Ti Falafala Ne’e Sa God Lia Ta’a Ani’i

1. Ngwae rao sa God ki kira kwaima’an ru ne’e le’a. Bore ma kike sailea naman kia ilangani longo ru ne’e ta’a. (Psalm 97:10) Nia ne’e kuke nofa’asia sasilana ti falafala sa God ilangani. Falafala fauta ki ne’e ti ai?

2. ’Usu’a: ’Usu’a i na’ona ara’inga, na ngwae ara’i fa’inia ’afe mamata, fa’inia ta ru kwasi, fainia kini sari’i nia, ma ngwae fa’inia ngwae; ru ne’eri ki abulata’anga ta’a i māna sa God. (Leviticus 18:6; Romans 1:26, 27; 1 Corinthians 6:9, 10) Di’ia ro ai kera isi kore kera’a ’ua bore ma kero’a tua fiku, kike ābira to’oto’o nama, naema kea ara’i saga ana taki.—Hebrews 13:4.

God ilangani gwaulilinga’anga, bili’a, masa’a fauna fofoli’a, ma abula’anga ana fu’abani’anga

3. Soke’a, Masa’a Fuan Fofolia, Bilia: Sa Jehova God ne’e kina soke’a. (Titus 1:2) Na ngwae ne’e kira oga nia ke alafafida kike nofa’asia soke’a. (Proverbs 6:16-19; Colossians 3:9, 10) Na masa’a oro nini fuana fofoli’a ki kira fa’atani na’a ’ania ogaguguta’anga. ’Unari Kristin ki kesi dau kwailima fa’inia ta kala masa’a fuana fofolia, di’ia masa’a kira saea ani lotori, hos lalili, ma bingo. (Ephesians 5:3-5) Ma Kristin ki no’a kikesi bili. No’a kikesi folia ta ru ne’e kira saiana ne’e na ru bilia longo ma’i naema kike ngali ru ani abusaefilo’anga.—Exodus 20:15; Ephesians 4:28.

4. Saeta’anga Laulebelebe, Fu’abani’anga: Na saeta’anga ke kwai’ia tala ’uana fu’abani’anga. (Genesis 4:5-8) Na ngwae fuabani no’a la’u ngwae kwaima sa God. (Psalm 11:5; Proverbs 22:24, 25) Nia rora ne’e kuke du’ua ru ta’a ti ngwae sasi aka.—Proverbs 24:29; Romans 12:17-21.

5. Kelema ma Akalota’e’anga: Ti ngwae kia amasia na ngasingasi’anga ana anoano ru ki fuana guralana mata’inga. Ti ai kia kelemia malimae kira ki fuan kia mata’i naema kia mae. Na ngasingasi’anga an ru ne’e ki nia saka ma’i ana sa Saetan. ’Unari Kristin ki kike matali fa’asida. (Deuteronomy 18:9-13) Tu’a karangilana sa Jehova go’o ne’e le’a ka tasa fuan su’usila kulu fonea kelema kira alu’i uaka ki.—Proverbs 18:10.

6. Gwaulilinga’anga: Nia isi rora ne’e ki kwa’u ti’iti’i go’o ana waen, bia, naema ti ru ne’e ’unari. (Psalm 104:15; 1 Timothy 5:23) Bore ma kwa’uliu’a ma gwaulilinga’anga kira rora i mana sa God. (1 Corinthians 5:11-13; 1 Timothy 3:8) Kwa’u doe liu’anga ke dokosia nonile’anga oe, ma ka fa’alia saena tua’a oe. Nia ke talangwara’u longo fuana ne’e ae ’asi saena ti ilito’onga la’u.—Proverbs 23:20, 21, 29-35.

7. Na ngwae ne’e kira sasia ru sa God fu’usi ta’a ani ki, “noa’a kira kesi toda tatalfa’anga sa God.” (Galatians 5:19-21) Di’ia oko kwaima mamana ana sa God mako oga ko fa’asaesaele’ā, oke saian oke loge oe fa’asia sasilana falafala ne’eri ki. (1 John 5:3) Saile’a an ne’e ae aila fifi ania ru sa God saea ni ta’a. (Romans 12:9) Oke ūku fa’inia to’a kira to’oan falafala sa God. (Proverbs 13:20) Sali Kristin lango ki kia kwai’afi longo akulu. (James 5:14) Ka tasa liu na’a ne’e kuke riri ana kwai’afianga sa God ania fo’onga’a.—Philippians 4:6, 7, 13.

Copyright © 2006 Watch Tower Bible and Tract Society of Pennsylvania. All rights reserved.