Wẽnnaam daabã ne tẽngã yaa bõe?

1. A Zeova naana tẽngã sẽn na yɩl tɩ ninsaalbã vɩɩmd a zug wakat sẽn-kõn-sa. A ra ratame tɩ nin-tɩrs zĩnd a zug ne sũ-noog wakat fãa. (Yɩɩl Sõamyã 115:16; Ezai 45:18) Tẽngã kõn sãam abada. A na n ket n bee wakat fãa.—Yɩɩl Sõamyã 104:5; Koɛɛg Soaba 1:4.

2. Sẽn deng tɩ Wẽnd naan ninsaala, a yãka tẽngã zĩig a ye n maan arzãn sẽn yaa neere. A boola zĩ-kãng tɩ Edɛn zẽed zĩig bɩ bãoogo. Yaa beenẽ la Wẽnnaam da ning pipi rao wã ne pipi pagã, sẽn dat n yeel t’a Ãdem ne a Hawa. Wẽnnaam sẽn da ratã yaa b rog kamb n pids tẽngã gilli. Bilf-bilfu b ra na n kɩtame tɩ tẽngã tõr lebg arzãna.—Sɩngre 1:28; 2:8, 15.

B konga arzãnã

3. A Ãdem ne a Hawa maana yel-wẽnde, b sẽn kɩɩs Wẽnnaam noorã ne yamleoogã. Rẽ n so t’a Zeova rig-b n yiis Edɛn zẽedã zĩigẽ, tɩ b kong arzãnã. (Sɩngre 3:1-6, 23) Baasg zãnga a Zeova pa bas a raabã ne tẽngã tɩ lʋɩ ye. A kãabame t’a na n kɩtame t’a lebg arzãna, tɩ ninsaalb vɩɩmd a zug wakat sẽn-kõn-sa. Wãn-wãn la a na n maan dẽ?—Yɩɩl Sõamyã 37:29.

4. Sẽn na yɩl tɩ tẽngã lebg arzãna, rẽnda b yiis nin-wẽnsã. (Yɩɩl Sõamyã 37:38) Yaa Harmagedõ sẽn yaa Wẽnnaam zabr ning sẽn na n kɩt tɩ wẽngã sa wã sasa la b na n maan dẽ. Rẽ loogr poore, b na n kẽesa a Sʋɩtãan bãens yʋʋm 1 000. Woto rat n yeelame tɩ nin-wẽng ba a ye pa na n põs n wa sãam tẽngã ye. Yaa Wẽnnaam sõgen dãmbã bal n na n põse.—Wilgri 16:14, 16; 20:1-3.

5. Yaa sasa kãng la Rĩm a Zezi Kirist na n zĩnd saasẽ n dɩ naam tẽngã zug yʋʋm 1 000. (Wilgri 20:6) Bilf-bilfu, a na n yiisa yel-wẽndã tõnd yamẽ wã la d yĩnsẽ wã. Tõnd na n lebga ninsaalb sẽn zems zãng wala a Ãdem ne a Hawa sẽn da yaa to-to, nand tɩ b maan yel-wẽndã. Sasa kãnga, bãase, kʋʋlem, la kũum pa na n le zĩnd ye. Bãad dãmbã na n paama sãoogre, tɩ sẽn kʋʋl-bã lebg poal yɛsa.—Zoob 33:25; Ezai 33:24; Wilgri 21:3, 4.

6. A Zezi Yʋʋm Tusr Naamã wakate, wẽn-sakdbã na n tʋmame n kɩt tɩ tẽngã gill lebg arzãna. (Yɩɩl Sõamyã 37:29) Sẽn paase, neb milyõ rãmb sẽn ki na n vʋʋgame n vɩɩmd tẽngã zugu. (Tʋʋma 24:15) B sã n sak n maan bũmb ning Wẽnnaam sẽn dat tɩ b maanã, b na n kell n vɩɩmda wakat sẽn-kõn-sa tẽngã zugu. La b sã n tõdge, b na n sãam-b-la wakat fãa yĩnga.—Zã 5:28, 29; Wilgri 20:11-15.

7. Woto, Wẽnnaam daabã ne tẽngã na n pidsame. Yãmb rat n paama bark kãensã sẽn watã bɩ? Y sã n datame, y segd n ket n zãmsd n bãngda a Zeova la y sakd a noyã. Y sã n kẽnd tigissã a Zeova Kaset rãmbã Rĩung Roogẽ, na n sõng-y lame tɩ y maan dẽ.—Ezai 11:9; Hebre dãmba 10:24, 25.

Armagedõ poore b na n kɩtame tɩ tẽngã lebg arzãna

Copyright © 2008 Watch Tower Bible and Tract Society of Pennsylvania. All rights reserved.