Ta eo Baibel Ej Lukkun Katakin?

ELAÑE kwoj lale nuujpeba ko, nuuj ko ilo TV im roñjake ennan ko ilo retio, kwonaj lo bwe elukkun lõñ nuuj ko kin kõtõrãi kien, tõrinae, im jerbal ko relej im kamijak! Lemnok kin iñtan im buromõj ko kwoj iioni. Bwelen nañinmij ak mij eo an juõn eo ejitenburu ibam ej lukkun kaburomõj yuk. Kwomaroñ bõk ejja eñjake eo wõt an kar Job, ke ear ba: “Eddron iñtan ko kab buromõj ko aõ, eddroier enaj kar lab jen eddron bok ko ibãrijet.”—Job 6:2, 3, UBS.

Kwon kajitõk ibam mõke:

• Eñin ke kar karõk eo an Anij ñõn iõ im armij otemjej?
• Ia eo imaroñ bõk jibõñ jene ñõn aõ maroñ kamarmiri abañ ko aõ?
• Eor ke kejatrikrik bwe jenaj lo ainemõn ijin ion lõl?

Baibel eo ej letok uak ko remõn ñõn kajitõk kein.

BAIBEL EO EJ KATAKIN BWE ANIJ ENAJ BÕKTOK OKTÕK KEIN ÑÕN LÕL.

“E naj kõmõraik jen mejeir dren in kemjãlãl otemjej, im e naj ejelok bar mij, im re jamin bar liãjlol, ak jõñ, ak iñtan; bwe men ko mokta re joko.”—Reveles̃õn 21:4

“Inem armij e kirro e naj kãki einwõt juõn hart.”—Aiseia 35:6

“Mejen ro re bilo re naj bellok.” —Aiseia 35:5

“Ro otemjej rej ber ilo lũp ko renaj . . . drioijtok.”—Jon 5:28, 29

“Dri jokwe ie e jamin ba, I nañinmij.”—Aiseia 33:24

“Eneo en obrak kin wheat.”—Sam 72:16, UBS.

BÕK TOKJEN JEN TA KO BAIBEL EJ KATAKIN

Jab mõkõj in lemnok bwe men ko rej walok rej ettõnak bajjek wõt. Anij ear kalimur bwe enaj kajejit kitien men kein, im Baibel eo ej kemelele kin ewi wãwen an naj kõmõne men in.

Bõtab, elõñlok tokjen ko jemaroñ bõk jen Baibel eo. Ej letok ki eo ñõn am maroñ lo juõn mour ejuburu kiõ. Lemnok kin inebata im abañ ko kwoj iioni. Men kein remaroñ kitibuj abañ ko kin jããn, baamle, ejmour, ak mij eo an juõn eo ejitenburu ibam. Baibel eo emaroñ jibõñ yuk ñõn jelmae abañ ko ranin, im emaroñ kainemõn yuk ilo an kwalok uak ko ñõn kajitõk ko einwõt kein:

• Etke jej iñtan?
• Ewi wãwen ar maroñ kijenmij wõt iomin inebata ko ilo mour?
• Ewi wãwen ar maroñ kõmõn bwe mour in baamle eo ar en lemõnõnõ?
• Ta eo ej walok ñõn kij ñe jej mij?
• Jenaj ke bar lo ro rejitenburu iber rar mij?
• Ewi wãwen ar jela bwe Anij enaj kajejit kalimur ko an kin ran ko rej itok?

Am konono buk in ej kwalok bwe kwokõnan jela kin ta ko Baibel eo ej katakin. Buk in enaj jibõñ yuk. Ilo tulõlin peij ko kwonaj lo kajitõk ko ñõn pãrokõrããp ko kajjojo. Elõñ million armij ro rar mõnõnõ kin kilen katak in ikijen kajitõk-im-uak ke rar katak Baibel iben Dri Kennan ro an Jeova. Kimij kejatrikrik bwe kwonaj mõnõnõ kin wãwen in. Kejerammõn eo an Anij en ber ibam kiõ ilo am naj lo mõnõnõ im juburu kin am katak men ko Baibel ej lukkun katakin!

JELA KAJERBAL BAIBEL EO AM

EOR 66 buk ko im letter ko ilo Baibel eo. Im buk kein kar ajeji ilo japter ko im eon ko bwe en biruru ar etale. Ñe ej walok eon ko ilo buk in, bwinbwin eo moktata elikin etan buk eo ej japter eo, im bwinbwin eo tok elikin ej eon eo. Ñõn wanjoñok, “2 Timote 3:16” ej melelen letter eo kein karuo ñõn Timote, ilo japter 3, im eon 16.

Enaj mõkõj am iminene kin kilen kajerbal Baibel eo ilo am kebellok ñõn eon ko rej walok ilo buk in. Bareinwõt, emõn elañe kwoj jino juõn karõk ñõn konono Baibel eo ran otemjej. Ilo am konono jilu lok ñõn lailim japter ko kajjojo ran, kwomaroñ kajemlok Baibel eo iomin juõn yiõ.