Ta Tae Ne’e Tatalfa’anga Sa God?

1. Kaidai sa Jesus tua i ano, nia fa’ananao kia fo’o ’uan Tatalfa’anga sa God. Na tatalfa’anga ne’e gavaman to’oan ngwae tatalfa ni ū fuan. Tatalfa’anga sa God nia gavaman matali. Nia teo i langi ma nia ba’a lia ’afia i ano. Nia ba’a fa’a’ ābua satana sa God. Nia ba’a asungani kwaiogai’anga sa God i ano ka di’ia longo i langi.—Matthew 6:9, 10.

2. God alangai ne’e sa Jesus ke ba’a to’oan a’an ang di’ia Ngwae Ni Tatalfa an Tatalfa’anga Nia. (Luke 1:30-33) Kaidai ne’e nia tua i ano, sa Jesus fa’atainia ne’e ni’a fanga le’a, saga, ma Ngwae Inotoa le’a ali’afu. Kaidai ba nia oli i langi, ni isi a’an aliali ’ua an Tatalfa’anga sa God. (Hebrews 10:12, 13) An 1914, Jehova fi’i kwate’a a’an ang fuan sa Jesus ba ni alangai ke kwate nama. Ka dao i taena, sa Jesus ni a’an i langi di’ia nam Jehova fa’a ūa Ngwae Tatalfa.—Daniel 7:13, 14.

3. Jehova ka filia ti ngwae ma ti kini fa’asia ne’e kira fito’o kia ra’e i langi. Kia ’a’an fai’nia sa Jesus di’ia ngwae tatalfa ki, matalangai ki, ma ngwae fo’o ki fafia ngwae ki. (Luke 22:28-30; Revelation 5:9, 10) Sa Jesus saea kira’a ti ngwae ’a’an an tatalfa’anga nia “fiku tai sipsip ti’iti’i.” Kira’a ne’e 144,000.—Luke 12:32; Revelation 14:1-3.

4. Kaidai sa Jesus ni Ngwae Tatalfa, ailail go’o, nia ka to’osia ma’i sa Saetan fainia aingseol ta’a nia ki i ano. Tanini ka ’ita nama ma’i an 1914 ru oro ta’a liu ki fuli i ano. (Revelation 12:9, 12) Fu’anga’a, fiol’ang, gwai mae’a, aburongo’a —ru oro ne’e ki kira’a “ma’etōtō” ka fa’atani ne’e sa Jesus ni tua an Tatalfa’anga ma kaidai ta’a ne’e saena asoa isi ki.—Matthew 24:3, 7, 8, 12; Luke 21:10, 11; 2 Timothy 3:1-5.

5. Karangi na’a sa Jesus ke matalanga ni ngwae ki, ka daro’ida di’ia ne’e ngwae folo ’usia sipsip ki daro’ia sipsip ki fa’asia got ki. “Sipsip” ki ne’e kira fa’atainia ne’e kira kwairo’oi. Kira ke ba’a to’oana mauria firi i ano. Na “got” ki ne’e kira ilangani Tatalfa’anga sa God. (Matthew 25:31-34, 46) Karangi na’a ana asoa lokiri, sa Jesus ke fa’asuia na ngwae ne’e di’ia got ki. (2 Thessalonians 1:6-9) Di’ia oko ōga ae’o “sipsip” sa Jesus, oke fafarongoa ala’anga sulia Tatalfa’anga sa God ma ko donga ru ne’e oko rongoa.—Matthew 24:14.

Olofana ’a’an’anga sa Jesus, malimae’anga fai’nia fataburi’anga ki kesi teo na’a

6. I taena i ano daro’ilana fanoa ki ni oro liu. Ta fanoa go’o to’oan gavaman nia talan. Bore ma fanoa to’oto’o ne’e ki kira ke fu’alia longo ti ai ada’a. Bore ma Tatalfa’anga sa God ke ba’a talafuila gavaman oro nini ngwae. Nia’a go’o taifilia ne’e ke ’a’ana saena fanoa nini i ano taifau. (Daniel 2:44) Go’o ka no’a na’a ta fu’anga’a, oilana taki, ma falafala ta’a ki. Ngwae ki taifau ke ba’a tua fiku ania aroaro anga ma ’adoa.—Micah 4:3, 4.

7. Sulia To’oni Fa’i Ngali ne’e sa Jesus ke ’A’an, ngwae kwairo’oi ki kia ra’e ma’i kia le’a ali’afu, ma ano ne’e ta’ifau ke ra’e ma’i fanoa kwanga. Karangia suilana ta’i to’oni fa’i ngali, sa Jesus ke fa’asuia na’a ru ki ta’ifau ne’e sa God saefiloa nia ka fuli’i i nao. Ka sui ni ka ba’a kwatea na’a Tatalfa’anga ke oli na’a fuan Ma’a nia. (1 Corinthians 15:24) Fauta ne’e aes ala’a fuan ngwae kwaima oe ki sulia ta tae ne’e Tatalfa’anga sa God ke ba’a fulia?

Copyright © 2006 Watch Tower Bible and Tract Society of Pennsylvania. All rights reserved.