Tu’a An Arai’ang Ne’e Fa’a Saele’a God

1. Baebol nia saea ne’e tu’a’a ni alugwau ana ara’i. (1 Corinthians 11:3) Ara’i ke tua go’o fa’inia na ta’i afe. Kero’a ke kore saga adaro’a an bali ana taki.—1 Timothy 3:2; Titus 3:1.

2. Na ara’i ke kwaima nama an ’afe nia talana di’ia longo ne’e nia kwaima an nonina. Nia ka lia sulia ’afe nia ka di’ia ne’e sa Jesus ni lia sulia ngwae donga nia ki. (Ephesians 5:25, 28, 29) Tutua nia kesi nangasia ’afe nia naema ka silolonga’i bolebole’a ana. Bore ma, nia ke fa’adoea ma ka manta’a fuana.—Colossians 3:19; 1 Peter 3:7.

Na ma’a ne’e kwaima lulua ru fuan noni ki ma an mangoi ru fuan tu’a nia

3. Na ma’a ke rao ngasi fuan tagia sulia tu’a nia. Nia nama ne’e ke lulua fanga, ifi, ma kula an tua fuan ’afe nia ma ngela kero’a ki. Na ma’a ke lulua nama mangona tu’a’a kira. (1 Timothy 5:8) Nia ke tala’ia tu’a nia ke saele’a an falfal sa God, ma nai’i ru anga Nia ki.—Deuteronomy 6:4-9; Ephesians 6:4.

4. Na ’afe ke le’a fuan ’afilana ara’i nia. (Genesis 2:18) Nia ke ’afia ara’i nia ania fa’amanat’anga ma fa’ananao’anga fuan ngelada’a. (Proverbs 1:8) Jehova ogaliua ne’e ’afe ke tagi le’a sulia tu’a’a nia ania kwaima’anga. (Proverbs 31:10, 15, 26, 27; Titus 2:4, 5) Nia ke liadoe nama ana ara’i nia.—Ephesians 5:22, 23, 33.

5. God ogaliua ngela ki kia kwairo’oi ana ma’a ma te’a. (Ephesians 6:1-3) Nia ka oga ne’e ma’a ma te’a kia fa’amanata ma kira ka fa’asaga ngela kero’a ki. Ma’a ma te’a kia kwatea nama kaidai fuana ngela kero’a ki ine’e kea fa’ananaoa nama ngela kero’a ki ania na Baebol, ma tagi’anga sulia mangoda. (Deuteronomy 11:18, 19; Proverbs 22:6, 15) Ma’a ma te’a tutua musi fa’asaga ngela kamu ki ania saeta’anga naema ania kwaibani lada.—Colossians 3:21.

God oga ma’a ma te’a kea fa’amanta ngela kero’a ki ma ka fa’asagada

6. Kaidai ’afe ma ara’i kera dao to’oan ilito’onga ki saena tu’a keroa, ni le’a fuan kia donga na Baebol. Kwaima’anga ma rufuanta’anga ne’e Baebol ogaliua kuke fa’atani. (Colossians 3:12-14) Fatalana sa God saea kukesi tua to’oto’o fuan fa’asagalan ru ato ti’iti’i ki. Bore ma na ’afe sali manat sulia leka’a fa’asia ara’i di’ia (1) nia dadarongo ania gonilana tu’a’a, (2) nia fu’abani liu, ka ’unari ’afe kesi nonile’a ma maurilana ka daukō, naema (3) nia ka susfolofolo liu ka kwaifonē ka ’afita’i ana ’afe kesi fo’osatana Jehova.—1 Corinthians 7:12, 13.

7. Ara’i ma ’afe kia mamana fuadaro’a. ’Usu’a ne’e abulata’anga i mān sa God ma ana ’afe naema ara’i. (Hebrews 13:4) ’Usu’a fafia ara’inga ma ’afe’anga go’o ne’e Baebol saea ngwae ke aloge fuana ilangai’anga ma ara’inga la’u. (Matthew 19:6-9; Romans 7:2, 3) Jehova nia ’aila ngangata ania ilangai’anga di’ia ne’e ni isi saga fa’inia taki ana Baebol ma ka korea tai la’u.—Malachi 2:14-16.

Copyright © 2006 Watch Tower Bible and Tract Society of Pennsylvania. All rights reserved.