Easenyi Akötresieti Jë Jëne La Thith

1. Ame la kola thith, ke, jëne tro së a ithahnata koi Iehova ngöne la ipië. Celë hi la kepine matre, loi e tro pala hi epuni a thithi koi Akötresie. Qa ngöne lai, tro hë epuni a drenge e kuhu hni epuni laka, thaa ka nanyi kö epuni koi Nyidrë kösë ketre enehmu i epun. Eje hi laka, nyipi draië Iehova nge atraqatre la mene i Nyidrë, ngo Nyidrëti a hnangenyëne la itre thithi së! Hapeu, epuni kö a thithi lapa koi Akötresie?—Salamo 65:2; 1 Thesalonika 5:17.

2. Thithi hi la ketre götrane ka nyipi ewekë ne la hmi së. Haawe, loi e tro së a thithi hmekuje koi Iehova Akötresie. Ngöne lo ijine Iesu e celë fen, ke, hnei nyidrëti pala hi hna thithi kowe la Tretretro i Nyidrë, ngo thaa koi ketre atr menu kö. Loi e tro së a nyitipu nyidrë. (Mataio 4:10; 6:9) Ngo eje hi laka, loi e troa jëne Iesu la thithi së. Kolo lai a amamane laka, easë a metrötrëne la göhnë ka tru hna cilëne hnei Iesu, nge easë a lapaune kowe la huj, ene la thupene mele i nyidrë.—Ioane 14:6; 1 Ioane 2:1, 2.

3. Ame ngöne la easë a thith, ke, loi e troa xulu qa kuhu hni së la itre mekune hne së hna troa qaja koi Akötresie. Thaa loi kö tro së a inine gufane la itre thithi së, maine tro pena e la thith qa ngöne la ketre sine tusi ne thith. (Mataio 6:7, 8) Loi e troa hetre ehmitrötrene la aqane troa thith, maine ngöne la nöjei ijine me ngöne la nöjei götran. Akötresieti fe a drenge la itre thith, hna qaja thaupun, e kuhu isa hni së. (1 Samuela 1:12, 13) Ka loi e troa thele la ketre götrane gaa pë mejen, nge ka nanyi qa thene la itre xaa atr, matre troa ketre sipu thith.—Mareko 1:35.

4. Nemene la itre mekune hnei epuni hna troa thithi fë? Ene la nöjei ewekë ka iacatrenekeune hnyawa, la aqane imelekeu i epuni me Nyidrë. (Filipi 4:6, 7) Kola amamane hnene lo tulu ne thithi hna amë pe hnei Iesu, laka, loi e tro së a thithi thatraqane la atresiwa i Iehova, memine la aja i Nyidrë. Loi e tro fe së a sipo Akötresie, troa hamë së la itre ewekë ka nyipi ewekë kowe la ngönetrei së me kowe mina fe la mele së, me senge la itre ngazo së, me hamëne la ixatua ka ijij, ngöne la easë a cile kowe la ketre itupath. (Mataio 6:9-13) Thaa loi kö tro së a thithi thatraqai së hmekuj. Loi e tro së a thithi kowe la itre ewekë, hmekune la aja i Akötresie.—1 Ioane 5:14.

5. Ma epuni jë a thithi ngöne la nöjei ijine kola upi epuni hnene la hni epuni troa ole, maine troa atrunyi Akötresie. (1 Aqane lapa ite Joxu 29:10-13) Loi e tro epuni a thithi ngöne la kola tupathe la lapaune i epun, hnene la itre jole hnei epuni hna ixelë memin. (Salamo 55:22; 120:1) Loi e troa thithi qëmekene la troa xen. (Mataio 14:19) Iehova a upi së troa thithi “palahi.”—Efeso 6:18.

6. Maine hne së hna kuca la ketre ngazo ka tru, ke, nyipi ewekë tro së a thith. Ngöne la itre ijine cili, ke, loi e tro së a thithi koi Akötresie cememine la hni ka ipië, me sipo Nyidrë troa senge la itre ngazo së. Maine tro së a fe amamane la itre ngazo së koi Nyidrë, nge easë a catre me thupëne matre thaa tro hmaca kö së a kuca itre ej, ke, Akötresie la “ate sheng.”—Salamo 86:5; Ite Edomë 28:13.

7. Iehova a qatixenyëne hmekuj, la itre thithi ne la itre atr ka meköt. Maine epuni a ajane tro Akötresieti a drenge la itre thith i epun, ke, nyipi ewekë tro epuni a catre troa melëne la itre wathebo i Nyidrë. (Ite Edomë 15:29; 28:9) Nyipi ewekë fe tro epuni a ipië ngöne la epuni a thith. (Luka 18:9-14) Ketre, loi e tro epuni a catre huliwa thenge la itre thith i epun. Qa ngöne lai, tro hë epuni a amamane laka epuni a lapaun, me wangatrune la hnei epuni hna qaja. Nge e ase hë epuni kuca asë lai, thupene hë lai, tro hë Iehova a sa la itre thith i epun.—Heberu 11:6.

Copyright © 2006 Watch Tower Bible and Tract Society of Pennsylvania. All rights reserved.