Nzambi Udi Nanyi? - Site ya Internet ya Alondolodi a Yehowa ii Idi Mujiyiwa

Site ya Internet ya Alondolodi a Yehowa ii Idi Mujiyiwa

Beliefs

Future

Nzambi Udi Mutulomba Gima Tshi?

Longi dia 2

Nzambi Udi Nanyi?
	Nanyi udi Nzambi wa giamatshidia, nunji jina dienji nanyi? (1, 2)
	Udi nu muila wa luholotshi? (3)
	Tanga ikalulu yenji yabonga. (4)
	Tuajiya gusadila ikhokho nga ifuanesa ha gumukombelela ba? (5)
	Tanga njila jiyadi jo tuajiya gujiila ndaga jia Nzambi. (6)

1. Athu adi mukombelela ima yavula ya luholo nu luholo. Uvi bibila didi mutuleza egi NZAMBI wa GIAMATSHIDIA udi kaka mumoshi. Mwene wafugile ima idi mudilu nu idi hamavu. Mukunda mwene watuhuile monyo, mwene hakhenji tudi naye gukombelela.—1 Kolinto 8:5, 6; Yatuwuwe 4:11.

2. Nzambi udi nu matamegelo avula a gumunemesa uvi udi nu jina dimoshi. Jina dienji YEHOWA. Mu mabibila ako avula, akatshuile jina dia Nzambi nunji hafundo diene ahingishile majina gifua FUMU nga NZAMBI. Uvi mukumbi dia sonegewe Bibila jina dia Yehowa diakhalele mbala gubalega 7 000!—Guzoga 3:15; Ngimbo 83:18.

3. Yehowa udi nu muila, uvi muila wenji ushi gifua wetu ndo. Bibila dimuzuela egi “Nzambi udi Givule.” (Yone 4:24) Givule gidi luholo lua lujingu lumoshi luabalega luetu. Gushigo ata muthu mumoshi ndo wamonele gale Nzambi. Yehowa udi mudilu, uvi wanumona ima yagasue hashi hamavu. (Ngimbo 11:4, 5; Yone 1:18) Givule gia bonga gidi itshi? Gishigo muthu ndo, uvi gidi ngolo jia Nzambi.—Ngimbo 104:30.

4. Bibila didi mutudijiga gimuthu gia Yehowa. Didi mutudijiga egi ikalulu yenji ya bonga idi guzumba, ungambi, gutema, nu ngolo. (Mikhuala 32:4; Yobo 12:13; Yeshaya 40:26; 1 Yone 4:8) Bibila didi muzuela luko egi udi mwenya khenda, wabonga mutshima, wanutotesela athu, wahana nu wabwisa mutshima. Gifua anenji alemvuga, tudi naye gulandula muho wenji.—Efeso 5:1, 2.

Tuano longuga ndaga jia Nzambi mu njila ya ima ya hangele nu mu njila ya Bibila

5. Idi yabonga hagufugamena nga gukombelela ikhokho nga ifuanesa mu gukombelela guetu ba? Ndo! (Guzoga 20:4, 5) Yehowa umuzuela gamba tudi naye gumukombelela kaka mwene hakhenji. Mba gajiile ndo gukhapha lutumbu luenji nu muthu muko nga nu gima giko. Ikhokho ishi nu ngolo jia gutukuatesa ndo.—Ngimbo 115:4- 8; Yeshaya 42:8.

6. Luholotshi tuajiya gujiya Nzambi muabonga sha? Njila ya thomo idi ya gutala ima yafugile nu gutangiza muavula itshi ima yene idi gutulonga. Ima yahangele Nzambi idi gutudijiga gamba Nzambi udi muenya ngolo jia vula nu mayele. Tuano mona guzumba guenji mu ima yagasue yahangele. (Ngimbo 19:1-6; Lomo 1:20) Njila iko i tuajiya gulongoga muabonga hagujiya Nzambi idi gulonguga Bibila. Mukatshi dia Bibila, Nzambi udi mutulonga ndaga jiavula mukunda tujiye nga udi Nzambi wa luholotshi. Nunji wanu gutuwambela luzolo luenji nu itshi yadi mutshigina tutshite.—Amosa 3:7; 2 Timote 3:16, 17.

Ya zolewe mu 2000
Copyright © 2006 Watch Tower Bible and Tract Society of Pennsylvania. All rights reserved.