Lujingu Lua Fami Ludi Musuanguluisa Nzambi

1. Bibila didi muzuela gamba yala udi fumu ya fami yenji. (1 Kolinto 11:3) Yala udi naye ya gukhala nu mukhetu kaka mumoshi. Mahata awo adi naye ya gusonegesewe gutuama dia leta.—1 Timote 3:2; Tito 3:1.

2. Yala udi naye ya guzumba mukanjienji gifua hana zumba muila wenji. Udi naye guzangula mukanjienji gifua hakhalele Yezu muzangula alandudi enji. (Efeso 5:25, 28, 29) Gajiilego gubeta mukajienji nga gumumonesa dilamba ata hazonda. Udi naye ya gumuhua lujitu nu lukumu.—Kolosai 3:19; 1 Phetelo 3:7.

Tata wanuzumba fami yenji wanoguadisa mu mwila nu mu gipheve

3. Tata udi naye gukita mudimo hagudisa inzo yenji. Udi naye gukambela mukajie’nji nu ane’nji ima ya gudia, milele nu fundo dia gubanda dia bonga. Tata udi naye luko gulonga ndaga jia gipheve mu fami yenji. (1 Timote 5:8) Udi naye gutuameza inzo yenji hagulongoga gujiya Nzambi nu luzolo luenji.—Mikuala 6:4-9; Efeso 6:4.

4. Mukhetu udi naye gukhala mukuateshi wabonga gudi mulumienji. (Gisendeselo 2:18) Udi naye gukuatesa mulumienji hagulonga ana. (Ishima 1:8) Yehowa udi mulomba mukhetu hagutala inzo yenji nu guzumba guagasue. (Ishima 31:10, 15, 26, 27; Tito 2:4, 5) Udi naye gujitisa mulumienji nu gumunemesa.—Efeso 5:22, 23, 33.

5. Nzambi umulomba gudi ana hagulemvuga gudi ibutshi yawo. (Efeso 6:1-3) Udi mulomba ibutshi hagulonga anawo mwabonga. Ibutshi idi naye gubongesa kumbi dia gulongoga Bibila nu anawo, hagutala ima yawo ya gipheve nu ndaga jidi mu mitshima yawo. (Mikuala 11:18, 19; Ishima 22:6, 15) Ibutshi yajilego gulonga anawo nu khabu.—Kolosai 3:21.

Nzambi wanutshigina egi ibutshi ilonge anawo mu njila ya bonga

6. Gula mukhetu nu yala ashi mudivisa ndo, adi naye gusalela malongi a bibila. Bibila didi mutulongesa hagudizumba nu gutotesela akwenu gubola. (Kolosai 3:12-14) Mbimbi ya Nzambi ishigo muhana njila ya gudikhapha hagumanesela matata. Uvi mukhetu wajiya guzoga mu inzo ya mahata gula (1) mulumienji umutuna gukuatesa athu a inzo yenji mu khu. (2) udi nu gikalulu gia gubeta mukajienji hehi nu gumushia, nga (3) gutuna guenji guabala gushigo muhua mukhetu njila yagukombelela yehowa ndo.—1 Kolinto 7:12, 13.

7. Yala nu mukhetu adi naye gudihua lujitu lua mila. Mukunda uthambi udi disumu gumeso a Nzambi nu gumeso a mukhetu nga yala. (Hebelu 13:4) Bibila didi muzuela egi uthambi udi ndaga kaka imoshi yajiya gushiya mahata. Ngenyi, muthu wajiya gukhala nu njila ya guwata luko yala nga mukhetu muko. (Matayo 19:6-9; Lomo 7:2, 3) Yehowa wanumenga muthu wanushiya mahata haguwata muthu muko gula mutifi udi muhana Mbimbi ya Nzambi ushi guene ndo.—Malaki 2:14-16.

Copyright © 2006 Watch Tower Bible and Tract Society of Pennsylvania. All rights reserved.