Drei Lae Akötresie?

1. Nyimutre la itre ewekë hna thili kow hnene la itre atr. Ngo Tusi Hmitrötre pe a qaja koi së ka hape, caasi hi la NYIPI Akötresie. Hnei Nyidrëti hna xupe la nöjei ewekë asëjëihë e koho hnengödrai, me e celë fen. Pine laka, hnei Nyidrëti hna hamë së la mel, haawe, Nyidrëti hmekuje hi la hne së hna troa hmi kow.—1 Korinito 8:5, 6; Hna Amamane 4:11.

2. Nyimu aqane hna ati ëjene la Akötresie, ngo caasi hi la atresiwa i Nyidrë. IEHOVA la ëje i Nyidrë. Ngöne la itre Tusi Hmitrötre ka nyimutre, ke, hna xome trije la ëje i Akötresie, nge hna ati ëje i Nyidrë ka hape, JOXU, maine AKÖTRESIE. Ngo, ngöne la kola cinyihane la Tusi Hmitrötr, ke, kola mama hnyawa la ëje i Iehova a 7 000 lao etrun!—Esodo 3:15; Salamo 83:18.

3. Hetre ngönetrei i Iehova, ngo thaa ka ceitu kö me easë. Öni Tusi Hmitrötre ka hape, “Ua la Akötesie.” (Ioane 4:24) Ame la ua, ke, ketre pengöne mele kö ka sisitria catre hune la mele së. Pëkö atr ka öhnyi Akötresie. Iehova a mele e hnengödrai, ngo öhne asë hi Nyidrëti la nöjei ewekë asë. (Salamo 11:4, 5; Ioane 1:18) Haawe, nemene la pengöne la uati hmitrötr? Thaa atr kö lai ka tui Akötresie. Ngo, trenge catre i Akötresieti pe.—Salamo 104:30.

4. Tusi Hmitrötre a amamane koi së la thiina i Akötresie. Kola amamane la itre thiina i Nyidrë ka sisitria, ene la ihnim, me meköt, me inamacan, me men. (Deuteronomi 32:4; Iobu 12:13; Isaia 40:26; 1 Ioane 4:8) Tusi Hmitrötr a qaja koi së ka hape, ka utipiine Nyidrë, me ka menyik, me ka atreine nue la itre thiina ka ngazo, me ka ham, me ka atreine xomihni. Loi e tro së a tupathe troa nyitipu Nyidrë, ceitu me itre nekönatre ka idrei.—Efeso 5:1, 2.

Easë a atre Akötresie jëne la itre hnei Nyidrëti hna xup, me jëne fe la Tusi Hmitrötr

5. Hapeu, loi kö tro së a thil, maine troa atrune pena la itre hna xup, maine itre iatr, maine itre ewekë hna hmi kow ngöne la hmi së? Ohea! (Esodo 20:4, 5) Iehova a qaja ka hape, nyipi ewekë tro së a thili hmekuje hi koi Nyidrë. Thaa tro kö Nyidrëti a ce thawa la elolo i Nyidrë memine la ketre atr, maine ketre ewekë pena. Thatreine kö troa hamë ixatua koi së hnene la itre hna xup, pine laka pëkö mene ne itre ej.—Salamo 115:4-8; Isaia 42:8.

6. Nemene la aqane tro së a atre Akötresieti hnyawa? Ame la ketre jëne troa atre Akötresie, ke, ene la troa waipengöne la itre ewekë hnei Nyidrëti hna xup, me lapa mekune hnyawa la ini hnene itre eje hna hamëne koi së. Kola amamane hnene la itre hnei Akötresieti hna xupe ka hape, hetrenyi thei Nyidrë la men, me inamacane ka tru. Easë a öhne la ihnim i Nyidrë ngöne la nöjei ewekë hnei Nyidrëti hna kuca. (Salamo 19:1-6; Roma 1:20) Ame la ketre jëne troa atrepengö i Akötresie, ke, ene la troa inine la Tusi Hmitrötr. Nyidrëti a qaja la itre ithuemacanyi ka nyimutr, matre tro së a atre la pengö i Akötresie. Nyidrëti fe a qaja koi së la trepene mekune i Nyidrë, memine la itre ewekë hnei Nyidrëti hna ajane tro së a kuca.—Amosa 3:7; 2 Timoteo 3:16, 17.

Copyright © 2006 Watch Tower Bible and Tract Society of Pennsylvania. All rights reserved.