Diabulu Udi Nanyi?

1. Jina “Diabulu” didi mudijiga muthu wanuzuela ndaga jia mambo mukunda nu muthu muko. Jina “Satana” didi mutendula mbenyi. Wawa adi majina anutamegewa mbeni ya Nzambi. Thomo, wakhalele muanjelo watagana mu dilu nu Nzambi. Uvi gunyima, matangi enji ayandigile gumutuma hagukamba lutumbu luanu hanewa khuta gua Nzambi hakhenji.—Matayo 4:8-10.

2. Muanjelo you, Satana, wazuelele gudi Eva munjila ya nyoga. Wamudimbile, ngenyi wamutumine ha gushaga Nzambi. Satana wahagele giphapha nu “gifumu” gia Nzambi, nga gifumu gienji gia gukhala Mwenya-Ngolo Jiagasue. Satana wazolele giphapha egi Nzambi gono hingana athu enji mwabonga ndo nunji wanoguamina ima iko ya bonga. Satana wahaile luko giphapha egi gushigo ata muthu mumoshi wajiya gulemvugila Nzambi tangua diagasue. Muluholo lununu, Satana wadibwishile mbenyi ya Nzambi. Hene ganutamegewa egi Satana Diabulu.—Gisendeselo 3:1-5; Yobo 1:8-11; Yatuwuwe 12:9.

3. Satana wanumega gunana athu ha gumusambela. (2 Kolinto 11:3, 14) Mukatshi jia njila jianusadila mwene muavula tuajiya gutanga ikombelelo ya mambo. Gula gikombelelo gidi mulonga ndaga jia mambo mukunda nu Nzambi, gidi diago musadila luzolo lua Satana. (Yone 8:44) Athu adi mu ikombelelo ya mambo ana mona gifua adi mukombelela Nzambi wa giamatshidia. Uvi yadiago anu salela Satana sha. Mwene udi ‘nzambi ya hamavu wawa.’—2 Kolinto 4:4.

Ikombelelo ya mambo, gipheve, nu guzumba muavula dimbo dienji guanu dimbaathu

4. Gipheve gidi njila iko idi musadila Satana haguhaga athu mu uhiga wenji. Athu ako anotamega ivule ya bola nga ndele haguabamba, haguloa ako, hagudijiga ndaga jidi muza gutuama, nga gutshita ima ya gudihula. Satana udi ngolo giabola jianukhala gungima dia makhalegelo wawa agasue. Hagusuanguluisa Nzambi, tudi naye gubemba gudivua nu ivule ii ya bola.—Mikuala 18:10-12; Makalegelo 19:18, 19.

5. Satana wanutuma athu ako haguzumba muila wawo mwavula nu gukombelela imvuga ya politiki. Athu ako anumona gifua dimbo diawo nga mwila wawo wabalega wa athu ako. Uvi ishi ngenyi ndo. (Makalegelo 10:34, 35) Athu ako adi mulomba guenya politiki hagula abongese ndaga jiathu. Hagutshita ngenyi, adi mutuna Ufumu wa Nzambi. Gifumu gia Nzambi giene phamba mbagiza mumanesela malamba etu agasue.—Daniele 2:44.

Gula walandula gulonguga ndaga ji mutalela Yehowa, mbo mununga Satana

6. Njila iko yanusalela Satana hagudimba athu idi ya guatuma hagutshita ndaga jia masumu. Yehowa udi mutuleza egi tubishile midimo ya masumu mukunda yajiya gututshitshila gubola. (Galatiya 6:7, 8) Athu ako ajiya guulomba hagudibungisa nawo mu midimo ya luholo lulu. Ujimbilago egi Satana udi mutshigina egi utshite midimo ii.—1 Kolinto 6:9, 10; 15:33.

7. Satana wajiya gugunyogola nga gugunethela umbalagaji hagula ubembe gukombelela Yehowa. Athu wanu zumba muavula ajiya guuvila khabu jia vula mukunda wayandiga gulongoga Mbimbi ya Nzambi. Ako ajiya gogusebulula. Uvi, gudi nanyi wajiya guhana monyo waye? Satana udi mutshigina goguhua woma hagula ubembe gulonguga hagujiya ndaga jidi mutalela Yehowa. Ubembigo Satana agununge! (Matayo 10:34-39; 1 Phetelo 5:8, 9) Gula wanunga Diabulu, wajiya gusuanguluisa Yehowa nunji mbodijiga egi udimuhana lutumu gudi ufumu wenji.—Ishima 27:11.

Copyright © 2006 Watch Tower Bible and Tract Society of Pennsylvania. All rights reserved.