Itretre Anyipici Iehova? — Nemene La Pengö i Angatr? Nemene La Itre Ini Hnei Angatr Hna Lapaune Kow?

Nemene La Itre Ini Hnei Angatr Hna Lapaune Kow?

ITRE ka mejiune angatr koi Iehova, lo Ka Pucatin Asë nge Atre xupe la fene hnengödrai memine la ihnadro hnene la Itretre Anyipici Nyidrë. Ame la nöjei ewekë ka sheminge hne së hna goeëne e tro thenge la isa aqane xupe itre ej, ngacama thatreine kö tro sa qeje pengöne hnyawa, itre eje hi lai a qaja koi së ka hape ame la Atre Xupe itre ej, tre, pëkö ka atreine weje la ejuine la inamacane me etrune la mene i Nyidrë. Tune la easa atrepengöne la thiina ne la trahmanyi maine föe hnene la itre huliwa i nyidro, itre thiina i Iehova fe hi a mama koi së jëne la itre huliwa i Nyidrë. Celë hi matre qaja jë Tusi Hmitrötre ka hape, “ame la nöjei ewekë i nyidëti ka sihngödi qane la hna xupe la fene hnengödrai, te mama cile pi hë, mama ha hnene la nöjei ewekë hna xup.” Haawe, maine pëkö nine ka ithanata hne së hna drenge maine itre trenge ewekë pena, ngo ame pe, tre, “kola amamane la lolo i Akötesie hnene la hnengödrai.”–Roma 1:20; Salamo 19:1-4.

IHNADRO . . . Hna xupe hnei Iehova . . . Hna thupëne hnei atr . . . troa lapan uti hë epine palua

Thaa xupe xanëne kö la atr la inege, maine kuci televizio me ordinatör pena, ka hetre kepine la angeic a kuca la itre ewekë cili. Ame pena la easa goeëne la aqane xupe la ihnadro memine la itre feja, me itre öni, easa haine ke sisitria catre kö itre ej, hune la itre ewekë hna kuca hnei atr. Canga hmaca të hi la inamacane së nge canga menumenu hi së la easa thele troa trotrohnine la aqane kuca la ngönetrei ne la atr memine lo itre miliare lao wamine mutine ijö së, nge the qaja pala ha la atuat ka thatrehmekune hë lai. Maine hetre kepine matre kola kuca hnene la atr la itre ewekë ka thaa nyipi kö, haawe, hetre kepine mina fe la Iehova Akötresie a xupe la itre ewekë ka tru hna thatreine kö troa qeje pengöne la elolon! Celë hi matre qaja jë hnei Ite Edomë 16: 4, ka hape: “Hnei Iehova hna xupe la nöjei ewekë asë troa isa hete qâ.”

Hetre kepine matre Iehova a xupe la ihnadro; celë hi hnei Nyidrëti hna qeje pengöne lai kowe la lue pane atr, öni Nyidrë: “Manapi me hate, me atiqane la fene hnengödrai . . . , nge musinëne jë la ite i e kuhu hnagejë, me ite öni ka sheshë e caha nyipin, me ite öni asë ka wewë e celë fen.” (Genese 1:28) Pine la hna thaa idrei hnene la lue pane trefën, thaa nyialiene ju kö nyidro la ihnadro hnei atr ka meköt ka troa thupëne la ihnadro me itre feja me itre öni, cememine la ihnim. Ngo ame pe thaa hna ajolëne kö la aja i Iehova hnene la ewekë cili. Hna cinyihane pë hë hnene la ketre perofeta, itre thauzane macatre thupene lai, ka hape: “Akötesie, ate longëtine la fen . . . , tha hna xupe gufan’ ej.” Hnei Nyidrëti hna “hna xup’ eje mate lapan.” Thaa tro kö ej a paatr, ngo tro ej a “cile huti pala kö.” (Isaia 45:18; Ate Cainöj 1:4) Tro Iehova a eatrëne lo aja hnei Nyidrëti hna eköth ekö, göne la ihnadro; öni Nyidrë: “Tro ni a aeaten’ ej ; ase hë ni hne i hnine nge tro ni a kuca ej.”–Isaia 46:10.

Celë hi matre kola mejiun hnene la Itretre Anyipici Iehova laka, tro ha lapa hut uti hë epine palua la ihnadro nge ame la itre atr asë, ka mele maine ka mec nge angetre kapa la itre hna amekötine hnei Iehova, tro hë angatr a amingömingöne me lapaan me mele hune la ihnadro uti hë epine palua. Hna kapa hnene la fen asëjëihë la ngazo qaathei Adamu me Eva, ene pe, ngazo asë hë angatr (Roma 5:12) Öni Tusi Hmitrötr koi së: “Ke ame la thupene la ngazo, te, mec.” “Ke ate hë la ate ka mele laka tro angat’ a mec ; ngo tha’ te kö la kete ewekë hnei ite ka meci hë nge pa hmaca kö thupene koi angat ; ke patë hë la mekune i angat.” “Tro kö a meci la ate kuca la ngazo.” (Roma 6:23; Ate Cainöj 9:5; Ezekiela 18:4, 20) Matre tune kaa la aqane tro angatr a mele hmaca matre ce kapa la itre manathithi kowe la fen? Qaathene hmekuje hi la thupene mele i Keriso Iesu, ke öni nyidrë: “Ini hi la mele hmaca memine fe la mel ; ame la ate lapaune koi ni, ngacama meci hë, te, tro angeic a mel.” “Ke calemi hë la ijin tro la nöjei ate ngöne la ite hua [“nyine amekunën,” Traduction du monde nouveau ( MN) ] a denge la aqane ewekë i angeic, me tropi.”–Ioane 5:28, 29; 11:25; Mataio 20:28.

Tro ha aeatrene tune kaa? Hna qeje pengöne lai hnene “la maca ka loi ne la baselaia,” lo hna nyiqane cainöjëne hnei Iesu ngöne lo mele petre kö nyidrë e celë fen. (Mataio 4:17-23) Ngo ame hë enehila, ketre pengöne pena ha la aqane tro fë la maca ka loi hnene la Itretre Anyipici Iehova.

ITRE INI NE LA ITRETRE ANYIPICI IEHOVA