Tai Ne’e Sa Jesus Kraes?

1. Mala sa Jesus fi’i koso mai i ano, nia tuatua i langi di’ia anoi ngwae. Nia’a ru etaeta sa God ni saungani, ’unari nia na “fai’na’ona’o” ’Alako sa God. (Colossians 1:15; Revelation 3:14) Sa Jesus go’o ne’e ta’i ’Alako ne’e sa God taifilia ni saungani. Sa Jehova ngalia sa Jesus kaidai niakesi ngwae’a’ūa ine’e nia ke “u māna raoa” ke saungani ru oro lialia loere i langi ma i ano ki. (Proverbs 8:22-31; Colossians 1:16, 17) Sa God kwate ni’a di’ia ngwae etaeta Nia fuana ala’anga. Tanini sa Jesus ka to’oana sata “na Fata’a.”—John 1:1-3; Revelation 19:13.

2. God kwatea ’Alako Nia ma’i i ano kaidai nia rokisia mauria nia ka teo saena ogakalekale i Mere. ’Unari sa Jesus isi ma’a ana ngwae ana noni. Tanini ni’a bore isi to’o longo ana ta ābulata’anga’a naema ta ‘ere’a. Du’ungana ulu ru ki sa God kwatea sa Jesus ka koso ma’i i ano: (1) Fa’ananau kulu ania mamana’anga sulia sa God (John 18:37), (2) fekengai ana ū saga’a ne’e ngasi, ka di’ia fa’atai lana tala fuana kulua kuke donga (1 Peter 2:21), ma (3) ka fo’osi ania maurianga nia ine’e ke logea kulu fa’asia ābulata’anga’a fa’inia mae’a. Fauta ne’e kulu bo’obo’o ’unari?—Matthew 20:28.

3. Du’ungana taigere lana fata’a sa God, ngwae eta eta, sa Adam, fulia ru ne’e Baebol saea ania “ābulata’anga’a.” Ta ne’e sa God ka kwa’ia ania mae’a. (Genesis 3:17-19) Nia’a ka olidoko na’a fa’asia fuli ūa’a mān sa God, ma nia kesi le’a ali’afu na’a. Leleka nia ka ngwaro ma nia ka mae. Sa Adam kwatea ābulata’anga’a fuana ngelan ta’ifau. Tanini kuke ngwaro longo, mata’i, ma kuke mae. Ngwae ke mauri fau’ua?—Romans 3:23; 5:12.

4. Sa Jesus ngwae le’a ali’afu di’ia go’o sa Adam. Bore ma māmat anga nia fasi sa Adam, ne’e sa Jesus ni’a kwairo’oi ka tasa an sa God, suiboreana nia ka dao to’ona ilito’onga doe liu ki. ’Unari ka totolia nia ke fo’osi ania mauria noni le’a ali’afu nia ka du’ua ābulata’anga’a sa Adam. Ru ne’eri Baebol saea ania na “folifolia.” Ngelan sa Adam saiana ke aloge fa’asia kwa’ikwa’inga’a fuana mae’a. Ngwae ki taifau ne’e kira fito’ona sa Jesus kike aloge fa’asia ābulata’anga’a kira ki ma kike to’oana mauri’a firi.—1 Timothy 2:5, 6; John 3:16; Romans 5:18, 19.

O’onga’a sa Jesus ne’e fa’amanat’anga sasilana fa’anada’a ki, ma ka kwatea mangona fuakulu

5. Sa Jesus gura mata’inga ki, sarea ngwae fiolo ki, ma ka fa’a āroāroa kauburu ki kaidai ni tua i ne’e i ano. Ngwae mae ki bore ni fa’amaurida. Fauta ne’e nia ka fulia fa’anadanga ki? (1) Nia manataia ngwae nonifi’i ki, ma ka ōga ke afida. (2) Fa’anad’anga nia ki fa’atani ne’e ni’a ’Alako sa God. (3) Kira fa’atani ru ne’e nia ba’a fuli’i ki fuana kwairo’oi’anga ngwae kaidai nia ra’e ma’i Ngwae Tatalfa fafana fanoa nini i ano.—Matthew 14:14; Mark 2:10-12; John 5:28, 29.

6. Sa Jesus mae ma sa God ka fa’amauria ka tata’e ania anoi ru ma ka oli i langi. (1 Peter 3:18) Ka dao ’unari, sa God ka alua nia Ngwae Tatalfa. Karangi sa Jesus ke fa’asuia ta’anga’a ki ta’ifau ma nonifi’anga fa’asia fanoa nini i ano.—Psalm 37:9-11; Proverbs 2: 21, 22.

Copyright © 2006 Watch Tower Bible and Tract Society of Pennsylvania. All rights reserved.