A Zeova Kaset rãmbã: B yaa ãnd rãmba? Yaa bõe la b tẽeda?

Yaa bõe la b tẽeda?

A Zeova Kaset rãmbã tẽeda Wẽnnaam sẽn yaa Pãng sẽn ka to Soab a Zeova, sẽn yaa saasã la tẽngã Naandã. Tʋʋm-kãsems nins sẽn be ãndũniyã pʋgẽ wã kõta kaset tɩ Naand sẽn tar yam la pãng sẽn ka to n maan dẽ fãa. Wa rapã la pagbã tʋʋm sẽn kɩtd tɩ b bãng b zʋgã, Wẽnnaam a Zeova me tʋʋmã kɩtdame tɩ b bãng a sẽn ya a soaba. Biiblã yeta tõnd tɩ “bũmb nins sẽn naan hal dũniyã naanega wakata pukda Wẽnnaam zemsgo nin sẽn ka tõe n yã ye.” Sẽn paase, “saas wilgda Wẽnnaam ziiri,” tɩ pa tũ ne goam ye.—Rom dãmba 1:20; Yɩɩl Sõamyã 19:2-5.

TẼNGÃ . . . a Zeova sẽn naan . . . tɩ ninsaal get a yellã . . . neb n na n zĩnd a zug wakat fãa

Nebã pa maand laase, televiziõ rãmba, bɩ ordinatɛɛr dãmb zaalem yĩng ye. Tẽngã ne tɩɩsã la rũmsã b sẽn naan tɩ be a zugã yaa bõn-kãsems n yɩɩd ninsaalba sẽn maanã zĩig sẽn zãre. Ninsaal yĩngã halhaal võor wʋmb yaa toog ne tõndo. Tõnd kalkõtã meng sẽn kɩtd tɩ d tagsdẽ wã yaa bõn-kãseng sẽn yaa yel-solemde. Ninsaalbã pa maand bũmb nins meng yõod sẽn paoodã zaalem yĩng ye. Rẽnd sɩd-sɩda, a Zeova naanegã sẽn yɛɛsdã pa be zaalem yĩng ye. Yelbũna 16:4 yetame tɩ sɩd yaa woto: “Zusoaba ka maan bũmb ba a yembr zaalem yĩng ye.”

A Zeova pa maan tẽngã zaalem yĩng ye. Yaa wa a sẽn togs pipi raoã ne a pagã, a yeel-b lame “tɩ b rog kamb n pid dũniyã la b tõog-a. La b soog zĩma sẽn be kooma pʋsẽ wã la bõn-yɩgdɩ wã sẽn yɩgd yĩngrã la rũms nins fãa sẽn kẽnd dũniyã zugã.” (Sɩngre 1:28) Raoã ne a pagã sẽn yɩ tõatbã yĩnga, b pa pids tẽngã ne nin-tɩrs sẽn na n ges tẽngã la a tɩɩsã ne a rũmsã yell ne nonglem ye. La bãmb kongrã pa kɩtd t’a Zeova raabã vaal ye. Yʋʋm tusa poore, b gʋlsa woto: “Yaa bãmb [Wẽnnaam] n naan dũniyã. . . . Bãmb ka naan-a t’a lebg zaalem ye. Bãmb naan-a lame tɩ neb zĩnd a zugu.” B ra pa segd n sãam-a ye. Sẽn yaa lebend ne rẽ, “[tẽngã, NW] ket n paada wakat fãa.” (Ezai 45:18; Koɛɛg Soaba 1:4) A Zeova sẽn yãk raab ning tẽngã yĩngã na n pidsame: “M goama na n yalsame. La m na n maana m yam n baase.”—Ezai 46:10.

Woto, a Zeova Kaset rãmbã tẽedame tɩ tẽngã na n paa wakat sẽn pa sate. B leb n tẽedame tɩ sẽn vɩ-b la sẽn ki-bã sʋka, neb nins fãa sẽn na n sak a Zeova raabã tõe n wa vɩɩmda tẽng sẽn tar dasãnd zug wakat sẽn pa sate. A Ãdem yel-wẽnã bẽega ãdem-biisã fãa b rogmẽ wã, tɩ b fãa yaa yel-wẽn-maandba. (Rom dãmba 5:12) Biiblã yeta tõnd woto: “Yel-wẽna yaood yaa kũum.” “Nin-vɩɩs miime tɩ b na n kiime. La kũum ka mi bũmb ye.” “Yaa ned ninga sẽn maan yel-wẽna n na n ki.” (Rom dãmba 6:23; Koɛɛg Soaba 9:5; Ezekɩɛll 18:4, 20) Sã n yaa woto, b yɩta wãn n tõog n vɩɩmd yɛs n paam bark nins sẽn na n wa tẽng zugã? Yaa maoong ning a Zezi Kirist sẽn kõ, tɩ yɩ rond yel-wẽna yĩngã maasem yĩng bala. A sɩd yeelame: “Mam yaa vʋʋgre la vɩɩm. Ned ninga sẽn tẽed maam, baa yẽ sã n ki, a na paam vɩɩm.” “Fãa sẽn be yaad pʋsẽ na n wʋm[a] bãmb koɛɛg n yi.”—Zã 5:28, 29; 11:25; Matɩe 20:28.

Wãn to la rẽ na n yɩ? B wilga sẽn na n yɩ to-to ‘soolmã Koe-noog’ pʋgẽ, a Zezi sẽn da sɩng moonego, a sẽn da wa n be tẽng zugã. (Matɩe 4:17-23) La rũndã-rũndã, a Zeova Kaset rãmbã moonda koe-noogã ne manesem sẽn yaa toor wʋsgo.

A ZEOVA KASET RÃMBÃ SẼN TẼED BŨMB NINSI