Maũndũ Andũ Memenyeretie Marĩa Ngai Athũire

1. Ndungata cia Ngai ciendete maũndũ mega. Ĩndĩ no mũhaka o na ningĩ ciĩrute gũthũũra maũndũ moru. (Thaburi 97:10) Ũguo wĩ na gĩtũmi gĩa gũthema maũndũ mamwe memenyeretio marĩa Ngai athũire. Nĩ marĩkũ mamwe ma maũndũ macio memenyeretio?

2. Gũkomania kwa Arĩa Matahikanĩtie: Gũkomania mbere ya kũhikania, ũtharia, gũkoma na nyamũ, gũkoma na andũ a nyũmba ĩmwe, na arũme gũkoma na arũme na andũ-a-nja gũkoma na andũ-a-nja nĩ mehia manene harĩ Ngai. (Maũndũ ma Alawii 18:6; Aroma 1:26, 27; 1 Akorintho 6:9, 10) Angĩkorũo mũndũ-mũrũme na mũndũ-wa-nja matihikanĩtie no nĩ matũũranagia-rĩ, maagĩrĩirũo meheranĩre, kwaga ũguo mahikanie k̀ũringana na watho.—Ahibirania 13:4.

Ngai niathũire ũrĩu, ũici, gũũtha kamarĩ, na ciĩko cia ũtoi

3. Kwaria Maheeni, Gũũtha Kamarĩ, Kũiya: Jehova Ngai ndangĩhota kwaria maheeni. (Tito 1:2) Andũ arĩa mangĩenda gwĩtĩkĩrĩka nĩwe no mũhaka matheme kwaria maheeni. (Thimo 6:16-19; Akolosai 3:9, 10) Mũthemba o wothe wa gũũtha kamarĩ wĩ na ũkoroku. Kwoguo Akristiano matigwatanagĩra thĩinĩ wa mũthemba o na ũrĩkũ wa gũũtha kamarĩ, ta gũikia rotarĩ, macindano ma mbarathi, na gũũtha karata. (Aefeso 5:3-5) Na Akristiano matiiyaga. Matigũraga indo cia kũiyũo makĩmenyaga ũguo o na matioyaga indo matetĩkĩrĩtio.—Thama 20:15; Aefeso 4:28.

4. Matuthũka ma Marakara, Ũtoi: Marakara matangĩrigĩrĩrĩka maahota gũtũma wĩke ciĩko cia ũtoi. (Kĩambĩrĩria 4:5-8) Mũndũ mũtoi ndangĩtuĩka mũrata wa Ngai. (Thaburi 11:5; Thimo 22:24, 25) Nĩ ũũru kwĩrĩhĩria kana gwĩka ũũru nĩũndũ wa maũndũ moru marĩa andũ angĩ matwĩkĩte.—Thimo 24:29; Aroma 12:17-21.

5. Ũrogi wa Kũringa Ciama na Kũrongoreria Ngoma: Andũ amwe nĩmahoyaga na kĩyo ũteithio wa hinya wa roho nĩguo magerie kũhonia arũaru. Angĩ marogaga thũ ciao nĩgetha irũare o na kana maciũrage. Hinya ũrĩa ũnyitaga mbaru maũndũ macio mothe memenyeretio nĩ Shaitani. Kwoguo no mũhaka Akristiano maage kũgwatanĩra maũndũ-inĩ macio mothe. (Gũcokerithia Maathani 18:9-13) Gũkuhĩhĩria Jehova mũno nĩyo njĩra ĩrĩa njega makĩria ya gũtũgitĩra tũtikahutio nĩ ũrogi ũrĩa hihi andũ angĩ mangĩerekeria na kũrĩ ithuĩ.—Thimo 18:10.

6. Ũrĩu: Ti ũũru Kũnyua ndivei nini, njohi, kana kĩndũ kĩngĩ kĩrĩ na alkoho. (Thaburi 104:15; 1 Timotheo 5:23) No kũnyua gũkĩra gĩthimo na ũrĩu nĩ ũũru maitho-inĩ ma Ngai. (1 Akorintho 5:11-13; 1 Timotheo 3:8) Kũnyua njohi nyingĩ mũno kwahota gũthũkia ũgima mwega wa mwĩrĩ waku na kũburuge famĩlĩ yaku. O na ningĩ kwahota gũtũma ũhootwo nĩ magerio mangĩ na njĩra hũthũ.—Thimo 23:20, 21, 29-35.

7. Andũ arĩa memenyeragia maũndũ marĩa Ngai oigaga nĩ moru “matikagaya ũthamaki wa Ngai.” (Agalatia 5:19-21) Aakorũo wee nĩwendete Ngai kũna kũna na nĩũkwenda kũmũkenia-rĩ, no ũhote gũtiga maũndũ macio memenyeretio. (1 Johana 5:3) Wĩrute gũthũũra maũndũ marĩa Ngai oigaga nĩ moru. (Aroma 12:9) Gwatanĩra na andũ arĩa me na mĩtugo ya ũngai. (Thimo 13:20) Kũgwatanĩra na Akristiano arĩa agimaru kwahota gũtuĩka kĩhumo kĩa ũteithio. (Jakubu 5:14) Makĩria ma maũndũ mothe-rĩ, wĩhoke ũteithio wa Ngai kũgerera mahoya.—Afilipi 4:6, 7, 13.

Copyright © 2008 Watch Tower Bible and Tract Society of Pennsylvania. All rights reserved.