Gujitisa Lujingu Nu Mahatshi - Site ya Internet ya Alondolodi a Yehowa ii Idi Mujiyiwa

Site ya Internet ya Alondolodi a Yehowa ii Idi Mujiyiwa

Beliefs

Future

Nzambi Udi Mutulomba Gima Tshi?

Longi dia 12

Gujitisa Lujingu Nu Mahatshi
	Luholotshi tuajiya gutalela lujingu? (1) guzola vumo? (1)
	Luholotshi Aklisto anudijiga egi anujitisa lujingu? (2)
	Idi ya bola hagushiya mbiji ba? (3)
	Makalegelo tshi anujitisago lujingu? (4)
	Mukhuala wa Nzambi udi itshi mukunda nu mahatshi? (5)
	Mukhuala uu udi mutalela nji guvutula mahatshi mu muila ba? (6)

1. Yehowa udi gisendeselo gia lujingu. Lujingu lua ima yagasue lua katugile gudi Nzambi. (Ngimbo 36:9) Lujingu ludi gima gia gijila gumeso’a Nzambi. Nga tshima lujingu lua mona ludi mu vumo dia ginenji, ludi nu funu gumeso’a Yehowa. Gushiya diki dia mona didi mu kula mu vumo gudi mabola gumeso’a Nzambi.—Guzoga 21:22, 23; Ngimbo 127:3.

Hagusuanguluisa Nzambi, tudi naye gutuna gumbiwa mahatshi, makalegelo a usala, nu ingonza ya phamba

2. Aklisto agiamatshidia anukeba mwavula mu ndaga ya gubamba lujingu. Anutala muabonga hagula tumiyo tuawo nu jinzo jiawo jile gutshita muthu gubola ndo. (Mikhuala 22:8) Asadi a Nzambi anukambelago lujingu lwawo gingoza mukunda nu gima gimoshi gia gusuanguluisa muila. Ngenyi anukita ndo saga jia khu jiagunamenesa athu nu luzolo luagasue. Anutuna gudisuanguluisa gua gukudisa ikalulu ya khu.—Ngimbo 11:5; Yone 13:35.

3. Lujingu lua mbiji ludi nji nu funu ya vula gu meso’a Mufugi. Muklisto wajiya gushiya mbiji mukunda nu gudia nga mukunda nu gulonda milele ya gusudiga, nga hagudibumba mukunda nu misongo yabola. (Gisendeselo 3:21; 9:3; Guzoga 21:28) Uvi idi ya bola haguhua jimbiji dilamba nga gulaba gujishiya phamba mukunda nu saga nga ha gudisuanguluisa.—Ishima 12:10.

4. Gunua makaya, gunua makaya afenya, nu gunua diamba mukunda nu gudisuanguluisa gushigo mwabonga mukunda nu Aklisto. Makalegelo wawa adi abola mukunda (1) anubuisa athu ahiga awo (2) anuzangela muila wetu, nu (3) adi usala. (Lomo 6:19; 12:1; 2 Kolinto 7:1) Nunji, yajiya gukhala lamba hagubemba ifu iii. Uvi, tudi naye gukolesela ha guibemba mukunda nu gusuanguluisa Yehowa.

5. Mahatshi adi nji nu funu ya vula gumeso’a Nzambi. Nzambi umuzuela egi monyo nga lujingu ludi mukatshi dia mahatshi. Ngenyi, idi muabola hagudia mahatshi. Idi nji muabola hagudia saba jiakamewa ha muminyo ha gushiyiwa. Gula saba ya nyongewa muto nga yafua mu muheto yajiiye gudiwa ndo. Gula mbiji ya kuatewa nu mufula nga uta idi naye gubatshiwa muminyo hatshiina haguizola mahatshi muabonga gutuama dia gu idia.—Gisendeselo 9:3, 4; Levi 17:13, 14; Makalegelo 15:28, 29.

6. Idi yabola hagutshigina gumbiwa mahatshi mu mwila ba? Tujimbila ndo egi Yehowa udi mutulomba egi tutune gudia mahatshi mu maluholo agasue. Idi mudijiga egi tajiilego gunginyisa mahatshi mu muila wetu. Nga tshima mahatshi a muthu muko, nga mahatshi etu atuabumbile. (Makalegelo 21:25) Aklisto agiamatshidia adi naye gutuna gumbiwa mahatshi. Ajiya gutshigina luholo luko lua gusagewa, gifua gutuiwa nga gunwa ihemba iko ishigo nu mahatshi ndo. Adi mutshigina gujinga, uvi ashi mutshigina ndo gushaga gu mikhuala ya Nzambi hagubumba lujingu lwawo.—Matayo 16:25.

Ya zolewe mu 2000
Copyright © 2006 Watch Tower Bible and Tract Society of Pennsylvania. All rights reserved.