SUILANA FO’OSI’AṈA SOKE KI KARAṈI NA’A!

Tae ne’e fo’osi’aṉa soke? Fau’uta, ni kwatea oko kwaimanatai kesai oko lisia fo’osi’aṉa ne’e dau’ania ru oro ta’a ne’e ṉwae ki fuli’i ana tiai? Fau’uta, falafala ṉwae ki ne’e saea kira’a ne’e fo’osia God sasia ru ne’e isi doṉa saga’a di’ia mae ki, falafala ana sauṉwae aṉa ki, abutotoṉai aṉa ki-ni kwatea manatamu isi le’a? Sine’e fau’uta ne’e nika liadi’ia fo’osi’aṉa na’a ne’e ta’i ru ne’e fulia ru oro ta’a ki?

Noa’a la’u fo’osi’aṉa ki ta’ifau, bore ma fo’osi’aṉa soke go’o ne’e fulia ru oro ta’a ki. Sa Jesus Christ fa’ata’inia fo’osi’aṉa soke ne’e kwatea ṉwae ki kira ka sasia ru oro ta’a ki, di’ia ne’e “ai ta’a ka fuṉu loṉo ania fua’i ru ta’a.” (Mathiu 7:5-17) Fua’i ’ai fau’uta ne’e saka mai fa’asia fo’osi’aṉa soke?

Fo’osi’aṉa Soke . . .

SAENA MAE MA FA’INIA GAVMAN: Ta’i buka kira saea ania Asiaweek ni saea: “I Asia ma ti kula la’u, ṉwae kwaitala’i ki kira su’u su’u mala ’uana ṉasiṉasi’aṉa doe ma kira ka sasia ru ne’e isi doṉa na’a saga’a ’ine’e kia tala’ia manatana ṉwae ki bali ana fo’osi’aṉa, ’ine’e kia dao to’ona ru ne’e kira oga ki.” Buka ne’e ni saea ru ne’e saka mai fa’asia ne’e: “Lisilana di’ia fanoa nini ’i ano ta’ifau karaṉi ke ta’a liu na’a.” Ta’i ṉwae ’a’ana ana fo’osi’aṉa ’i America ni saea: “Ta’i ru ne’e ke fonea go’o ṉwae sauṉwae ki ne’e sauṉia go’o ṉwae sauṉwae ki.” Tae ne’e manatana naia? “Sauṉia go’o ṉwae sauṉwae ki, sine’e ru ne’e ’ru God oga.” Bore ma Baebolo saea: “Di’ia ta ṉwae ne’e saea nia alafe fuana God, bore ma nia ka lia ta’afia na ṉwaefuta nia, nia’a na ṉwae oso’oso go’o ana.” (1 Jon 4:20)* Sa Jesus saea loṉo: “Muke alafe fuada na malimae kamu ki.” (Mathiu 5:44) Mamana liu na’a, karaṉi fo’osi’aṉa ki ta’ifau kira fiku saena mae!

FA’AMANATA ANIA SOKE’A: Karaṉia na fo’osi’aṉa ki ta’ifau go’o ne’e fa’amanata ania noni’iru nama maṉoi’iru ne’e mauri burina ne’e ṉwae mae. Fo’osi’aṉa oro ki na’a ne’e fa’amanata ’unari fuana soke lana ṉwae kira ki. Kira gania mani fuana fo’oṉa’a fuana noni’iru ne’e mae ki. Bore ma Baebolo ni fa’amanata ka mamata lala: “Noni’iru ne’e abulata’a nike mae.” (Ezekiel 18:4 NW) “Ṉwae ne’e mauri ki kira saiana kike mae loṉo, bore ma ṉwae ne’e mae ka sui na’a ki, kesi saina’a ana ta ru.” (Eccelesiastes 9:5 NW) Sa Jesus fa’amanata ania ṉwae ne’e mae ki kira ke ba’a tata’e. Di’ia ṉwae to’oana noni’iru ne’e kasi mae—nia’a ne’e fo’osi’aṉa ki fa’amanata ania, noa nia si bo’o bo’o go’o ’uana ne’e ke tata’e faulu. (Jon 11:11-25) Urima fo’osi’aṉa oe fa’amanata ania noni’iru kesi mae unari?

ALAFAFIA FALAFALA TA’A: Ana ti kula, ti fikutai ṉwae alafafia ṉwae ne’e korea ṉwae ki ma kini ne’e korea loṉo kini ki ke fatabu go’o ada, ta ru la’u, kira tuarani loṉo gavman ki fuana kia alafafia bali ana taki fuana ṉwae ke korea loṉo ta ṉwae ma kini bore ke korea loṉo ta kini. Ti fikutai ṉwae kira fata olisia liua loṉo falafala ta’a ki, bore ana kira kesi fa’akosoa ṉwae ’a’an kira ki ne’e fa’alia ṉela ti’iti’i ki ana balibalia ana rora’a. Baebolo fa’amanata fau’uta ana ru ne’e? Ni saea saga ana uri: “Noa’a kamu kasi fa’amamana ana ta soke’a. Na ṉwae ne’e kira tua ’ani ’usu’a, ma na ṉwae ne’e kira fo’osia na nunu’i ru ki, ma na ṉwae kakabara ki, ma na ṉwaṉwane ne’e kira kakabara fa’inia ṉwaṉwane ki, . . . na ṉwae ne’eri ki noa’a ta ṉwae ada kasi ru’u saena tatalafa aṉa sa God.” (1 Korinth 6:9, 10) Fau’uta, oko saiana ti fo’osi’aṉa ne’e kira alafafia falafala ta’a ’unari ki?

Fo’osi’aṉa ’unari ki, ta tae ne’e ke ba’a dao to’oda sine’e kira to’oana fufua’i ’ai ta’a? Sa Jesus fa’abasu uri: “’Ai ne’e noa’a kesi alua fufu’ai ’ai le’a ki kia tufu’i ma kira ka to’osi’i saena mafula.” (Mathiu 7:19) Mamana liu, God ke ba’a sikilia fo’osi’aṉa soke ki ma ka fa’asuida! Bore ma ru ne’eri ke fuli na’a aṉita ma nia fuli fau’uta? Saena Baebolo ana Reveleson 17 fa’inia 18 ne’e olisia.

Fo’osi’aṉa soke ki ke ba’a sui fau’uta?

Manata sulia ru ne’e. Ta’i kini ’usu ni tua fafona ru mauri kwasi ne’e kwatea ṉwae ka ma’u liu. Ru kwasi ne’eri to’oana fiu gwa’i ru ki fa’inia akwala konakona ru ki. (Reveleson 17:1-4) Kini ’usu ne’e nunu’iru ania tae? Nia to’oana ṉasiṉasi aṉa “gwauṉa’i fafia na ṉwae tatalafa ki ta’ifau saena [fanoa nini i ano].” Ni ru’ufia toro meo borabora’a, ma nika dau ana titiu ana gol ne’e fuṉu ania na ’ai moko lea, nika to’oru liu. Si ne’e falafala ana kelema ne’e ru ni sasia, ni ’oi ana ‘tua’a doe ki ta’ifau.’ (Reveleson 17:18; 18:12, 13, 23) Baebolo afia kulua fuana kui liasaiana kini ’usu ne’e nia nunu’iru ania noa’a la’u ta ta’i fo’osi’aṉa go’o, bore ma fo’osi’aṉa ki ta’ifau ne’e ru kira sasi’i ki ni di’ia fufua’i ’ai ta’a ki.

Ru mauri kwasi ninia kini ’usu ne’e leka fafona nunu’iru ania gavman ki saena fanoa nini i ano.^# (Reveleson 17:10-3) Fo’osiaṉa soke ninia leka fafona ru mauri kwasi ne’e ni nunu’iru ania falafala ne’e ni oga ke nau ania ru ne’e gavman manata to’ona ke sasi’i ki.

Ta’iru ne’e ṉwae ki kia ba’a ’arefo liu ania, karaṉi ke ba’a fuli na’a. “Na ru mauri kwasi mana akwala konakona ru nana oko lisida ne’e kira ke ba’a liata’afia na kini ’usu ne’e, ma kira ke ba’a lafua na [toro] nia ki ta’ifau fa’asia, ma nia ka dadara na’a ’ana, ma kira ka ania na’a fasi ana nonina, ma kira ka du’afia ania mafula.” (Reveleson 17:16) Ṉwae ki kia ba’a lebe liu kesai kira tona bore ma gavman saena fanoa i ano ki fu’alia na’a fo’osi’aṉa soke ki ma kira ka fa’asuida na’a ta’ifau! Ta tae ne’e asumida ma kira ka fulia ru ne’eri? Reveleson 17:17 ni ala’a ’uri: “Sulia God alua na’a manata’i ṉwae ne’eri ’i saena liada, fuana kira ke sasia na ru ne’e ni oga’i ki.” Mamana liu na’a, fo’osi’aṉa soke ki na’a ne’e kia ba’a ala’a olisia sa God fafona ru oro ta’a ne’e kira sasi’i ki kaidai ne’e kira saea kira fo’osia loṉo sa God. God ke ba’a fa’ata’inia saga’a kesai nia o’o ania gavman ne’e kwaima fa’inida ke fa’asuida loṉo.

Ae sasi fau’uta, di’ia aesi oga ne’e ae sui fa’inia fo’osi’aṉa soke? Angel sa God saea saga ana: “Tafi na’a fa’asia nia’a ṉwae nau ki.” (Reveleson 18:4 NT) Mamana liu na’a, ṉwae ke tafi na’a fa’asia fo’osi’aṉa soke kesai ne’e na’a, noa’a kesi dole la’u! Ma ru ne’e fada ania noa’a ku kesi fa’amamana na’a ta ru, nema fau’uta? Noa’a, di’ia ’unari noa’a nia si kwatea mauria fuana ṉwae. (2 Tesalonika 1:6-9) Kula fuana ago’a go’o ne’e fo’osi’aṉa mamana. Ae lia sai fau’uta ana fo’osi’aṉa mamana?

Liasai’aṉa ana fo’osi’aṉa mamana

Fua’i ’ai le’a fau’uta ne’e fo’osi’aṉa mamana fuila ke to’oana?—Mathiu 7:17.

Fo’osi’aṉa Mamana . . .

FA’ATA’INIA ALAFE’AṈA: To’a ne’e fo’o mamana “noa’a kira kesi ado ana fanoa nini i ano,” Kira “kwaima ana to’olada,” Noni ru matamata ma falafala ki isi fa’alia ta’i ‘manatai ru ne’e kira to’oana.’ (Jon 13:35; 17:16; Rao’a ki 10:34, 35) Lifua ne’e kia sauṉia to’olada ke mae, kira’a lala ne’e kwaima mamana ma kira’a ka mau’udi fuana ne’e kia mae ’usia to’olada.—1 Jon 3:16.

ALUTO’O ANA FATALANA SA GOD: Fo’osi’aṉa mamana noa’a isi fa’amanata ania “fata totoṉai” mana “fa’amanata ’aṉa ṉwae,” bore ma fa’amanata lana saka mai fa’asia fatalana sa God na Baebolo. (Mathiu 15:6-9) Fau’uta ne’e ka ’unari? Sine’e “God na’a ne’e kwatea kerekere’a abu ki ta’ifau, ma na kerekere’a abu ki ka le’a fuana fa’amanata’aṉa, mana fa’asagalana ru ne’e rora ki.”—2 Timoti 3:16.

FA’AṈASIṈASIA TUA’A KI MA OKO ALA’A LEA FUANA ṈWAE KI KIA TO’O ANA FALAFALA SIKASIKA: Fo’osi’aṉa saga fa’amanata ara’i ki kia ‘kwaima ana ’afe kira ki ka di’ia loṉo nonida talada.’ Nia’a fa’amanata ’afe ki ine’e kia fa’adoea falafala ana fa’a ’a’analana ara’i kira ki,’ ma nika fa’amanata ṉela ki ine’e kia ‘kwairo’oe ana ma’a fa’inia te’a kira ki.’ (Efesas 5:28, 33; 6:1) La’u ma ai ne’e kira to’o ana o’oṉa’a fuana kwaitala’i aṉa kia fa’ata’inia nama falafala le’a.—1 Timoti 3:1-10.

Urima ti fo’osi’aṉa kira doṉa falafala ne’e ki? Na buka Holocaust Politics, ne’e kira keresia ana 2001, ni saea: “Di’ia ne’e doelana ṉwae ki ilia ru ne’e to’a Jehova ki ili’i ki maka doṉa fa’amanata aṉa kira ki, irai noa’a go’o ta sauṉwaea di’ia kaidai ba ana Nazi ki.”

Mamanaliu, ana 235 fanoa, to’a Jehova ki kira fa’aroṉo ania falafala sikasika ne’e teo saena Baebolo, kira isi ala’a go’o sulia borema ana tualada kira doṉa loṉo falafala sikasika ne’eri ki. Kami ala’a taliṉai le’a fuamu fuana ae saefiloa to’a Jehova ki kia afio ine’e ae saesae ’uana ta tae ne’e God oga ae sasia ine’e nia alafafia fo’osi’aṉa oe. Kaidai na’a ne. Noa’a aesi dole lau. Karaṉi na’a fo’osi’aṉa soke ki ke ba’a sui!—Zephaniah 2:2, 3.

*  Scripsa nini saena pepa ne’e’ki, ni’i saka ma’i fa’asia Baebolo ne’e satana: Na Fatalana God. Di’ia oko lisia NW ’i burina scripsa, ni fada’ania na scripsa ne’eri saka fa’asia aṉilisi Baebolo ne’e satana: New World Translation of the Holy Scriptures—With References.

^#  Di’ia oko oga ae sailea ana ’a’emae ne’eri, lia i saena tai buka ti’i ti’i ne’e satana Gohed for Luk Aot! page 12 fania 13, Jehova Witnis ki ne’e keresia.