji muhana Bibilia gu mihu ya ndando. Luholo lua ngiadi ludi lua guhata programa ya githugu ya gulongoga Bibilia gu inzo. Mulondolodi mungoshi wa Yehowa yonu wanajinga hehi nu aye nunji walunga gulongesa Bibilia wajiya guza gu inzo yaye nga gufundo diko diatagana, hagulongoga naye Bibilia kumbi diazonda konso phoso. Athu avula hamavu agasue adi muhata guprograma ii. Avula mukatshi diawo azuelele nu gusuanguluga egi: “Nga heta diago giamatshidia!”
Gimvuama gigi giabelega ivuama yagasue gu ndando. Giamatshidia gia Bibilia gianagutukula mu uhiga washigu jia mambuta jia woma, malongi a tunga-tunga, nu woma weshi gishina. Yana gutuhua felela, lukhanu, nu gusuanguluga. Yesu wazuelele egi: “Mbamujiya idi yagiamatshidia nu idi yagiamatshidia mbayimikula mu uhiga.”—Yone 8:32.
Ya zolewe mu 2008 |
 |