Adiresy Internet Ofisialin’ny Vavolombelon’i Jehovah

Ny Vavolombelon’i Jehovah—Iza moa Izy Ireo? Inona no Inoany?

Inona no Inoany?

Mino an’i Jehovah, ilay Andriamanitra Hery Fara Tampony, Mpamorona ny lanitra sy ny tany, ny Vavolombelon’i Jehovah. Matoa misy ireo zava-mahatalanjona eo amin’izao rehetra izao manodidina antsika, dia satria nisy Mpamorona faran’izay manan-tsaina sy matanjaka nanao azy rehetra ireny. Ahitana taratry ny toetran’ny olona ny zava-bitany. Toy izany koa ny amin’i Jehovah Andriamanitra. Milaza amintsika ny Baiboly fa “ny toetrany tsy hita maso, izany hoe ny heriny mandrakizay sy ny maha Andriamanitra azy, dia hita mazava hatramin’ny namoronana izao tontolo izao, satria hita amin’ny zavatra nataony.” “Mitory ny voninahitr’Andriamanitra” koa ny lanitra, na dia tsy miteny aza.—Romanina 1:20; Salamo 19:1-4.

NY TANY ... noforonin’i Jehovah ... karakarain’ny olombelona ... honenana mandrakizay

Misy antony matoa ny olona manamboatra vilany tany, na televiziona, na ordinatera. Mbola mahatalanjona lavitra noho ireo anefa ny tany, mbamin’ny zavamaniry sy ny biby eo aminy. Tsy takatry ny saintsika ny firafitry ny vatan’olombelona, izay misy sela tsy hita isa. Zava-mahagaga tsy takatry ny saintsika koa na dia ny atidohantsika aza! Tsinontsinona ny zavatra nataon’olombelona raha oharina amin’izany, kanefa misy antony ny nanaovan’ny olona ireny zavatra noforonina ireny. Tsy maintsy misy antony koa àry matoa i Jehovah Andriamanitra namorona ireny zava-mahatalanjona ireny! Izao tokoa no lazain’ny Ohabolana 16:4: “Ny zavatra rehetra nataon’i Jehovah dia samy misy antony avokoa.”

Misy antony ny nanaovan’i Jehovah ny tany, araka izao nambarany tamin’ilay mpivady olombelona voalohany izao: “Maroa fara sy mihabetsaha ary mamenoa ny tany ... manjakà amin’ny hazandrano ao amin’ny ranomasina sy ny voro-manidina ary ny biby rehetra izay mihetsiketsika ambonin’ny tany.” (Genesisy 1:28) Tsy nankatò izy mivady, ka tsy vitany ny nahatonga ny tany ho feno olo-marina, izay tokony ho nikarakara tamim-pitiavana ny tany sy ny zavamaniry ary biby. Tsy nahatonga ny fikasan’i Jehovah tsy ho tanteraka anefa izany. Izao no nosoratana, an’arivo taona tatỳ aoriana: ‘Tsy namorona ny tany tsy amin’ny antony akory Andriamanitra, ilay Mpanao ny tany. Nataony honenana izy io.’ Tsy natao hopotehina izy io, satria “ny tany ... maharitra mandrakizay.” (Isaia 45:18, TV; Mpitoriteny 1:4) Ho tanteraka ny fikasan’i Jehovah ho an’ny tany, araka ny teniny hoe: “Ho to ny fikasako, ary hefaiko ny sitrapoko rehetra.”—Isaia 46:10.

Mino àry ny Vavolombelon’i Jehovah fa haharitra mandrakizay ny tany, ary honina eo mandrakizay ny olona rehetra, na ny velona na ny maty, izay hiaina mifanaraka amin’ilay fikasan’i Jehovah hanova ny tany ho kanto. Mpanota ny olombelona rehetra satria nandova tsy fahalavorariana tamin’i Adama sy Eva. (Romanina 5:12) Hoy ny Baiboly amintsika: “Fahafatesana no karama omen’ny ota.” “Fantatry ny velona fa ho faty izy; fa ny maty kosa tsy mba mahalala na inona na inona.” “Ny fanahy izay manota no ho faty.” (Romanina 6:23; Mpitoriteny 9:5; Ezekiela 18:4, 20) Ahoana àry no hahafahan’izy ireo ho velona indray, ka hahazo ireo fitahiana hisy eto an-tany? Amin’ny alalan’ny sorona nataon’i Jesosy Kristy, satria hoy izy: “Izaho no fananganana ny maty sy fiainana. Izay maneho finoana ahy, na dia maty aza, dia ho velona indray.” ‘Handre ny feony ny olona rehetra any am-pasana, dia hivoaka.’—Jaona 5:28, 29; 11:25; Matio 20:28.

Ahoana no hahatanterahan’izany? Manazava izany ny “vaovao tsaran’ilay fanjakana.” I Jesosy no nitory azy io voalohany, fony izy teto an-tany. (Matio 4:17-23) Mitory ny vaovao tsara amin’ny fomba iray tena manokana anefa ny Vavolombelon’i Jehovah ankehitriny.

FINOAN’NY VAVOLOMBELON’I JEHOVAH

Finoana	Antony Ara-baiboly
Tenin’Andriamanitra ny Baiboly, sady fahamarinana	2 Tim. 3:16, 17; 2 Pet. 1:20, 21; Jaona 17:17
Azo itokisana kokoa noho ny fampianaran’olombelona ny Baiboly	Matio 15:3; Kol. 2:8
Jehovah no anaran’Andriamanitra	Sal. 83:18; Isaia 26:4; 42:8; Eks. 6:3
Zanak’Andriamanitra i Kristy, ary ambany noho Izy	Matio 3:17; Jaona 8:42; 14:28; 20:17; 1 Kor. 11:3; 15:28
I Kristy no voalohany noforonin’Andriamanitra	Kol. 1:15; Apok. 3:14
Maty teo amin’ny tsato-kazo i Kristy, fa tsy teo amin’ny lakroa	Gal. 3:13; Asa. 5:30
Ny ain’olombelona nananan’i Kristy no naloa mba hanavotana ny olombelona mpankatò	Matio 20:28; 1 Tim. 2:5, 6; 1 Pet. 2:24
Ampy ilay sorona nataon’i Kristy indray mandeha	Rom. 6:10; Heb. 9:25-28
Natsangana tamin’ny maty ho zavaboary ara-panahy tsy mety maty i Kristy	1 Pet. 3:18; Rom. 6:9; Apok. 1:17, 18
Tsy hita maso ny fanatrehan’i Kristy	Jaona 14:19; Matio 24:3; 2 Kor. 5:16; Sal. 110:1, 2
Miaina amin’ny “andro farany” isika izao	Matio 24:3-14; 2 Tim. 3:1-5; Lioka 17:26-30
Hanjaka ny fahamarinana sy ny fiadanana rehefa hitondra ny tany ilay Fanjakana tarihin’i Kristy	Isaia 9:5, 6; 11:1-5; Dan. 7:13, 14; Matio 6:10
Hampisy fiainana tonga lafatra eto an-tany ilay Fanjakana	Sal. 72:1-4; Apok. 7:9, 10, 13-17; 21:3, 4
Tsy ho potika mihitsy ny tany, ary tsy ho fongana ny mponina eo aminy	Mpit. 1:4; Isaia 45:18; Sal. 78:69
Hofoanan’Andriamanitra amin’ny ady Hara-magedona ity tontolo ity	Apok. 16:14, 16; Zef. 3:8; Dan. 2:44; Isaia 34:2; 55:10, 11
Horinganina mandrakizay ny ratsy fanahy	Matio 25:41-46; 2 Tes. 1:6-9
Hahazo fiainana mandrakizay ny olona ankasitrahan’Andriamanitra	Jaona 3:16; 10:27, 28; 17:3; Marka 10:29, 30
Iray ihany ny lalana mankany amin’ny fiainana	Matio 7:13, 14; Efes. 4:4, 5
Ny fahotan’i Adama no nahatonga ny olombelona ho faty	Rom. 5:12; 6:23
Tsy misy intsony ny olombelona rehefa maty	Mpit. 9:10; Sal. 6:5; 146:4; Jaona 11:11-14
Ny afobe dia ny fasan’ny olona rehetra	Joba 14:13; Apok. 20:13, 14
Ny fitsanganana amin’ny maty no fanantenana ho an’ny maty	1 Kor. 15:20-22; Jaona 5:28, 29; 11:25, 26
Ho foana ny fahafatesana avy tamin’i Adama	1 Kor. 15:26, 54; Apok. 21:4; Isaia 25:8
Ondry vitsy 144 000 ihany no ho any an-danitra ka hiara-manjaka amin’i Kristy	Lioka 12:32; Apok. 14:1, 3; 1 Kor. 15:40-53; Apok. 5:9, 10
Ateraka indray ho zanaka ara-panahin’Andriamanitra ireo 144 000	1 Pet. 1:23; Jaona 3:3; Apok. 7:3, 4
Natao tamin’ny Israely ara-panahy ny fifanekena vaovao	Jer. 31:31; Heb. 8:10-13
Miorina eo amin’i Kristy ny fiangonany	Efes. 2:20; Isaia 28:16; Matio 21:42
I Jehovah irery ihany no tokony hivavahana, amin’ny alalan’i Kristy	Jaona 14:6, 13, 14; 1 Tim. 2:5
Tsy tokony hampiasa sary rehefa mivavaka	Eks. 20:4, 5; Lev. 26:1; 1 Kor. 10:14; Sal. 115:4-8
Tsy maintsy halavirina ny fifandraisana amin’ny fanahy ratsy	Deot. 18:10-12; Gal. 5:19-21; Lev. 19:31
I Satana no filoha tsy hita mason’ity tontolo ity	1 Jaona 5:19; 2 Kor. 4:4; Jaona 12:31
Tsy tokony handray anjara amin’ny firaisam-pinoana ny Kristianina	2 Kor. 6:14-17; 11:13-15; Gal. 5:9; Deot. 7:1-5
Tokony ho tafasaraka amin’ity tontolo ity ny Kristianina	Jak. 4:4; 1 Jaona 2:15; Jaona 15:19; 17:16
Ankatoavina ny lalàn’olombelona raha tsy mifanipaka amin’ny an’Andriamanitra	Matio 22:20, 21; 1 Pet. 2:12; 4:15
Fandikana ny lalàn’Andriamanitra ny fampidiran-dra, na amin’ny vava izany na amin’ny lalan-dra	Gen. 9:3, 4; Lev. 17:14; Asa. 15:28, 29
Tsy maintsy ankatoavina ny lalàn’ny Baiboly momba ny fitondran-tena	1 Kor. 6:9, 10; Heb. 13:4; 1 Tim. 3:2; Ohab. 5:1-23
Ny Israely ihany no nasaina nitandrina ny Sabata, ary niara-nifarana tamin’ny Lalàn’i Mosesy izy io	Deot. 5:15; Eks. 31:13; Rom. 10:4; Gal. 4:9, 10; Kol. 2:16, 17
Tsy tokony hisy olona kilasina ho mpitondra fivavahana sy omena anaram-boninahitra manokana	Matio 23:8-12; 20:25-27; Joba 32:21, 22
Tsy nivoatra niandalana ny olombelona, fa noforonina	Isaia 45:12; Gen. 1:27; Matio 19:4
Nanome modely tsy maintsy harahin’ny mpanompon’Andriamanitra, i Kristy	1 Pet. 2:21; Heb. 10:7; Jaona 4:34; 6:38
Fanehoana ny fanoloran-tena ny batisa amin’ny alalan’ny fandrobohana tanteraka anaty rano	Marka 1:9, 10; Jaona 3:23; Asa. 19:4, 5
Faly ny Kristianina mitory ampahibemaso ny fahamarinana ara-baiboly	Rom. 10:10; Heb. 13:15; Isaia 43:10-12

Navoaka tamin’ny 2000