Itretre Anyipici Iehova? — Nemene La Pengö i Angatr? Nemene La Itre Ini Hnei Angatr Hna Lapaune Kow?

Eahuni a Könë Nyipunie

Atraqatre la madrine hun troa ce porotrike me nyipunie jëne la itre götran ne la boroshüre celë. Ketre, eahuni a mejiune laka, thupene la hnei nyipunieti hna e, maine jë atrepengöne hnyawa ha nyipunie la Itretre Anyipici Iehova. Celë hi matre, eahuni a könë nyipunie troa hane wai hun hnine la Uma Ne Baselaia hun? Tro hë nyipunieti a öhne la aqane trongene la itre icasikeu hun, memine la aqane catre thele huni troa tro fë la maca ka loi ne la Baselaia i Keriso ka troa aparadraisone hmaca la fen.

Hna thingehnaeane hë ekö lai hnei Akötresie. “Loi e tro sha teqene thenge la hnei nyidëti hna thinge hnaean, la hnengödrai ka hnyipixe memine la fene hnengödrai ka hnyipixe, nge eje la thina ka meköt e cili.” (2 Peteru 3:13) Nyimutre catre hë la itre macatre ka paatr. Tune la aqane anyipicine hnene la itre ewekë ka traqa enehila e celë fen, easenyi catre hë matre umuthe pi lo hneijin ne itreqe.

Hnei Paulo aposetolo hna qaja ka hape, pine laka, “Nyipunie a goeëne la drai a easenyi hë,” haawe, öni nyidrë, “tro sha imekunekeune mate troa aciane la ihnimi me ite huliwa ka loi ; tha tro kö a tije la icasikeu shë.” (Heberu 10:24, 25) Haawe, eahuni a hane könë nyipunieti troa xötrethenge la eamo hna hamëne hnei Paulo, ene la troa hane sine la itre icasikeu hun.

Ajane kö nyipunie troa wai nyipunie?