JEMLOKIN
KABUÑ WAN
EJ EBAK!

Ta In Kabuñ Wan? Kwoj inebata ke kin nana ko rej kõmmani ilo etan kabuñ? Tarinae, terrorism (kõmman jorrãn ko ñan kamijak), im nana ko me ro rej ba rej karejar ñan Anij rej kõmmani, rej kabõnõnõik lemnak eo am ke kin ta eo ejimwe? Etke kabuñ ej einwõt unjen elõñ abañ ko?

Bwid eo ejjab bed ibben aolep kabuñ, ak ibben kabuñ wan wõt. Jesus Christ ear kalikar bwe kabuñ wan ej kõmman bwe armij ren kõmmani men ko renana, einwõt juõn “wijki enana e jebar im enana leen.” (Matu 7:15-17) Leen rot ko rej jebar jen kabuñ wan?

Kabuñ Wan . . .

EJ BÕK KUNAN ILO TARINAE IM KIEN: “Ilo Asia im jikin ko jet bareinwõt,” magazine eo etan Asiaweek ej ba, “ri tel ro me rej bukõt air kajur, ilo jab kautiej im jimwe rej inonooje eñjake ko an armij kin kabuñ ñan kowõnmanlok kõnan ko air make.” Kin men in, magazine eo ej kakkõl: “Lal in ej bed ilo kauwatata eo ñan an jorrãn kin an bwok.” Juõn ri tel in kabuñ ebuñbuñ ilo United States ear ba: “Kwoj aikwij mõn terrorist ro (ro rej mõnmõn) elañe kwokõnan kabõjrak air mõn armij.” Kar ta eo mejelan? “Mõn aolep terrorist ro ilo etan Iroij.” Ilo oktak, Bible eo ej ba: “Elañe armij ej ba, Ña ij yokwe Anij, im ej kijirãte jein im jãtin, e dri riõp.” (1 Jon 4:20) Jesus ear ba: “Komin yokwe ro dri kijirãte kom.” (Matu 5:44) Ewõr jete kabuñ ko kwomaroñ lemnak kaki me rej bõk kunair ilo tarinae?

EJ KAJEDEDLOK KATAK KO REWAN: Enañin aolep kabuñ ko rej katakin bwe aan ak jitõb eo ej mõttan in armij eo im jejjab maroñ loe me ej mour manlok elikin mij eo an enbwinin kanniek. Ilo air kajerbal katak in, elõñ ian kabuñ kein enana air jerbal ibben ro uair, rej kajitõk elap jããn ñan air jar kin ro remij. Bõtab, eoktak men eo Bible ej katakin kake. “Bwe ro re mour re jela bwe re naj mij: a ro re mij ejelok air jela, im e bar ejelok men in lelok ñõn ir; re jab ememej ir.” (Ekklisiastis 9:5) Jesus ear katakin bwe ro remij renaj jerkakbiji—juõn men ejjab men in aikwij elañe armij ewõr juõn aan eo eban mij. (Jon 11: 11-25) Kabuñ eo am ej katakin ke bwe aan armij eban mij?

EJJAB KANANAIK MOUR ETTON: Ilo elõñ ailiñ ko, kumi in kabuñ ko rej kabiti maan ro rej mijkaie kake don im kõrã ro rej mijkaie kake don bwe ren erom ri tel ro ilo kabuñ ko air im rej rejañ kien ko ñan air kamelim belele ko ikõtan emaan ñan emaan ak kõrã ñan kõrã. Meñe ilo kabuñ ko me rej kananaik mour in lũñ, ir bareinwõt rar bõk ro rar kokkure ajiri ro bwe ren ri tel in kabuñ ko air. Ak, ta eo Bible ej katakin? Ej ba ilo alikar: “Komin jab bwir; ejelok dri lũñ, ak dri kabuñ ñõn ekjõp, ak dri lejen, ak dri ejej, ak dri Sodõm . . . e naj bõk an jolit ailiñ in Anij.” (1 Dri Korint 6:9, 10) Kwoj jelã ke kin jabdewõt kabuñ ko me rej kamelim air belele wan?

Ta ilju eo an kabuñ ko me rej kwalok leen ko renana? Jesus ear kakkõl: “Wijki otemjej re jab jebar im emõn leir, jeki im julok ilo kijeek.” (Matu 7:19) Aet, naj jeke im kokkure kabuñ wan! Ak ewi wãwen im ñããt men in enaj walok? Juõn kanan eo ear walok ilo juõn vision im kar je ilo Bible ilo book in Revelation, chapter 17 im 18, ej letok uak eo.

Ewi Wãwen An Naj Jemlok Kabuñ Wan?

Pijaik men in ilo lemnak eo am. Juõn kõrã ekijoñ ej jijet ion juõn kidu awia elukkun kamijak. Kidu awia eo ewõr jiljilimjuõn bõran im joñoul doon ko. (Reveles̃õn 17:1-4) Wõn eo kõrã ekijoñ in ej jutak ikijen? Ewõr kilan “ion kiñ ro an lõl.” Ej kõnak nuknuk eõij, kajerbal men in kaijurjur, im elap an mweie. Bareinwõt, ikijen manit in anijnij ko an, ej mone ‘dri ailiñ ko otemjej.’ (Reveles̃õn 17:18; 18:12, 13, 23) Bible eo ej jibañ kij ñan ad kile bwe kõrã in ekijoñ ej juõn dolul in kabuñ ibelakin lal. Ejjab jutak kin juõn wõt kabuñ, ak kin aolep kabuñ ko me rej kwalok leen ko renana.

Kidu awia eo me kõrã ekijoñ eo ej iuwe ion ej pijaik kien ko rekajur ibelakin lal. (Reveles̃õn 17:10-13) Kabuñ wan ej iuwe ion kidu awia in kien ko an lal in, im ej kajeoñ in likit kilan ion bebe ko air im tel ial ko air.

Bõtab, mõttan jidik juõn men ekabwilõñlõñ enaj walok. “Im drun ko joñoul kw’ar loi, im kiru eo, re naj kijirãte kõra ekijoñ eo, im re naj kõmõn bwe en mõke ian im kelwan, im re naj kõñ kõniekin, im naj kanuij tile ilo kijeek.” (Reveles̃õn 17:16) Ilo idiñ, kien ko an lal in renaj oktak nae kabuñ wan im lukkun kokkure! Ta eo enaj kõmman bwe men in en walok? Book in Reveles̃õn ilo Bible ej uak: “Bwe Anij e ar likit ilo burueir bwe ren kõmõnmõn ankil an.” (Reveles̃õn 17:17) Aet, Anij enaj ekajete kabuñ wan kin aolep jerbal ko renana ear kõmmani ilo etan. Ilo ekajet jimwe, enaj kajerbal ri kien ro rej lũñ ibben einwõt kein jerbal eo ñan kokkure e.

Ta eo kwoj aikwij kõmmane elañe kwojjab kõnan bwe kwon jorrãn einwõt kabuñ wan? “Komin drioijtok jen e, armij ro Aõ,” ri keañ eo an Anij ear rejañ. (Reveles̃õn 18:4) Emol, kiõ ej ien ñan ad illok jen kabuñ wan! Ak ej melelen ke bwe jej aikwij bõjrak jen ad tõmak ilo Anij? Jaab, kinke jab tõmak ilo Anij ejjab letok juõn kejatdikdik ñan mour ilo ran ko renaj itok. (2 Dri Tessalonika 1:6-9) Jikin kone eo ej ilo kabuñ eo emol wõt. Ekijkan am maroñ kile kabuñ eo emol?

Ekijkan Am Maroñ Kile Kabuñ eo Emol

Ta leen eo emõn kabuñ eo emol ej aikwij kwaloke?—Matu 7:17.

Kabuñ eo Emol . . .

EJ KWALOK YOKWE: Ri kabuñ ro remol “re jab jen lõl,” rejjab jebel ikijen ailiñ ak manit, im rej kwalok ‘air yokwe don.’ (Jon 13:35; 17:16; Jerbal 10:34, 35) Jen air mõn don, rej mõnõnõ in mij kin don.— 1 Jon 3:16.

EJ LIKI NAN EO AN ANIJ: Kabuñ eo emol ejjab katakin “bwebwenato” im “kien ko an armij,” ak jen an eindein katak ko an rej wawa ion Nan in Anij, Bible eo. (Matu 15:6-9) Etke? Kinke “Jeje ko otemjej emwij letok kin kakõrmol an Anij, ej bareinwõt or tokjeir kin katakin, im kowe, im kajime, im kajelaik armij ilo kwojarjar.”—2 Timote 3:16.

EJ KAKAJUR FAMILY KO IM KEJBÃROK KIEN KO REUTIEJ KIN MOUR ERREO: Kabuñ eo emol ej katakin lõmaro ri belele bwe ren ‘yokwe limaro beleir im einwõt enbwiniir,’ jibañ limaro ri belele ñan kaddeklok juõn ‘mijak emũlal ñan lõmaro beleir,’ im katakin ajiri ro bwe ren ‘bokake jemeir im jineir.’ (Dri Epesõs 5:28, 33; 6:1) Bareinwõt, ro rej bõk maroñ ion ro jet rej aikwij kwalok mwil emõn.—1 Timote 3:1-10

Ewõr ke jabdewõt kabuñ me ej lor kien kein? Book eo Holocaust Politics, me kar jeje ilo 2001, ej ba: “Elañe elõñlok armij rar lor katak ko im kõmman ko an Ri Kennan ro an Jehovah, Holocaust eo eban kar walok im enaj kar ejelok torlokbõke kumi in armij ro.”

Emol, ilo 235 ailiñ ko, Ri Kennan ro an Jehovah rejjab baj kwalok wõt kin kien ko ilo Bible kin mour emõn—rej jerbale ilo air mour. Kimij rejañ yuk bwe kwon kajitõk ibben Ri Kennan ro an Jehovah ñan air jibañ yuk katak kin ta eo Anij ej aikwiji bwe kwon kõmmane bwe kwon maroñ kabuñ ñan e ilo wãwen eo ekõnan. Kiõ ej ien ñan am emmakit. Kwon jab aibedbed. Ien jemlokin kabuñ wan ej ebak!— Zephaniah 2:2, 3.