Ngwae Rao Sa God Ki Kia Sikasika Nama

1. Jehova God ne’e sikasika ma ka abu. Ni’a ka kwaiogai fuana ngwae fo’osia ki kike sikasika—ania mango, falafala, manat’anga, ma nonida. (1 Peter 1:16) Kuke rao ngasi nama fuan sikasika’a i mā-an God. Kulu tua saena fanoa bulibuli’a. La’u kulu leota’i fa’inia lia’i ngwae rora. Bore ma noa’a kulu kesi nonikulu’a.

2. Sikasika’anga ana Mango: Di’ia kulu oga raoa fuana sa Jehova, noa’a kukesi dau fafia ta fa’amanat’anga naema ta kastom an fa’amanat’anga soke. Kulu ke tafi fa’asia fa’amanat’anga soke ma kukesi dau saulia ania ta ru bore’ana. (2 Corinthians 6:14-18; Revelation 18: 4) Kaidai kulu ka saina’ana maman’anga sulia sa God, kulu ke madafia asu’ubani ti ngwae kata tala’i rora akulu ania fa’amanat’anga soke ki.—2 John 10, 11.

3. Sikasika’anga ana Falafala: Jehova oga ne’e ngwae fo’osia ki kia abula saga di’ia Kristin maman ki an kaidai ki ta’ifau. (1 Peter 2:12) Nia lisia ru ki ta’ifau ne’e kulu sasi’i, suibore’ana ni’i āgo. (Hebrews 4:13) Kuke nofa’asia falafala an usu’a fa’inia ti falafala bulibuli la’u sana fanoa nini i ano.—1 Corinthians 6:9-11.

4. Sikasika’anga ana Manat’anga: Di’ia kulu dedea manatakulu ania manat’anga sikasika ma ka raola ki, falafala kulu ki bore ke sikasika longo. (Philippians 4:8) Bore ma di’ia kulu manata go’o akulu sulia ru bulibuli ki, fuan ne’e rao’a ta’a ki go’o. (Matthew 15:18-20) Kuke nofa’asia saesaele’a’anga ne’e ke fa’abulibulia manatakulu. Kuke dedea lala manatakulu ania manat’anga sikasika kaidai kuke iiroa Fatalana God.

5. Sikasika’anga ana Noni: Sulia kira ū fuana sa God, Kristin ki nonida fa’inia kaleko ke sikasika. Kuke ta’ufia limakulu buriana kulu oli mai fa’asia kabara, ma kuke ta’ufia longo i na’ona fanga’a naema kaidai kuke rao ana fanga ki. Di’ia no’a’a ti kabara le’a, kuke anofafia nama oni ki. (Deuteronomy 23:12, 13) Tu’a sikasika’anga ania nonikulu, ni’afi kulu noa kusi matai. Luma na Kristin ke sikasika ma ka saora’i i saena ma i mā longo. Nia ū sakatafa safitana fanoa ne’e di’ia fa’atai lan tala.

6. Sikasika’anga ana Ala’anga: Ngwae rao sa God ki kike ala’a funifara’a nama ania maman’anga. Ngwae kwalabasa kesi ru’ū an Tatalfa’anga sa God. (Ephesians 4:25; Revelation 21:8) Kristin ki kesi fata ta’a. Kira kesi sailinga fuana naema saelan oidorel’anga bulibulia ki naema a’emae bulibuli ki. Kike u matali ana kulani rao, sukulu, ma saena fanoa, sulia kira donga ala’anga sikasika.—Ephesians 4:29, 31; 5:3.

Ngwae rao sa God ki kike sikasika saena ru ki’i ta’ifau

Copyright © 2006 Watch Tower Bible and Tract Society of Pennsylvania. All rights reserved.