Ahmitrötrëne Jë La Mele Me Madra

1. Iehova la qeqe ne mel. Tro asë hi la nöjei ewekë ka mel a atrunyi Akötresie, pine laka qa thei Nyidrëti la mel. (Salamo 36:9) Ka hmitrötre catre la mele koi Akötresie. Nge ka sisitria fe koi Iehova la mele ne la medrenge e kuhu hni ne la thin. Maine tro la ketre atr a thi upune ke, ketre ewekë ka ngazo catre xajawai Akötresie.—Esodo 21:22, 23; Salamo 127:3.

Madrine Akötresie e tro së a thipëne la madra ne la ketre atr, me trije la itre hna majemine ka sisi xajawa i Iehova, me elone la hna mecin

2. Kola hmekëne pala hi hnene la itre nyipi keresiano la itre ewekë i angatr, wanga tro itre eje a eatrëne la itre xaa atr. Angatre a goeëne hnyawa la itre uma me itre loto i angatr, matre thaa tro kö a jëne hulö ne la itre xaa atr. (Deuteronomi 22:8) Thaa loi kö e tro la itre hlue i Akötresieti a inagala menu, me elo memine la itre ewekë hna mecin. Haawe, thaa angatre kö a hane elone la itre elo ka ngazo, nyine eatrëne la itre xan. Ketre mina fe, angatre a neëne la itre elo nyine ce madrin, ka tro pe a traqa kowe la pune ka ngazo.—Salamo 11:5; Ioane 13:35.

3. Ka hetre ehmitrötrene fe la mele ne la öni, kowe la Atre ixup. Celë hi matre, ijije tro la keresiano a humuthe la itre öni göi troa hetre nyine xen, maine nyine heetr, maine pena itre öni ka wezipo ka troa ihamënekeune la itre mec ka solesol, maine öni ka ses ka pi iöni hatrë. (Genese 3:21; 9:3; Esodo 21:28) Ngo thaa loi kö e troa axösisine la itre öni, maine troa humuthe itre eje ngöne la itre elo, maine göi tro hi a hetrenyi la ketre madrine ka tru.—Ite Edomë 12:10.

4. Thaa tro kö la itre keresiano a ufi sixa me ufi haö, maine xome pena la itre doroge nyine thele madrin. Thaa loi kö la itre ewekë hna kuca cili, pine laka (1) tro itre eje a musinë së, nge easë a nyihluene itre ej, (2) tro itre eje a angazone la itre ngönetrei së, nge (3) ka sisi itre eje xajawa i Akötresie. (Roma 6:19; 12:1; 2 Korinito 7:1) Eje hi laka, thaa hmaloi kö la troa nuetrije la itre hna majemine cili. Ngo ame pe, e trije hë së la itre ewekë cili, easë lai a amadrinë Iehova.

5. Ka hmitrötre fe la madra, xajawa i Akötresie. Celë hi matre, hnei Akötresieti hna qaja ka hape ame la u, maine mel, ke, eje e hnine la madra. Haawe, thaa loi kö e troa öni madra. Nge ketre thaa loi kö, e troa öni la mitre ne la ketre öni thaa hna xöje hnyawa kö la nyinawan. Maine hna ela la nyinawa ne la ketre öni, maine hna meci pena ngöne la theth, ke, thaa loi kö e troa öni. Maine hna xalene eje maine hna kuqane pena, ke, nyipi ewekë troa canga xöje la nyinawa, matre neni hnyawa pi la madra nge matre ijije troa öni.—Genese 9:3, 4; Levitiko 17:13, 14; Ite Huliwa 15:28, 29).

6. Hapeu, loi kö e troa kapa la madra ne la ketre atr, hna xome koi së? Mekune ju epun, Iehova a amekötine koi së troa iananyi memine la madra. Kolo lai a hape, thaa tro kö së a kapa la madra ne la itre xaa atr, maine sipu madra së hna hnëkëne amë hë e hnine la itrengene madra. (Ite Huliwa 21:25) Haawe, thaa tro jë kö la itre nyipi keresiano, a kapa la madra ne la itre xaa atr hna xome koi angatr. Atreine hi tro angatre a kapa la itre xaa jëne nyinyine la mec i angatr, tune la troa xome la itre xaa drösinöe, ngo ka pë pe madran. Eje hi laka, angatre a ajane troa mel, ngo thaa angatre kö a troa tupathe troa thele iamele, hnene la hna sasaithe la itre wathebo i Akötresie.—Mataio 16:25.

Copyright © 2006 Watch Tower Bible and Tract Society of Pennsylvania. All rights reserved.